ފުލުހަކު ވެލާނާ އިންޓަރނޭޝަނަލް އެއަރޕޯޓުގެ ޑިއުޓީ ފްރީއިން ސިނގިރެޓް ބޭރުކުރަން އުޅުނު މައްސަލައެއް ތަހުގީގުކުރަން ފަށައިފިއެވެ.

މި މައްސަލަ ބަލަމުން އަންނަނީ ކަސްޓަމްސް އާއި ފުލުހުންނާއި ގުޅިގެންނެވެ. ރާއްޖެ އެމްވީއަށް މައުލޫމާތު ލިބިފައިވާ ގޮތުގައި ވެލާނާ އިންޓަރނޭޝަނަލް އެއަރޕޯޓުގެ ޑިއުޓީ ފްރީއިން 140 ކާޓޫނު ސިނގިރެޓް ފުލުހަކު ބޭރުކުރަން އުޅެނިކޮށް، އޭނާ ހުއްޓުވީ ކަސްޓަމްސްއިންނެވެ. އެގޮތުން އޭނާ އެކަން ކުރީ އެތަނުގެ މަސައްކަތު މީހުންނާއި ބައިވެރިވެގެންނެވެ. އެގޮތުން މަސައްކަތު މީހުން ކުނި އަޅަން ބޭނުންކުރާ ކަޅު ކޮތަޅަށް ސިނގިރެޓް ކާޓޫން އެޅުމަށްފަހު، އެތަކެތި ގެންދަނިކޮށް އަތުލައިގަތީ ލިފްޓް ތެރެއިންނެވެ.

މި މައްސަލަ އާއި ގުޅިގެން މިހާތަނަށް ފުލުހުން އަދި ކަސްޓަމްސްއިން ވެސް އެއްޗެއް ބުނެފައެއް ނުވެއެވެ.

ސިނގިރެޓް ގަވާއިދާ ހިލާފަށް އެތެރެކުރުމުގެ މައްސަލަތައް އިތުރުވެފައިވަނީ ސަރުކާރުން ސިނގިރެޓްގެ އަގުބޮޑުކުރުމާއި ގުޅިގެންނެވެ. އެގޮތުން މާލޭގައި ހުރި ބޮންޑެޑް ވެއަރ ހައުސްއެއްގައި ރައްކާކޮށްފައި ހުރި ސިނގިރެޓްތަކެއް ވެސް ބޭރުކުރި މައްސަލައެއް ފެންމަތިވިއެވެ. މި މައްސަލައިގައި ކަސްޓަމްސް އިން ވަނީ 67.9 މިލިއަން ރުފިޔާގެ ޑިއުޓީ ނަގައިދޭން އެދި އެޓަރނީ ޖެނެރަލްގެ އޮފީހަށް މައްސަލަ ފޮނުވާފައެވެ.