އިސްރާއީލުން ޣައްޒާއަށް ދިން ހަމަލާތަކުގައި 23 މީހުން މަރުވެއްޖެ
25 މާރިޗު 2025 | އަންގާރަ 17:25މިހާތަނަށް ގާތްގަނޑަކަށް 700 އެއްހާ މީހުން މަރުވެފައިވާ ކަމަށާއި އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށް ފަލަސްތީނުގެ ސިއްހީ އޮފިޝަލުން ބުނެ އެވެ.
ޣައްޒާ ސިޓީގެ މާމަދާނީ (ބަޕްޓިސްޓް) ހޮސްޕިޓަލްގެ ނަމުން ނަންދީފައިވާ އަހްލީ އަރަބި ހޮސްޕިޓަލުގައި އިޒްރޭލުން ހޯމަ ދުވަހުގެ ރޭ ދިން ބޮމުގެ ހަމަލާގައި މަރުވި މީހުންގެ ޖަނާޒާގައި އަންހެނުންތަކެއް ހިތާމަފާޅުކުރަނީ - 25 މާޗް 2025
އިސްރާއީލުން ޣައްޒާއަށް ދިން ހަމަލާތަކުގައި ފަލަސްތީނުގެ 23 މީހުން ޝަހީދުވެފައިވާ ކަމަށް އެގައުމުގެ ސިއްހީ އޮފިޝަލުން ބުނެފި އެވެ.
އިސްރާއީލުގެ އަސްކަރިއްޔާއިން މީގެ ހަފުތާއެއްހާ ދުވަސް ކުރިން ޣައްޒާގައި ހަމާސް ޖަމާއަތާ ދެކޮޅަށް އަލުން ހަނގުރާމަ ފަށާފައިވަނީ 2 މަސް ދުވަސް ވަންދެން ހަނގުރާމަ ހުއްޓާލުމަށް ފަހުގައެެވެ. އޭގެ ފަހުން މިހާތަނަށް ގާތްގަނޑަކަށް 700 އެއްހާ މީހުން މަރުވެފައިވާ ކަމަށާއި އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށް ފަލަސްތީނުގެ ސިއްހީ އޮފިޝަލުން ބުނެ އެވެ.
ގާތްގަނޑަކަށް 18 މަސް ދުވަހުގެ ހަނގުރާމައިގެ ތެރޭގައި ޣައްޒާގެ 2.3 މިލިއަން އާބާދީގެ ބޮޑު ބައެއް އެތައް ފަހަރެއްގެ މަތިން ހަނގުރާމައިގެ ސަބަބުން ގެދޮރު ގެއްލިފައިވާއިރު، މިމަހުގެ ކުރީކޮޅު އިސްރާއީލުން އެހީ ފޯރުކޮށްދިނުން މެދުކަނޑާލުމާ ގުޅިގެން ކާބޯތަކެއްޗާއި ފެނުގެ ދަތިކަން ވަނީ ވަރަށް ބޮޑަށް ގޯސްވެފައެވެ.
އަންގާރަ ދުވަހު އިސްރާއީލުގެ އަސްކަރިއްޔާއިން ވަނީ އުތުރުގެ ބޯޑަރު ހިމެނޭ ސަރަހައްދުން ރޮކެޓް ހަމަލާތަކެއް އިސްރާއިލަށް ދީފައިވާ ކަމަށް ބުނެ ހުރިހާ އަވަށެއްގައި ދިރިއުޅޭ މީހުން އެ ސަރަހައްދުން ދިއުމަށް އަންގާފައެވެ.
އޭގެ ތެރޭގައި ޣައްޒާ ސިޓީގެ ޖަބަލިއާ، ބެއިތު ލަހިޔާ، ބެއިތް ހަނޫން އަދި ޝެޖާޔާ ހިމެނެ އެވެ. އަދި ދެކުނުގެ ޚާން ޔޫނިސް އާއި ރަފަހުގެ ސަރަހައްދުތަކަށް ވެސް މި އެންގުން އަންގާފައިވެއެވެ.
ޣައްޒާގެ ރެފިއުޖީ ކޭމްޕްތަކުގެ ތެރެއިން އެންމެ ބޮޑު ކޭމްޕް ކަމަށްވާ ޖަބާލިއާގެ ރައްޔިތުންނަށް އަސްކަރިއްޔާއިން ނެރުނު އަމުރުގައި ބުނެފައި ވަނީ ރައްކާތެރިކަމަށްޓަކައި ވަގުތުން ދެކުނުގައި ހުރި ހިޔާތަކަށް ބަދަލުވުމަށެވެ.
ފަލަސްތީނާއި އދގެ އޮފިޝަލުން ބުނަނީ ޣައްޒާގައި ރައްކާތެރި ސަރަހައްދެއް ނެތް ކަމަށެވެ. އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ ޣައްޒާގައި ހަމާސް ޖަމާއަތުން ބާކީ ތިބި 59 މީހުން ދޫކޮށްލުމަށް ހަމާސްއަށް ޕްރެޝަރު ކުރުމުގެ ގޮތުން އަނެއްކާވެސް ހަމަލާތައް ދޭން ފަށާފައިވާ ކަމަށެވެ. އޭގެ ތެރެއިން ގާތްގަނޑަކަށް 24 މީހުން އަދިވެސް ދިރިތިބި ކަމަށް ބެލެވެ އެވެ.
ޖެނުއަރީ 19 ވަނަ ދުވަހު އިސްރާއީލުން ހަނގުރާމަ ހުއްޓާލުމުގެ އެއްބަސްވުމާއި ހިލާފުވި ކަމަށް ހަމާސް ޖަމާއަތުން ބުނެފައިވާއިރު، ގަތަރާއި މިސްރާއި އެމެރިކާ އިން މެދުވެރިވެގެން ކުރިއަށް ގެންދާ އާ މަސައްކަތަށް އެއްބާރުލުން ދެމުން ދަނީ ހަމަޖެހުން ގާއިމުކޮށް ތިން މަރުހަލާގެ ހަނގުރާމަ ހުއްޓާލުމުގެ އެއްބަސްވުން ނިމުމަކަށް ގެނައުމަށް ކަމަށް ހަމާސްއިން ބުނެއެވެ.
ހަމާސްގެ ބައެއް މަސްދަރުތަކުން ބުނާ ގޮތުގައި މިހާތަނަށް އެއްވެސް ކާމިޔާބީއެއް ހޯދިފައެއް ނުވެއެވެ.
