މިޤައުމުގައި ދިރިއުޅެނީ އަޅުންކަމަށް ސަރުކާރުން ދެކިގެންނުވާނެ: އަހުމަދު އަބުދުﷲ
ރައްޔިތުން ޖަވާބުދޭ ދުވަހަކީ އެހާ ހިތްގައިމު ދުވަހަކަށް ނުވާނެ
އަހުމަދު އަބްދުﷲ
ސަރުކާރުގެ ވެރިން ހިތުހުރިކަމެއް ހިތުހުރި ގޮތަކަށް ކުރަމުންދާއިރު މިޤައުމުގައި ދިރިއުޅެނީ އަޅުންކަމަށް ދެކިގެން ނުވާނެ ކަމަށް އެމްޑީޕީގެ ޗެއަރޕާޝަންގެ ނައިބު އަހުމަދު އަބުދުﷲ ވިދާޅުވެއްޖެއެވެ.
އޭނާ އެހެން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުންނެވެ.
އަހުމަދު ވިދާޅުވީ މިއަދު ފެންނަ މަންޒަރަކީ ރައްޔިތުން އަޅުންނަށް ހަދަން ސަރުކާރުން މަސައްކަތްކުރާ މަންޒަރު ކަމަށެވެ. އަދި ވަޒީރުން ވެސް ރައީސް މުޢިއްޒަށް ވުރެ ކުރިން ސޯޝަލްމީޑިއާގައި ސިޔާސަތެއް ހާމަނުކުރެއްވޭ ވަރަށް އަޅުންނަށް ބަދަލުކުރާ މަންޒަރު ފެންނަ ކަމަށް ވިދާޅުވިއެވެ. ރައީސް މުޢިއްޒަށް ވުރެކުރިން ސޯޝަލްމީޑިއާގައި ކަމެއް ހާމަކުރައްވާ ވަޒީރުންނަށް ޖެހިވަޑައިގަންނަވަނީ އެހާމަކުރެއްވި އެއްޗެއް ޑިލީޓްކުރައްވަން ކަމަށް އަހުމަދު ވިދާޅުވިއެވެ.
އަޅުންގެ ޒަމާނަކަށް ދިވެހިން ރުހިގެން ނުތިބޭނެ ކަމަށް އަހުމަދު ވިދާޅުވިއެވެ. ދުނިޔޭގެ އެހެން ޤައުމުތަކުން ވެސް އެކަން ފެނިފައި ހުރި ކަމަށް އަހުމަދު ވިދާޅުވިއެވެ. އެހެން ކަމުން ރާއްޖޭގައި ދިވެހިން ނިކުމެ ޖަވާބުދޭނެ ދުވަހެއް އަންނާނެ ކަމަށް އޭނާ ވިދާޅުވިއެވެ.
އަހުމަދު ވިދާޅުވީ ބޭއިންސާފު އަނިޔާވެރި ސަރުކާރަކަށް ރައްޔިތުން ޖަވާބުދޭ ދުވަހަކީ ސަރުކާރު ހިންގަންތިބި ވެރިންނަށް އެހާ ހިތްގައިމު ދުވަހަކަށް ނުވިޔަސް ރައްޔިތުންނަށް އެއީ ވަރަށް މުހިންމު ދުވަހަކަށްވާނެ ކަމަށެވެ.
