އިޢުލާން ކުރުމަކާއި ނުލައި ތެލެސީމިއާ ސެންޓަރަށް ޑިރެކްޓަރ ޖެނެރަލް އެއް އައްޔަން ކޮށްފި
ތެލަސީމިއާ ސެންޓަރުން ދޭ ޚިދުމަތްތަކުގެ ފެންވަރު ދަށްވުމުގެ ސަބަބުން މިދިޔަ ހޮނިހިރު ދުވަހުގެ ރޭ ވަނީ ގިނަ ބަޔަކު އެއްވެ އިހުތިޖާޖު ކޮށްފައި
ތެލަސީމިއާ ސެންޓަރުގެ ޑިރެކްޓަރ ޖެނެރަލް އަކަށް އައްޔަން ކުރެއްވި އަހްމަދު މައުސޫމް
އިއުލާނު ކުރުމާވެސް ނުލައި އޮން އުސޫލުން ބޭރުން މޯލްޑިވިއަން ބްލަޑް ސާރވިސަސް ގެ ޑިރެކްޓަރ ޖެނެރަލް ގެ މަގާމަށް މީހަކު އައްޔަން ކޮށްފިއެވެ. މި މަޤާމް އަކީ ސިވިލްސާރވިސް ގެ މަޤާމް އަކަށް ވާއިރު އޮންނަ އުސޫލުން މީހަކު ހޮވޭނީ އެ މަޤާމް އަށް އިއުލާން ކުރެވި އިންޓަރވިޔު ކުރުމަށް ފަހުގައެވެ.
މޯލްޑިވިއަން ބްލަޑް ސާރވިސަސް ގެ ޑިރެކްޓަރ ޖެނެރަލް ގެ މަޤާމަށް އައްޔަން ކުރީ މީގެ ކުރިން އިންދިރާ ގާންދީ މެމޯރިއަލް ހޮސްޕިޓަލުގައި ވެސް މަސައްކަތް ކުރެއްވި އަހްމަދު މައުސޫމް އެވެ.
ތެލަސީމިއާ ސެންޓަރުން ދޭ ޚިދުމަތްތަކުގެ ފެންވަރު ދަށްވުމުގެ ސަބަބުން މިދިޔަ ހޮނިހިރު ދުވަހުގެ ރޭ ވަނީ ގިނަ ބަޔަކު އެއްވެ އިހުތިޖާޖު ވެސް ކޮށްފައެވެ. ގިނަ ބަޔަކު އެއްވެ ކުރި މި އިހުތިޖާޖަށް ފަހު ރައީސް ޑރ. މުޙައްމަދު މުއިއްޒު އާދިއްތަ ދުވަހު ވަނީ އެ ސެންޓަރަށް ވަޑައިގެން އެ ތަނުގެ ހާލަތު ބައްލަވާ ލައްވައިފައެވެ. އަދި އެއަށް ފަހު ރައީސް ވިދާޅުވީ އެ ސެންޓަރުގައި 2017 ވަނަ އަހަރުން ފެށިގެން ޑިރެކްޓަރ ޖެނެރަލެއް ނެތް ކަމަށެވެ. އަދި ހަމަ މިއާއި އެކު ރައީސް ވަނީ މިހާރުން މިހާރަށް އެތަނުގެ ޚިދުމަތް ރަނގަޅު ކުރަން ގިނަ ފިޔަވަޅުތަކެއް އަޅުއްވާނެ ކަމަށް ވިދާޅުވިއެވެ.
ތެލެސީމިއާ ސެންޓަރަށް ޑީޖީއެއް ނެތްތާ އަށް އަހަރަށް ފަހު އެ މަޤާމަށް އަހްމަދު މައުސޫމް އައްޔަން ކުރެއްވި އިރު، ހެލްތް މިނިސްޓްރީން ހޯމަ ދުވަހު އެކްސްގައި ކުރި ޕޯސްޓެއްގައި ބުނީ މޯލްޑިވިއަން ބްލަޑް ސަރވިސަސް ގެ ޑިރެކްޓަރ ޖެނަރަލް ގެ މަގާމަށް އަލްފާޟިލް އަޙްމަދު މަޢުޞޫމް ހޯމަ ދުވަހު އައްޔަންކޮށްފައިވާ ކަމަށެވެ.
މޯލްޑިވިއަން ބްލަޑް ސަރވިސަސް ގެ ޑިރެކްޓަރ ޖެނަރަލް ގެ މަގާމަށް އަލްފާޟިލް އަޙްމަދު މަޢުޞޫމް މިއަދު ވަނީ އައްޔަންކުރެވިފައެވެހެލްތް މިނިސްޓްރީ
މީގެ އިތުރުން އެ މިނިސްޓްރީން ބުނެފައި ވަނީ ޑެޕިއުޓީ ޑިރެކްޓަރު ޖެނެރަލް އަކާއި ޑިރެކްޓަރުގެ މަގާމަށް ވެސް ދެ ބޭފުޅަކު ވަރަށް އަވަހަށް އެ ސެންޓަރަށް ހަމަޖައްސާނެ ކަމަށެވެ.
ވަރަށް އަވަހަށް ފިޒީޝަނެއް ވެސް ހަމަޖެހިގެންދާނެ ކަމަށާ އެތަނަށް މިވަގުތަށް ބޭނުންވާ ފަސް ނަރުހުން ހޯދުމަށް ވެސް ހޯމަ ދުވަހު އިއުލާނު ކޮށްފައިވާ ކަމަށާއި އަދި އެހެނިހެން އިދާރީ މުވައްޒަފުންވެސް ހަމަޖެއްސުމުގެ މަސައްކަތް ކުރަމުންދާ ކަމަށް ހެލްތް މިިނިސްޓްރީން ވަނީ ބުނެފަ އެވެ.
ތެލަސީމިއާ ކުދިންނަށް ދެވޭ ފަރުވާ އަދި ޚިދުމަތް ރަނގަޅު ކުރުމަށްޓަކައި ތެލަސީމިއާ ސެންޓަރު ހޮސްޕިޓަލެއްގެ ގޮތުގައި ހިންގަން ބޭނުންވާ ކަންކަން ފަހިކޮށް އެ ސެންޓަރުގެ ހުރި މައްސަލަތައް ވަކި މުއްދަތެއްގެ ކުރިން ޙައްލުކުރުމަށް ރައީސް ވަނީ ނިންމަވާފައެވެ.
އަދި ތެލަސީމިއާ ކުދިންނަށާއި، ސެންޓަރުގެ ދަތިތައް ހައްލުކުރެއްވުމުގެ މަސައްކަތް ސީދާ ރައީސުލްޖުމްހޫރިއްޔާގެ ބެއްލެވުމުގެދަށުން ކުރިއަށްގެންދިއުމަށް ވެސް ވަނީ ނިންމަވާފަ އެވެ.
