ސަރުކާރުގެ ނިންމުން އަދީބު ސިފަ ކުރައްވަނީ ޙުކުމަކާއި ނުލައި މަރާލުން ގޮތުގައި: ވަކީލު
އަދީބު ވިދާޅުވީ އަދީބަކީ ކާކުކަމާއި ފިއްލަވާނެ ބޭފުޅެއް ނޫންކަން އަނިލްއަށް އެނގިވަޑައިގަންނަވާނެ ކަމަށް
އަދީބުގެ ވަކީލް މަހްފޫޒް، 60 މިނެޓްގައި އިންޓަރވިއު ދެއްވަނީ
ސަރުކާރުން ޕްރެސް ކޮންފަރެންސެއް ބާއްވައި، ހާމަކުރެއްވި ހާމަކުރެއްވުންތައް ކުރީގެ ނައިބު ރައީސް އަޙުމަދު އަދީބު ސިފަ ކުރައްވަނީ ޙުކުމަކާ ނުލައި މަރާލުމުގެ ގޮތުގައިކަމަށް އަދީބުގެ ޤާނޫނީ ވަކީލް މަހްފޫޒް ސައީދު ވިދާޅުވެއްޖެއެވެ.
މަހްފޫޒް މިހެން ވިދާޅުވީ ރާއްޖެ ޓީވީގެ ފަސްދޮޅަސް މިނެޓަށް ދެއްވި ޚާއްޞަ އިންޓަރވިއުއެއްގައެވެ.
މަހްފޫޒް ވިދާޅުވީ ޕްރެސް ކޮންފަރެންސްގެ މައުލޫމާތު އަންގާރަ ދުވަހު އަހުމަދު އަދީބާއި ހިއްސާ ކުރެއްވި ކަމަށާއި އެވާހަކަތަކާއި ގުޅިގެން އަދީބު އެކަން ސިފަ ކުރެއްވީ ޙުކުމަކާއި ނުލައި ޖަލުގައި ބާއްވައިގެން ސަރުކާރުން އޭނާ މަރާލުމަށް މަސައްކަތް ކުރުން ގޮތުގައިކަމަށެވެ.
އަދީބު ވިދާޅުވިކަމަށް މަހްފޫޒް ވިދާޅުވީ އަދީބަކީ ބަންޑާރަ ނައިބު އަނިލްއާ ވަރަށް ގާތް ގުޅުމެއް އޮންނަ ބޭފުޅެއް ކަމަށާއި އަދީބަކީ ކާކުކަން ވަރަށް ރަނގަޅަށް އަނިލްއަށް އެނގިވަޑައިގަންނަވާނެ ކަމަށެވެ.
އަދީބު އެކަން ސިފަ ކުރައްވަނީ ޙުކުމަކާ ނުލައި މަރާލުމަށް ކުރާ މަސައްކަތެއްގެ ގޮތުގައި. އަދީބު ޖަލުގައި އޮންނެވީ ކުށްތަކެއްގެ ސަބަބުން ޙުކުމެއް ތަންފީޒް ކުރުން ކަމަށް. އެހެންނަމަވެސް ބޭސްފަރުވާ ނުދީ ޖަލުގައި މަރުވާން ދޫކޮށްލުން ކަމަށް އަދީބު ސިފަ ކުރައްވަނީ. އަދީބު ވިދާޅުވީ އަނިލްއަށް އެނގިވަޑައިގަންނަވާނެޔޭ، އަދީބަކީ ކާކުކަން. ފިއްލަވައިގެންދާނެ ބޭފުޅެއް ނޫންކަން. އަދި އަނިލްގެ ވާހަކައަށް ވަރަށް ވަރުގަދައަށް ރައްދުވެސް ދެވޭނެކަން އަނިލްއަށް އެނގިވަޑައިގަންނަވާނެކަން
މަހްފޫޒް ވިދާޅުވީ އަދީބު ބޭސްފަރުވާއަށް ރާއްޖެއިން ބޭރަށް ފޮނުވުމާމެދު ސަރުކާރުން ގޮތެއް ނިންމެވިކަމަށް ޤަބޫލު ނުކުރައްވާ ކަމަށާއި ސަބަބަކީ ރާއްޖޭގެ ޤާނޫން އަސާސީއާއި ޤާނޫނުތަކަށް ބަލާއިރު އަދީބު ބޭރަށް ފޮނުވޭނެކަން ނުވަތަ ނޫންކަން ޓުއަރިޒަމް މިނިސްޓަރާއި ބަންޑާރަނައިބަށް ނުނިންމެވޭނެ ކަމަށެވެ. އަދި ޖަލުގައި ޙުކުމް ތަންފީޒް ކުރަމުންދާ ގައިދީއަކަށް ލިބިދޭންޖެހޭ ބޭސްފަރުވާގެ ހައްޤު ދިނުމާމެދު ސަރުކާރަކަށް ސިޔާސީ ނިންމެވުމެއް ނުނިންމެވޭނެކަމަށް މަހްފޫޒް ވިދާޅުވިއެވެ.
"އަދީބު ބޭރަށް ފޮނުވުމާމެދު ސަރުކާރުން ގޮތެއް ނިންމެވީ ކަމަކަށް ނުދެކެން. ދެބޭފުޅަކު ވިދާޅުވެއްޖެ އަދީބު ފިލާފާނެތީ ބޭރަށް ނުފޮނުވޭނެ ކަމަށް. އަދީބަކީ ޖަލެއްގައި ޙުކުމް ތަންފީޒް ކުރަމުންދާ ބޭފުޅެއް. އަދީބުގެ ބޭސްފަރުވާގެ ކަންކަމާމެދު ގޮތެއް ނިންމުމުގެ ހައިސިއްޔަތު ލިބެނީ މޯލްޑިވްސް ކަރެކްޝަނަލް ސަރވިސްއަށް. އަޅުގަނޑުމެން ވާނީ ޤާނޫނުގައި ކަނޑައަޅާފައިވާ އިޖުރާއަތުގެ ތެރެއިން އަދީބު ބޭސްފަރުވާއަށް ރާއްޖެއިން ބޭރަށް ފުރޭނެ އިންތިޒާމް ހަމަޖައްސައިދިނުމަށް މޯލްޑިވސް ކަރެކްޝަނަލް ސަރވިސްގަ އެދިފަ. އަދީބު ވާނީ ކަރެކްޝަނަލް ސަރވިސް މެދުވެރިކޮށް ޑޮކްޓަރަށް ދައްކާފައި. ޑޮކްޓަރުން އެބަވޭ އަދީބުގެ ބައްޔަކީ ރާއްޖެއިން ފަރުވާކުރެވޭނެ ބައްޔެއް ނޫންކަން ރާއްޖެއިން ބޭރަށް ފުރަން ޖެހޭކަން ވިދާޅުވެފަ. ދެން ޤާނޫން ބުނާ ގޮތުން ގޮތެއް ނިންމެނީ ކަރެކްޝަންގެ މެޑިކަލް ބޯޑަށް. އެ އިޖުރާއަތު ބައިޕާސް ކުރައްވާ އަނިލްއާ ޒަމީރަކަށް ގޮތެއް ނުނިންމޭނެ" ޤާނޫނީ ވަކީލް މަހްފޫޒް ވިދާޅުވިއެވެ.
