ސަރުކާރުގެ ބޮޑު ޕްރޮޖެކްޓަކަށް އޭޓީއެމްތަކާއި ރަސްމާދޫ އެންޓަނާ

ވެރިކަމަށް އަންނަންވެސް ލައްކަ ފޮނި ކެނޑިއެވެ. ފައިސާ ލިބޭނެ ކޮޅުކޮޅާއި ފައިސާ ދޭނެ ގައުމުތައް ހަމަޖެހި ނިމިފައި އޮތްވާހަކައެވެ.

ވެރިކަމަށް އައުމަށްފަހު ގައުމުތަކަށް ވަޒީރުންތައް ފޮނުއްވިއެވެ. އެތައް މިލިއަން ރުފިޔާއެއް ހޭދަކޮށްގެންނެވެ. ނާށިގަނޑެއްގެ ގޮތުގައި ސިޓީބިޓީތައް ދީފައި ސަލާން ޖަހާށެވެ. ދޭނެކަމަށްބުނެ ފޮނިކެނޑި ފައިސާތައް ބަލައެވެ.

އޭގެތެރެއިން އެއްވަޒީރަކު ވަޑައިގެންނެވީ ޗައިނާއަށެވެ. ވަޑައިގެންގޮތައް ރައީސް މުއިއްޒުގާތު ވިދާޅުވިކަމަށްވަނީ 800 މިލިއަން ޑޮލަރުދޭން އެމީހުން އެއްބަސްވިކަމަށެވެ. ހުރިހާކަމެއް ހުރީ ހަމަޖެހި ނިމިފައިކަމަށެވެ. އިސާހިތަކު ރައީސުލް ޖުމްހޫރިއްޔާގެ ހައްޓަކުވެސް ހެޔެއް ނެތެވެ. ވީ އުފަލުން ޗައިނާއާ ދެކޮޅު އިންޑިއާއަށް ރަތްމަހަކަށް ނުގޮވާ ވަރަށް އެއްޗެހި ގޮވައިގަތެވެ. ބުލީ ނުކުރުމަށް އިންޒާރު ދެއްވިއެވެ. ގައުމެއްގެ ބެކްޔާޑްގައި އޮންނަ ބަޔަކަށް ރާއްޖެ ނުވާނެކަމަށް ވިދާޅުވެ މޭފުޅު ފުއްޕާފައި ހަރުކަށި ބަސްފުޅު ވިދާޅުވިއެވެ. ރައީސަކު އެހެން ގައުމެއްގެ ވެރިއަކަށް ވިދާޅުވާން ނުވާވަރަށް އެއްޗެހި ވިދާޅުވިއެވެ.

އެވިދާޅުވާ ނަގުދު ރުފިޔާ 800 މިލިއަން ޑޮލަރު އެއީ މިތާ ހިންގާ ޕްރޮޖެކްޓްތަކެއްކަމަށްވެ އެއިން ލޯ ލާރިއެއްވެސް އަތަށް ލިބޭގޮތެއް ނުވިއެވެ. އާޚިރުގައި އިންޑިއާގެ ފައިބުޑަށްވެއްޓި ޖެހިސަލާމުގެ ވާހަކަ އިތުރަކަށް ނަގަނަގައިގެން ދައްކާކަށް މަށަކުވާ ނެތީމެވެ.

އޭގެ ފަހެވެ. އިކޮނޮމިކް މިނިސްޓަރ ސައީދު އިއުލާން ކުރެއްވީ މާސިންގާ ބޮޑު ޕްރޮޖެކްޓެކެވެ. މީހުން އަޅައިގަންނަ ޒާތުގެ މޮޅެތި އިގްތިސޯދީ ބަސްތައް ބޭނުން ކުރައްވައިގެން އެކެނޑުއްވި ފޮނި ނިންމަވާލެއްވީ 400 މިލިއަން ޑޮލަރު އެކަމުން ލިބޭނެ ކަމަށް އަޑަށް ބާރުލައްވާފައި ވިދާޅުވަމުންނެވެ. މުޅި ސަރުކާރު ހއ އަތޮޅަށްގޮސް ބޮޑުސިންގާ މަންޒަރެއް ދައްކާފައި ފެށި ބަންކަރިން ދިޔައީ ޗޮކުންނެވެ. 400 މިލިއަން ޑޮލަރުގެ ރާގު ބަދަލުވެ ހާހެއްހާ ޑޮލަރު ލިބުނަސް އޯކޭތާއޭ ވިދާޅުވެ ކުރިން ގޮވުނު ނަދުރުތަކުން ބޯދަމައިގަތެވެ. ބަންކަރިންނަށް ގެންދިޔަ ބޯޓަށް ވީގޮތާއި ބާޖް މިހާރު އޮތްތަނާ ތުރާކުނު ގޮނޑުދޮށުގައި ފެންބާޖުގެ ވާ އައްސަން ޖެހި ކަޑައިގެ ވާކަވެސް ތަކުރާރުކުރާކަށް ނެތީމެވެ. ކުޅުދުއްފުށިން ފެންއުފުލި ކަޅުހަންތަކުގެ ވާހަކަވެސް އަމުދުން ދެއްކުމުގެ ބޭނުމެއްނެތެވެ.

ޑިވެލޮޕްމަންޓް ބޭންކަކުން މުޅި އިގްތިސާދު އާ ހަރުފަތަކަށް ގެންދާނެ ކަމާއި އެއީ މަހާ ޕްރޮޖެކްޓެއްކަމަށްވެސް އިއުލާން ކުރިއެވެ. ވީގޮތް އެނގޭ ނޫންހެއްޔެވެ. އަދިއަދަށް އެތަނުންދިން ޚިދުމަތެއް ލޯނު ލިބުނު މީހެއް މި އުޑުބަޅުކުރި ހިސާބަކު ނެތެވެ. ނުވިތާކަށް އެކަންނުވެ އެކަމަށް އެތައް ލައްކަ ޑޮލަރެއް މުސާރައަށް ދީފައި ގެނެސްހުރި ސީއީއޯވެސް އެދިޔައީ އެކަން ނުވިކަމަށް ހަދާފައި އިސްތިއުފާ ދީފައި ފުރައިގެންނެވެ. ދެން އެވާހަކަވެސް އިތުރަކަށް ދެއްކުމުގެ ބޭނުމެއް އެބައޮތް ހެއްޔެވެ.

ކުރުގޮތަކަށް ބުނަންޏާ ކެނޑި ފޮންޏާ ސަޅި ބައިސާތަކުން އައި ބިޔަ ޕްރޮޖެކްޓެއް ކީއްކުރަން ހެއްޔެވެ. އާދައިގެ ކުޑަ ޕްރޮޖެކްޓްގަނޑެއްވެސް މި ފަސްގަނޑަކުން ނުފެނުނެވެ. މައްޗަށް އެރިޔަނުދީ ހިފަހައްޓައިގެންތިބި ޑޮލަރުގެ އަގުވެސް ހަމަ މައްޗަށެވެ. ތަކެތީގެ އަގުވީ އިންތިހާއަށް ބޮޑެވެ. އެންމެފަހުން ހަދާނެ ނުހަދާނެ އެއްޗެއް ނޭނގި ރޯމަހެއްހެއް ތެޅިފޮޅެމުންދަނިކޮށް ލޮލުގައި އަޅައިގަތީ ހަމަގައިމުވެސް ލޯމައްޗަށް ދައްކާލެވޭނޭ ބިޔަބޮޑު ޕްރޮޖެކްޓެކެވެ. މާ ބޮޑު މަސައްކަތަކާ ނުލައި ހާމަކޮށްލައި ހެދޭނެ މާސިންގާ ޕްރޮޖެކްޓެކެވެ. ފޮޓޯނަގާލައި ސޯޝަލް މީޑިއާގައި ޕޯސްޓްކޮށް ހަދަމުން އެދަނީ އެ ބޮޑު ޕްރޮޖެކްޓެވެ. ބޭންކްތަކުން އެމީހުންގެ ބޭނުމަށް ރަށްރަށުގައި ބަހައްޓަމުންދާ އޭޓީއެމްތަކެވެ.

ހީނހީނ ހަލާކުވެދާނެއެވެ. މިރޯދަ މަހު ރޯދަކުރުކުރަން ޖޯކަކަށްވެސް ކިޔާކަށް ކަމަކު ނުދެއެވެ. ނާފަހެ އެއޭޓީއެމް ތަކަކީ އެބޭންކުތަކުގެ ކުރިއެރުމަށް އެމީހުންވެސް ރާވާފައި ހުންނަ ކަންކަމެވެ. ދިރާގާއި އުރީދޫން އެމީހުންގެ ނެޓްވޯކް ރަނގަޅުކުރަން ޖަހާ އެންޓަނާހެންނެވެ. ރަށެއްގައި އޭޓީއެމްއެއް ބަހައްޓައިގެން މާ ފުންނާބުއުސް އިގްތިސޯދީ ވަޒީރަކު ފޮޓޯއާއެކު އެކްސްގައި ޕޯސްޓްކުރިއަސް އޭޓީއެމްއެއް ބެހެއްޓުން އެއީ މިހާރު ހަބަރެއްގެ ގޮތުގައިވެސް ކަވަރ ކުރާވަރުގެ ވާހަކައެއް ނޫނެވެ. ބޭންކްތަކުން އެމީހުންގެ ކުރިއެރުމަށް ބަހައްޓާ އޭޓީއެމްތަކަކީ މި ސަރުކާރުގެ ބިޔަ ބޮޑު ޕްރޮޖެކްޓެއްގެ ގޮތުގައި ދެކި ތިޔަވަރުގެ ފޮންޏެއް ކަނޑަންޏާ ރަސްމާދޫ އެންޓަނާއާއި މާލޭގެ އުސްއިމާރާތްތަކުގެ މަތީގައި ޖަހާފައި ހުންނަ އެންޓަނާތަކުގެ ދޮށުގައި ހުއްޓިހުރެ ފޮޓޯނަގައިގެންވެސް ޕޯސްޓްކޮށްލާށެވެ. އެއީވެސް ބޮޑެތި ބިޔަ ޕްރޮޖެކްޓްތަކެވެ. މަވާ ސަލާމެވެ.