"ޚިދުމަތް ނުފެށި އުޅެނިކޮށް ޑީބީއެމްގެ ސީއީއޯ އިސްތިއުފާދެއްވުމުން އެނގެނީ ސަރުކާރުގެ ހިންގުންތެރިކަމެއް ނެތް މިންވަރު"
ޑިވެލޮޕްމެންޓް ބެންކް އޮފް މޯލްޑިވްސްގެ އޮފީސް ހުޅުވާފައި ވަނީ ސަރުކާރަށް އަހަރެއް ފުރުމާ ދިމާކޮށް
ކުރީގެ ފިނޭންސް މިނިސްޓަރ އިބްރާހިމް އަމީރު
ޑިވެލޮޕްމެންޓް ބެންކް އޮފް މޯލްޑިވްސް (ޑީބީއެމް) ގެ ޚިދުމަތް ނުފެށި އުޅެނިކޮށް މެނޭޖިން ޑިރެކްޓަރު އަދި ސީއީއޯ ގެ މަގާމުގައި ހުންނެވި ނޮއެލް ގްރެގާ ޕެޓަސަން-ޖޯންސް މަޤާމުން އިސްތިއުފާދެއްވުމުން ފެންނަނީ ހިންގުންތެރިކަމެއް ނެތް މިންވަރު ކަމަށް ކުރީގެ ފިނޭންސް މިނިސްޓަރ އިބްރާޙިމް އަމީރު ވިދާޅުވެއްޖެ އެވެ.
އަމީރު އެފަދައިން ވިދާޅުވީ އޭނާ އެކްސްގައި ކުރެއްވި ޕޯސްޓެއްގަ އެވެ.
މީގެ އަހަރެއްހާ ދުވަސް ކުރިން ސަރުކާރުން ޑިވެލޮޕްމެންޓް ބެންކް އޮފް މޯލްޑިވްސް ލޯންޗްކޮށްފައިވާ އިރު އޭގެ ފަހުން އެތަނަށް ޗެއާރމަން އަކާއި ސީއީއޯ ހޯދި ކަމަށާއި، ސްޓާފުން ވެސް ހޯދާފައިވާ ކަމަށް އަމީރު ވިދާޅުވި އެވެ. އަދި ޑިވެލޮޕްމެންޓް ބޭންކް އޮފް މޯލްޑިވްސްގެ އޮފީސް ގާއިމްކޮށްފައިވާ ކަމަށް އަމީރު ވިދާޅުވި އެވެ.
އެހެންނަމަވެސް އެ ބޭންކް ޤާއިމްކޮށްގެން އަދިވެސް އެއްވެސް ކަމެއް ނުކުރެވޭއިރު، އެ ދާއިރާގެ ދޮރުތައް ހުރީ ބަންދުކޮށް ކަމަށް އަމީރު ވިދާޅުވި އެވެ. އަދި މިހާތަނަށް ވެސް ސީއީއޯއަށް މަހަކު 28 ހާސް ޑޮލަރަށް ވުރެ ގިނަ ޑޮލަރު (5 ލައްކަ ރުފިޔާ) މުސާރައިގެ ގޮތުގައި ދެމުން އައިސްފައިވާ ކަމަށް އަމީރު ފާހަގަކުރެއްވި އެވެ. އަދި މިހާރު ސީއީއޯ އިސްތިއުފާ ދެއްވާފައިވާކަން އޭނާ ފާހަގަކުރެއްވި އެވެ.
އަމީރު ވަނީ ސީއީއޯ އިސްތިއުފާދެއްވީ އެ މަޤާމުގައި ހުރެ ކުރި މަސައްކަތެއް ނެތި މަޤާމުގެ ހުރިހާ ފައިދާއެއް ލިބިގަތުމަށްފަހުގައި ކަމަށެވެ. އެ ހުރިހާ ފައިދާ އެއް ހޯދުމަށް ފަހު އޭނާ އަށް ފަސޭހަ ކަމާއި އެކު އެ ކުންފުންޏާއި ދުރަށް ހިނގައިގަނެވޭތީ އަމީރު އެކަމާއި މެދު ކަންބޮޑުވުން ފާޅުކުރެއްވި އެވެ.
އަމީރު ވިދާޅުވީ ފެށުނީއްސުރެ މި މަޝްރޫޢުގެ ކަންކަން ހިނގަމުން ދިޔައީ މާޔޫސްވާ ގޮތަށް ކަމަށެވެ. އަދި ކުރިން ވެސް މި މަޝްރޫޢު ކާމިޔާބު ނުވާނެ ކަމަށް ބެލެވުނު ކަމަށް އަމީރު ވިދާޅުވި އެވެ. އެހެންކަމުން މިއީ ގޯސް މެނޭޖްމަންޓާއި ނާގާބިލްކަމުގެ ފާޅުކަން ބޮޑު ރަމްޒެއް ކަމަށް އަމީރު ވިދާޅުވި އެވެ.
އާދިއްތަ ދުވަހު ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑް (ޕީސީބީ) އިން ކުރި ޕޯސްޓެއްގައި ޑީބީއެމްގެ ސީއީއޯ އަދި އެމްޑީ އިސްތިއުފާ ދެއްވުމަށް ހުށަހަޅުއްވާފައިވާތީ އެކަން ޤަބޫލުކޮށް އޭނާ މަޤާމުން ވަކިކޮށްފައިވާ ކަމަށެވެ.
މި މަގާމަށް ނޮއެލް އައްޔަންކޮށްފައި ވަނީ މިދިޔަ އަހަރުގެ އޮގަސްޓް މަހުގެ ތެރޭގަ އެވެ. އިނގިރޭސިވިލާތަށް ނިސްބަތްވާ ނޮއޮލް އަކީ ދެކުނު އެފްރިކާގެ ކޭޕް ޓައުން ޔުނިވާސިޓީން ޑިގްރީ ހާސިލްކޮށް، އޮކްސްފޯޑް ޔުނިވާސިޓީން މާސްޓާސް ހާސިލްކޮށްފައިވާ ފަރާތެކެވެ. އޭނާއަކީ 28 އަހަރު ބެންކިން ދާއިރާގައި މަސައްކަތް ކުރައްވާފައިވާ ފަރާތެކެވެ.
ޑިވެލޮޕްމެންޓް ބޭންކް އޮފް މޯލްޑިވްސްގެ އޮފީސް ހުޅުވާފައި ވަނީ ސަރުކާރަށް އަހަރެއް ފުރުމާ ދިމާކޮށެވެ. ނަމަވެސް އެތަނުން އެއްވެސް ޚިދުމަތެއް ދޭން ފެށިފައެއް ނުވެ އެވެ.
