"ޝަމްވީލްގެ ޕޯސްޓްމޯޓަމް ހަދަން އާއިލާ އިން ބޭނުމެއް ނޫން، ބޭނުމީ ޖަނާޒާގެ ކަންކަން އަވަސް ކުރެވޭނެ ގޮތެއް ހަމަޖައްސަދިނުން"
އާއިލާ އިން ވަނީ އޭނާ މީގެ ކުރިން ދަން ޖެހެން އުޅުނު ކަމަށް އިތުބާރު ހުރި މަސްދަރަކުން އެނގިފައިވާ ކަމަށް ބުނެފަ
މާފުށީ ޖަލުގެ ބޭރުން ނަގާފައިވާ ފޮޓޯ އެއް
މާފުށީ ޖަލުގައި ދަންޖެހިފައި ހުއްޓާ ފެނުނު ސ. މަރަދޫ / ފޯ ފްލާވަރ އިބްރާހިމް ޝަމްވީލް (23 އަހަރު)ގެ ޕޯސްޓްމޯޓަމް ހަދަން އާއިލާ އިން ބޭނުން ނުވާ ކަމަށް އޭނާގެ އާއިލާ އިން ބުނެފިއެވެ.
ކަރެކްޝަންސް އިން ބުނީ، 23 މާރޗް ވީ އާދިއްތަ ދުވަހު ހަވީރު 4:20 ހާއިރު އިބްރާހިމް ޝަމްވީލް ގޮޅީގައި ދަންޖެހިފައި ހުއްޓާ ފެނިފައިވާ ކަމަށެވެ. އަދި އޭނާ ވަގުތުން މާފުށީ ހޮސްޕިޓަލަށް ގެންގޮސްފައިވާ ކަމަށް ކަރެކްޝަންސް އިން ވަނީ ބުނެފައެވެ. އާދިއްތަ ދުވަހުގެ 4:55 ގައި އިބްރާހިމް ޝަމްވީލް ނިޔާވެފައިވާކަމަށް ޑޮކްޓަރު ކަނޑައަޅާފައިވާ ކަމަށް ވެސް ކަރެކްޝަންސް އިން ވަނީ ބުނެފައެވެ.
ޝަމްވީލްގެ ހަށިގަނޑު މިހާރު މާލެ ގެނެސްފައިވާއިރު އޭނާގެ އާއިލާގެ ފަރާތުން ރާއްޖެއެމްވީ އަށް މައުލޫމާތުދެމުން ބުނީ ޝަމްވީލް އަކީ ނަފްސާނީ މައްސަލަ ހުންނަ މީހެއް ކަމަށެވެ. އެކަން އޭނާ އަށް ޙުކުމް ކުރި އިރު ވެސް ކަމާއި ބެހޭ ފަރާތްތަކުގެ ސަމާލުކަމަށް ގެނެސްފައިވާނެ ކަމަށް އާއިލާ އިން ވަނީ ބުނެފައެވެ.
އާއިލާ އިން ރާއްޖެ އެމްވީ އަށް މައުލޫމާތު ދެމުން ބުނީ އޭނާ އެކަހެރިކޮށްފައި ބަހައްޓާފައިވާ ކަމަށް މައުލޫމާތު ލިބިފައިވާ ކަމަށާއި އެއީ އޭނާ އާއި މެދު އިހުމާލުވުން ކަމަށް ޤަބޫލު ނުކުރާ ކަމަށެވެ. އެހެންނަމަވެސް އޭނާ އަށް އަނިޔާކޮށްފައިވާ ކަމަށް ނުބެލެވޭ ކަމަށް އާއިލާގެ ފަރާތުން ވަނީ ބުނެފައެވެ.
އާއިލާ އިން އިތުރަށް ބުނެފައި ވަނީ ފުލުހުން ބޭނުން ވަނީ އާއިލާ އިން ބޭނުންވާ ގޮތާއި ޚިލާފަށް ޝަމްވީލްގެ ޕޯސްޓްމޯޓަމް ހަދަން ކަމަށެވެ. އަދި އެއީ މިހާރު ޤާނޫނު އޮންނަ ގޮތުން އަމަލުކުރަން ޖެހޭ ގޮތް ކަމަށް ފުލުހުން އާއިލާ އަށް އަންގާފައިވާ ކަމަށް އެ އާއިލާ އިން ވަނީ މި ނޫހަށް މައުލޫމާތުދެމުން ބުނެފައެވެ.
އެހެންނަމަވެސް އާއިލާ އިން ބޭނުމީ ވީހާވެސް އަވަހަށް ޝަމްވީލްގެ ޖަނާޒާ އާއި ވަޅުލުމުގެ ކަންކަން ކުރިއަށް ގެންދަން ކަމަށް އާއިލާ އިން ވަނީ ބުނެފައެވެ.
ޝަމްވީލްގެ ޕޯސްޓްމޯޓަމް ހަދަން އާއިލާ އިން ބޭނުމެއް ނޫން، އެދެނީ އަވަހަށް އޭނާގެ ޖަނާޒާގެ ކަންކަން ކުރެވޭނެ ގޮތެއް ހަމަޖައްސަދިނުން. އެކަމަކު އެ ބޭފުޅުން ވިދާޅުވަނީ މިހާރު ޤާނޫނު އޮތް ގޮތުން އެކަން ކުރަން އެބަ ޖެހެއޭ. އަޅުގަނޑުމެން ބޭނުމެއް ނޫން އެ ގޮތެއް. އޭނާ އާއި މެދު އިހުމާލު ވެއްޖެ އޭނާ އެކަހެރިކޮށްފައި ބަހައްޓައިގެން. އެކަން ބަލާދިނުން އެދެން.އާއިލާގެ މެމްބަރެއް
އާއިލާ އިން ވަނީ އޭނާ މީގެ ކުރިން ދަން ޖެހެން އުޅުނު ކަމަށް އިތުބާރު ހުރި މަސްދަރަކުން އެނގިފައިވާ ކަމަށް ބުނެފައެވެ. ނަމަވެސް އެއިން އެއްވެސް ކަމެއް އާއިލާ އަށް އަންގާފައި ނުވާ ކަމަށް ޝަމްވީލްގެ އާއިލާ އިން ބުނެއެވެ. ޝަމްވީލް އެކަހެރިކޮށްފައިވޭތޯ އާއި މީގެ ކުރިން އޭނާ ދަންޖެހެން މަސައްކަތް ކުރިތޯ ނުވަތަ ނޫންތޯ އަދި ވަނީ ސާފުވާގޮތް ނުވެފައެވެ. އެހެންނަމަވެސް ޝަމްވީލް ދަންޖެހިފައި ހުއްޓާ ފެނުމުން އޮންނަ އުސޫލާއި އެއްގޮތަށް ހުރިހާ އިދާރާއަކަށް އަންގާފައި ވާނެ ކަމަށް ކަރެކްޝަންސް އިން ވަނީ ބުނެފައެވެ.
