ރޮނާލްޑޯ ބޭނުން ވަނީ ޕޯޗުގަލް މޮޅުވާން!

ޔުއެފާ ނޭޝަންސް ލީގުގެ ދެ ވަނަ ލެގުގައި ޑެންމާކާ ދެކޮޅަށް ނިކުންނައިރު، މުހިންމީ އޭނާ ލަނޑު ޖެހުން ނޫން ކަމަށާއި، މުހިންމީ ޕޯޗުގަލް މޮޅުވުން ކަމަށް އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

މި ދެ ޓީމު ބައްދަލު ކުރި ފުރަތަމަ ލެގުގެ މެޗުގައި ޑެންމާކުން ވަނީ 1-0 އިން ޕޯޗުގަލް ބަލިކޮށްފަ އެވެ. އެހެން ކަމުން، ދެ ވަނަ ލެގުގައި ޕޯޗުގަލް އަށް ވަނީ ޑެންމާކު ބަލި ކުރަންް މަޖުބޫރުވެފަ އެވެ.

އެ މެޗުގެ ކުރިން ވާހަކަ ދައްކަމުން ރޮނާލްޑޯ ބުނީ، މުހިންމީ އޭނާ ލަނޑުތަކެއް ޖެހުން ކަމަށާއި، އޭނާ އަށް ލަނޑު ޖެހުން މުހިންމު ނޫން ކަމަށެވެ. އޭގެ ބަދަލުގައި، އޭނާ ހަމައެކަނި ބޭނުން ވަނީ ޕޯޗުގަލް މޮޅުވާންކަން ފާހަގަކޮށް ރޮނާލްޑޯ ބުނީ، އޭނާ އަށް މުހިންމީ ޓީމު ކަމަށެވެ.

މީގެ އިތުރުން ރޮނާލްޑޯ ބުނީ، ހަމައެކަނި ފޯކަސް ކުރަނީ އެންމެ ފަހު ވަގުތާ ޖެހެންދެން ވެސް ޕޯޗުގަލް ޤައުމީ ޓީމުގެ ބެޖު ދިފާއު ކުރުމަށް ކަމަށެވެ. ޚާއްސަކޮށް ޑެންމާކާ ދެކޮޅަށް ކުޅޭ ދެ ވަނަ ލެގުން ޕޯޗުގަލް މޮޅުވެ، އެ މެޗުގައި އިތުރު އެހެން ކުޅުންތެރިޔަކު ލަނޑު ޖެހުމަކީ އޭނާ އަށް ލިބޭނެ ބޮޑު އުފަލެއް ކަމަށް ވެސް ރޮނާލްޑޯ ބުންޏެވެ.

އިތުރަށް ވާހަކަ ދައްކަމުން ރޮނާލްޑޯ ބުނީ ދެ ވަނަ ލެގުގެ މެޗު ޕޯޗުގަލް އަށް ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އޭނާ އަށް އޮތް ކަމަށެވެ. ޚާއްސަކޮށް އެ ޓީމުގެ ކޮންމެ ކުޅުންތެރިޔަކު ވެސް ހުރީ މެޗުން މޮޅުވާން ބޭނުންވެފައި ކަމަށާއި، އޭނާ ވެސް ހުރީ އެ އަޒުމުގައި ކަމަށް ރޮނާލްޑޯ ބުންޏެވެ.

ރޮނާލްޑޯ އަކީ ޕޯޗުގަލް ޤައުމީ ޓީމަށް އެންމެ ގިނަ މެޗު ކުޅެދީ، އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. އޭނާ ވަނީ އެ ޓީމަށް ކުޅެދިން 218 މެޗުގައި 135 ލަނޑު ޖަހައިފަ އެވެ. މީގެ އިތުރުން ރޮނާލްޑޯ އަކީ ބައިނަލްއަޤުވާމީ މައިދާނުގައި ވެސް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ.

ޑެންމާކާ ދެކޮޅަށް ޕޯޗުގަލް ކުޅޭ ދެ ވަނަ ލެގުގެ މެޗު އޮންނާނީ އާދީއްތަ ދުވަހުގެ ރޭ ދަންވަރު 12:45 ގައެވެ.