ރަޝިޔާ އިން ދިން ހަމަލާއެއްގައި ޔުކްރެއިންގެ ފަސް މީހަކު މަރުވެއްޖެ

ޔުކްރެއިންގެ އެކި ސަރަހައްދު ތަކަށް ރަޝިޔާ އިން ދިން ހަމަލާ ތަކުގައި، ޔުކްރެއިންގެ ފަސް މީހަކު މަރުވެއްޖެ އެވެ.

ރަޝިޔާ އިން މި ހަމަލާތައް ދީފައި ވަނީ ހުކުރު ދުވަހުގެ ރޭގެ ވަގުތެއްގަ އެވެ. މި ހަމަލާތަކުގައި ފަސް މީހަކު މަރުވެފައިވާއިރު، އެތައް ބަޔަކު ޒަޚަމުވެފައިވާ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ. 

ޔުކްރެއިންފެ ޒަޕޮރިޒިިއާ ސަރަހައްދުގެ ގަވަރުނަރު އިވާން ފެޑޮރޮވް ޓެލެގްރާމްގައި ވިދާޅުވެފައިވާ ގޮތުގަައި، އެ ސިޓީ އަށް ދިހަ ހަމަލާ އަށް ވުރެ ގިނަ ހަމަލާ ދީފައިވެ އެވެ. އެ ހަމަލާތަކުގައި ދެ މީހަކު މަރުވެ، އަށް މީހަކު ޒަޚަމުވެފައިވާ ކަމަށް ބުނެފައިވެ އެވެ. 

މީޑިއާގައި ޝާއިއު ކޮށްފައިވާ ފޮޓޯ ތަކުން ފެންނަ ގޮތުގައި، ސަލާމަތީ ޚިދުމަތް ތަކުން އަންނަނީ ގެއްލުން ލިބިފައިވާ އިމާރާތްތަކުގެ ތެރެއިން މީހުން ސަލާމަތް ކުރުމުގެ މަސައްކަތް ކުރަމުންނެވެ.

ރަޝިޔާއާ އިންވެގެންވާ ސުމީ ސަރަހައްދުގެ ކްރަސްނޮޕިލިއާ ރަށަށް އަމާޒުކޮށް ހަ މިސައިލް ފޮނުވާލާފައިވާއިރު، ދެ މީހަކު މަރުވެ، އިތުރު ދެ މީހަކު ވަނީ ޒަޚަމުވެފައި އެވެ.

މީގެ އިތުރުން އިރުމަތީ ޑޮނެޓްސްކް ސަރަހައްދުގެ ކޮސްޓިއަން ޓިވްކާ ރަށަށް ދިން ހަމަލާއެއްގައި އެކަު މީހަކު މަރުވެފައިވާ ކަމަށް ބުނެފައިވެ އެވެ.

މި ހަފުތާގެ ތެރޭގައި ރަޝިޔާ އިން ބުނެފައިވާ ގޮތުގައި، ރަޝިޔާގެ ރައީސް ވްލަޑިމިއާ ޕުޓިން އަދި އެމެރިކާގެ ރައީސް ޑޮނަލްޑް ޓްރަމްޕް ވަނީ ޔުކްރެއިންގެ ހަކަތައިގެ ވަސީލަތްތަކަށް ހަމަލާ ދިނުން 30 ދުވަހަށް ހުއްޓާލަން އެއްބަސްވެފައި އެވެ.

އެހެން ނަމަވެސް، މިއީ އެމެރިކާ އިން ހުށަހެޅި ފުޅާ ހުއްޓުމަކަށް ވުރެ ކުޑަ އެއްބަސްވުމެކެވެ. ހުއްޓުމަކާ ގުޅޭ އިތުރު މަޝްވަރާތައް ސައުދީ އަރަބިއްޔާ ގައި ކުރިއަށް ގެންދިއުމަށް ވަނީ ހަމަޖެހިފަ އެވެ.