ހޫތީން އިން ފޮނުވާލި މިސައިލެއް އިސްރާއީލް އިން ނައްތާލައިފި

ޔަމަންގެ ހޫތީ ޖަމާއަތުން އިސްރާއީލަށް އަމާޒުކޮށް ފޮނުވާލި މިސައިލް ހަމަލާއެއް ނައްތާލަފައިވާ ކަމަށް، އިސްރާއީލްގެ އަސްކަރިއްޔާ އިން ބުނެފި އެވެ.

އިސްރާއީލްގެ އަސްކަރިއްޔާ އިން ހާމަ ކޮށްފައިވާ ގޮތުގައި އެ ޤައުމުގެ ވެރި ރަށް ތެލް އަވީވްގައި ހުންނަ ބެން ގުއިރަން އެއަރޕޯޓަށް އަމާޒުކޮށް ހޫތީން އިން ފޮނުވާލި ބެލިސްޓިކް މިސައިލް ވަނީ ނައްތާލައިފަ އެވެ. 

މި ހަމަލާ އަކީ ފާއިތުވި 48 ގަޑިއިރުގެ ތެރޭގައި، އިސްރާއީލަށް އަމާޒުކޮށް ހޫތީން އިން ފޮނުވާލި ތިން ވަނަ ހަމަލާ އެވެ. ހޫތީންގެ ސިފައިންގެ ތަރުޖަމާނު ވިދާޅުވެފައިވާ ގޮތުގައި، އެމެރިކާގެ ޔޫއެސްއެސް ހެރީ އެސް ޓްރައުމަށް އުޅަނދަށް ވެސް އެ ޖަމާއަތުން ވަނީ ހަމަލާ ދީފަ އެވެ.

އޭނާ އެހެން ވިދާޅުވި ނަމަވެސް، އެކަމުގެ އެއްވެސް ހެއްކެއް މިހާތަނަށް ނެތް ކަމަށް ބައިނަލްއަޤުވާމީ މީޑިއާ ތަކުގައި ވަނީ ބުނެފަ އެވެ. 

ހޫތީންގެ މިފަދަ ހަމަލާތައް އިތުރުވަމުން ދަނީ ޣައްޒާ ގައި އިސްރާއީލުން ހިންގަމުންދާ ހަމަލާތަކާ ގުޅިގެންނެވެ. އަދި އެމެރިކާ އިން މިދިޔަ މަހު ހޫތީން އަށް ދިން ހަމަލާތަކު ގައި މަދުވެގެން 50 މީހުން މަރުވެފައިވާ ދަނޑިވަޅެއްގަ އެވެ.

ހޫތީން އިން ވަނީ އިސްރާއީލް-ހަމާސް ހަނގުރާމަ ފެށުނީއްސުރެ ވިޔަފާރި އުޅަނދު ފަހަރަށް 100 އަށްވުރެ ގިނަ ހަމަލާ ދީފަ އެވެ. މިކަމުގެ ސަބަބުން ބައިނަލްއަޤުވާމީ ވިޔަފާރި އަށް ބޮޑެތި ހުރަސް ތަކެއް ކުރިމަތިވެފައިވެ އެވެ.