ބެލެސްޓިކް މިސައިލެއް ވަރަށް އަވަހަށް ޓެސްޓްކުރާނެ ކަމަށް ކަމަށް އުތުރު ކޮރެއާއިން ބުނެފި

އުތުރު ކޮރެއާ އިން އިންޓަކޮންޓިނެންޓަލް ބެލިސްޓިކް މިސައިލް (އައިސީބީއެމް) އެއް ޓެސްޓު ކުރަން ވަަރަށް އަވަހަށް ތައްޔާރުވެ ނިމޭނެ ކަމަށް އެ ގައުމުން ހޮނިހިރު ބުނެފިއެވެ.

އެގައުމުގެ ރޫލިން ޕާޓީ ކަމަށްވާ ވޯކާސް ޕާޓީގެ ރަސްމީ ނޫސް ކަމަށްވާ ރޮޑޮންގް ސިންމަން އިން ބުނީ އެންމެ ފަހުން އެގައުމުން ކުރި ހަތިޔާރު ޓެސްޓްތަކަށް ބަލާއިރު އައިސީބީއެމް އެއް ޓެސްޓް ކުރުން، މާ ދުރުނޫން ކަން އެނގި ހާމަވާ ކަމަށެވެ.

މިއަހަރުގެ އާ އަހަރުގެ ތަގުރީރުގައި އުތުރު ކޮރެއާގެ ލީޑާރު ކިމް ޖޮން-އުން ވިދާޅުވީ އައިސީބީއެމްއެއް ތަރައްގީ ކުރުމުގެ ފަހުގެ މަރުހަލާގައި އުތުރު ކޮރެއާ ވާ ކަމަށެވެ.

ރޫލިން ޕާޓީ ކަމަށްވާ ވޯކާސް ޕާޓީގެ ރަސްމީ ނޫސް ކަމަށްވާ ރޮޑޮންގް ސިންމަން އިން ބުނީ މިސައިލް ޓެކްނޮލޮޖީގައި އުތުރު ކޮރެއާ ކުރިއެރުންތައް ހޯދައިފައިވާ ކަމަށެވެ. އިތުރުަށް އެނޫހުން ބުނީ އެގައުމުން ކާމިޔާބުކަމާއެކު އައިސީބީއެމް އެއް ޓެސްޓް ކުރެވުމުން އެމެރިކާ އިން އުތުރު ކޮރެއާ އާއި މެދު ގެންގުޅޭ އުސޫލުތައް ނެތިގެން ދާނެ ކަމަށެވެ. އެމެރިކާ އާއި ބެހޭ ގޮތުން އުތުރު ކޮރެއާ އިން އެ ނޫހުގައި ބުނީ ނިއުކްލިއާ ހަތިޔާރު ހުރި ގައުމަކާ ދެކޮޅަށް ނުވަތަ އައިސީބީއެމް ގެންގުޅޭ ގައުމަކާ ދެކޮޅަށް އަދި ހަނގުރާމައެއް ފަށާފައިނުވާ ކަމަށެވެ.

އުތުރު ކޮރެއާ އިން މި އަހަރު އެތައް މިސައިލެއް ޓެސްޓްކޮށްފައިވާއިރު، ބުރާސްފަތި ދުވަހު ވަނީ ހަަތަރު އެންޓި-ކްރޫޒް މިސައިލްތަކެއް ޓެސްޓްކޮށްފައެވެ. މިއީ އެގައުމުން މި އަހަރުތެރޭގައި ކުރި ދިހަ ވަނަ މިސައިލް ޓެސްޓެެވެ.

އުތުރު ކޮރެޢާ އިން ވަނީ މެއި 29 ގައި މިޑް-ރޭންޖް މިސައިލެއް ވެސް ޓެސްޓްކޮށްފައެވެ.

އުތުރު ކޮރެއާ އިން ދަނީ ތަކުރާރުކޮށް މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތައް ހިންގަމުންނެވެ. އެކަމުގެ ސަބަބުން ދެކޮރެއާ ސަރަހައްދު ވަނީ ހަލަބޮލިވެފައެވެ. އަދި އެމެރިކާ އާއި އުތުރު ކޮރެއާގެ ގުޅުން ވެސް ވަނީ ވަރަށް ގޯސްވެފައެވެ. އުތުރު ކޮރެއާ އިން ކުރާ މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތަކާއި ގުޅިގެން އދ އިން ދާދިފަހުން ވަނީ އުުތުރު ކޮރެއާ އާ ދެކޮޅަށް އާ ދަތިކުުރުމުގެ ފިޔަވަޅުތަކެއްް ވެސް އަޅާފައެވެ.