ތަކުރާރުކޮށް ކަންބޮޑުވުން ފާޅުކުރަމުން ދަނިކޮށް ޕޭ ފްރޭމްވޯކަށް ބަދަލު ގެނައުމުން އެމްއެޗްޕީޔޫ އިން މަރުޚަބާ ކިޔައިފި
މި ބަދަލަކީ އެ ޔޫނިއަން އިން ސިއްހީ މަސައްކަތްތެރިންގެ ހައްގުތައް ކަށަވަރުކުރުމަށް ކުރި މަސައްކަތްތަކަށް ލިބުނު ކުރިއެރުމެއް ކަމަށް އެމްއެޗްޕީޔޫ އިން ވަނީ ބުނެފަ
3 ނަރުހުން މަސައްކަތުގައި ހަރަކާތްތެރިވާ މަންޒަރު ފެންނަ ފޮޓޯ އެއް
ދައުލަތުގެ ޕޭ ފްރޭމް ވޯކްގެ މިންގަނޑުގެ ދަށުން އިތުރު ގަޑީގެ ފައިސާ ދޭ އުސޫލަށް ބަދަލު ގެނައުމުން މޯލްޑިވްސް ހެލްތު ޕްރޮފެޝަނަލްސް ޔޫނިއަން (އެމްއެޗްޕީޔޫ) އިނ މަރުޚަބާ ކިޔައިފިއެވެ.
ރޯދަ މަހުގެ ފަހު 10ގައި އޮފީހަށް ނުކުމެ މަސައްކަތް ކުރަން ޖެހޭ މުވައްޒަފުންނަށް އެ ދުވަސްތަކަށް އިތުރު އެލަވަންސް ދިނުމަށް ސަރުކާރުން ވަނީ ނިންމާފައެވެ.
ދައުލަތުގެ ޕޭ ފްރޭމްވޯކްގެ މިންގަނޑުތަކަށް ގެނައި 7 ވަނަ އިސްލާހު ދިވެހި ސަރުކާރުގެ ގެޒެޓުގައި ނޭޝަނަލް ޕޭ ކޮމިޝަނުން ވަނީ ޝާއިއުކޮށްފަ އެވެ.
އެގޮތުން ރޯދަ މަހުގެ ފަހު 10 އަކީ ސަރުކާރު ބަންދު ދުވަސްތަކެއް ކަމަށް ކަނޑައަޅައި މާރިޗު މަހުގެ 20 ވަނަ ދުވަހުން ފެށިގެން ބަންދު ކޮށްފައިވާއިރު، މި ދުވަސްތަކުގައި އޮފީހަށް ނުކުމެ މަސައްކަތް ކުރަން ޖެހޭ މުވައްޒަފުންނަށް އިތުރު އިނާޔަތް ދިނުމާ ގުޅޭ ގޮތުން ދައުލަތުގެ ޕޭ ފްރޭމްވޯކަށް އިސްލާހު ގެނެސް ޕޭކޮމިޝަނުން މިއަދު ވަނީ ގެޒެޓްކޮށްފަ އެވެ.
އިސްލާހުގައި ގެނެސްފައިވާ މުހިންމު ބަދަލުތަކުގެ ތެރޭގައި ރޯދަ މަހުގެ ފަހު ދިހައެއްގައި ދައުލަތުގެ އިދާރާތަކުގައި އާންމުންނަށް ކޮންމެހެން ދޭން ޖެހޭ ހިދުމަތްތައް ދިނުމަށް، އެ އިދާރާއަކުން ކަނޑައަޅާ ގޮތެއްގެ މަތިން، އެ އިދާރާއިން މަސައްކަތަށް ނިކުންނަން ޖެހޭ ކަމަށް ކަނޑައަޅާ މުވައްޒަފުން މަސައްކަތަށް ނިކުންނަ ހުރިހާ ދުވަހަކަށް ހާޒިރީ އިނާޔަތް ދޭންވާނެ ކަމުގައި ބަޔާންކޮށްފައިވެ އެވެ.
އިތުރު ގަޑީގެ ފައިސާ ނުދީ ސިއްހީ ޚިދުމަތްތެރިން ލައްވާ މަސައްކަތްކުރުވުމަށް މަގުފަހިވާގޮތަށް ކަންކަން އޮތުމުން އެކަމާއި މެދު ހުރި ކަންބޮޑުވުންތައް އެމްއެޗްޕީޔޫ އިން ވަނީ ރައީސް ޑރ.މުހައްދު މުއިއްޒު އާއި ވެސް ހިއްސާކޮށްފައެވެ. މީގެ ކުރިން، ނަރުހުންގެ ކަންބޮޑުވުންތައް ފާޅުކުރުމުން، މި މައްސަލަ އާއި ގުޅިގެން ސިވިލް ސަރވިސް އިން ބުނެފައި ވަނީ ސިއްހީ ޚިދުމަތްތެރިންނަށް އާ ޕޭފްރޭމް ވޯރކް ދޭހަވުމުގައި މައްސަލަ އެއް ހުރިކަމަށް ޤަބޫލުކުރެވޭ ކަމަށެވެ.
މީގެ އިތުރުން ހެލްތް އަދި މާލެ ސިޓީ ގްރޫޕް އޮފް ހޮސްޕިޓަލްސްގައި މަސައްކަތް ކުރަމުންދާ ސިއްހީ މަސައްކަތްތެރިންގެ ތެރެއިން ސިއްހީ ދާއިރާގެ ޕޭ ފްރޭމް ވޯރކަށް ހިޖުރަކޮށްފައިވާ މަސައްކަތްތެރިން ލައްވާ އިތުރު ގަޑީގެ ފައިސާ ނުދީ މަސައްކަތް ކުރުވަމުންދާ މައްސަލަ ބޮޑުވެ އެކަން ހައްލުކޮށްދިނުމަށް ތަކުރާރުކޮށް ސިއްހީ ޚިދުމަތްތެރިން އައީ އެދެމުންނެވެ.
މި ބަދަލަކީ އެ ޔޫނިއަން އިން ސިއްހީ މަސައްކަތްތެރިންގެ ހައްގުތައް ކަށަވަރުކުރުމަށް ކުރި މަސައްކަތްތަކަށް ލިބުނު ކުރިއެރުމެއް ކަމަށް އެމްއެޗްޕީޔޫ އިން ވަނީ ބުނެފައެވެ. އެ ޔޫނިއަން އިން ވަނީ ސިއްހީ ޚިދުމަތްތެރިންގެ އިންސާނީ އަދި ވަޒީފާގެ ހައްގުތައް ކަށަވަރުކޮށްދިނުމަށް ވެސް ގޮވާލާފައެވެ.
ރަމަޟާން މަހު ސިއްހީ ޚިދުމަތް ދޭ މުވައްޒަފުންނަށް އިތުރު ގަޑީގެ މަސައްކަތުގެ އުޖޫރަ ލިބުމުގައި އެ ބަދަލުތަކުގެ ސަބަބުން ލުޔެއް ލިބުނު ކަމަށް އެ ޖަމިއްޔާ އިން ފާހަގަކުރެއެވެ.
މިފަދަ ބަދަލެއް ސަރުކާރުން ގެނެސްފައިވާ އިރު އިތުރު ގަޑީގެ ފައިސާ ދިނުމުގައި އަމަލުކުރަމުން އައި ގޮތުން އެންމެ ބޮޑު ގޮންޖެހުމެއް ކުރިމަތިވި އެއް ބަޔަކީ ސިއްހީ ޚިދުމަތްދޭ މުވައްޒަފުންކަން އެ އެސޯސިއޭޝަނުން ވަނީ މީގެ ކުރިން ވެސް ފާހަގަކޮށްފައެވެ. އިތުރުގަޑީގެ ފައިސާ ނުލިބޭ ގޮތަށް ސިއްހީ މަސައްކަތްތެރިން މަސައްކަތް ކުރަން ޖެހޭތީ އެ ޖަމިއްޔާ އިން ވަނީ މީގެ ކުރިން ވެސް އެކި ފަހަރު މަތިން ކަންބޮޑުވުން ފާޅުކޮށްފައެވެ. އަދި ސަރުކާރުގެ ސަމާލުކަމަށް އެކަން ގެނައުމަށް ގިނަ މަސައްކަތްތަކެއް ކޮށްފައިވެއެވެ.
ދައުލަތުގެ ޕޭ ފްރޭމްވޯކްގެ މިންގަނޑުތަކަށް ސަރުކާރުން ބަދަލުގެންނަވާފައި މި ވަނީ މަސައްކަތްތެރިންގެ ހައްގުތައް ގެއްލޭތީ ޖަމިއްޔާ ޖަމާއަތްތަކުން ކަންބޮޑުވުން ފާޅުކޮށް، ސަރުކާރަށް ވަރަށް ބޮޑަށް ޕްރެޝަރ ބޮޑުވެފައިވާ ދަނޑިވަޅެއްގައެވެ.
