ޝަހީދުވި ސިފައިންގެ އާއިލާތަކަށް ފައިސާ ދޭން ނިންމީ ކޮން ޤަނޫނަކުން ބާރު ލިބިގެންތޯ މައުރޫފް ސުވާލު އުފައްދަވައިފި
20 މާރިޗު 2025 | ބުރާސްފަތި 17:53މައުރޫފް ސުވާލު ކުރެއްވީ މިހާރު އުސޫލުތައް އެކުލަވާލާ އިރު ޤާނޫނުތަކުން ބާރު ލިބޭ ގޮތަށް އަމަލު ނުކުރާތީ އެކަމަށް އިޝާރާތްކުރައްވާ
އެމްޑީޕީގެ ޤާނޫނީ ކޮމިޓީގެ މެންބަރު އަލްއުސްތާޒު އަހްމަދު މައުރޫފް
ނޮވެމްބަރު 3 1988 ގައި ރާއްޖެ އަށް ދިން އުދުވާލީ ހަމަލާއިން ރާއްޖެ ސަލާމަތްކުރުމަށް ޖިހާދުކޮށް ޝަހީދުވި ސިފައިންގެ އާއިލާތަކަށް އިނާޔަތްދޭން ނިންމީ ކޮން ޤަނޫނަކުން ބާރު ލިބިގެންތޯ ޤާނޫނީ ވަކީލް އެމްޑީޕީގެ ޤާނޫނީ ކޮމިޓީގެ މެންބަރު އަލްއުސްތާޒު އަހްމަދު މައުރޫފް ސުވާލު އުފައްދަވައިފި އެވެ.
އެ ހަމަލާގައި ޝަހީދުވި ސިފައިންގެ މީހާގެ އާއިލާ މެންބަރުންގެ ތެރެއިން ދުނިޔޭގައި ތިބި މީހުންނަށް އިނާޔަތް ދިނުމަށް ނިންމުމާއި ގުޅޭ އުސޫލު 19 މާރޗް 2025ގައި ވަނީ އާއްމުކޮށްފައެވެ. އެގޮތުން އިނާޔަތް ލިބޭ މީހުންގެ ތެރޭގައި މައިންބަފައިންނާއި ދަރިންނާއި ހުވަފަތް އަނބި މީހާ ވެސް ހިމެނެ އެވެ.
އެ އުސޫލު ބުނާ ގޮތުން ޝަހީދުވި މީހުންގެ އާއިލާގެ ތެރެއިން ދުނިޔޭގައި ތިބި ކޮންމެ މީހަކަށް ކޮންމެ މަހަކު 9،000ރ. ދޭން ޖެހޭނެއެވެ. ރާއްޖެ މިހާރު އޮތް މާލީ ޙާލަތުގައި މި ފަދަ ނިންމުމެއް ނިންމުމުން އާއްމުންގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.
މި އުސޫލާއި މެދު މައުރޫފް ފާހަގަކުރެއްވި ކަންބޮޑުވުމަކީ އެއީ ކޮން ޤާނޫނަކުން ބާރު ލިބިގެން އެކުލަވާލި އުސޫލެއްކަން ހާމަކޮށްފައި ނުވުމެވެ. މައުރޫފް ވަނީ ނޮވެމްބަރު 3 1988ގައި ރާއްޖެ އަށް ދިން އުދުވާލީ ހަމަލާއިން ރާއްޖެ ސަލާމަތްކުރުމަށް ޖިހާދުކޮށް ޝަހީދުވި ސިފައިންގެ އާއިލާތަކަށް އިނާޔަތްދޭން ނިންމި ގޮތުގެ އުސޫލް ގެޒެޓްގައި ޝާއިއުކޮށް ހާމަކުރި ލިޔުމުގެ ސްކްރީންޝޮޓެއް އެކްސްގައި ހިއްސާކުރައްވާފައެވެ.
އޭނާ ވަނީ މީގެ ކުރިން އެޓަރނީ ޖެނެރަލް އަހުމަދު އުޝާމް ޤާނޫނަކުން ބާރު ލިބިގެން ނޫން ގޮތަށް ނިމިދިޔަ ސަރުކާރުން އަމަލުކުރި ކަމަށް ބުނެ ފާޑުކިޔާފައިވާ ޓްވީޓެއް ވެސް ހިއްސާކުރައްވާފަ އެވެ.
އެއްވެސް ގާނޫނަކުން ބާރުލިބިގެން ނޫން ގޮތަކަށް 'އުސޫލު' އެއް އެކުލަވާލައިގެން ނިމިދިޔަ ސަރުކާރުން އެކި ފަރާތްތަކަށް ބޮޑެތި އަދަދުތަކުން ގެއްލުމުގެ ބަދަލުގެ ނަމުގައި ދައުލަތުގެ ފައިސާއާއި މުދާ ދެމުން ގެންދިޔައީ ގާނޫނާ ހިލާފަށް ކަމަށް އުޝާމް ވަނީ 21 ނޮވެމްބަރ 2023ގައި ކުރެއްވި ޓްވީޓެއްގައި ވިދާޅުވެފަ އެވެ.
އެކަން އެގޮތަށް ކުރިއަށް ނުގެންދެވުމަށް ރައީސުލްޖުމްހޫރިއްޔާއަށް ގާނޫނީ ލަފައެއް އަރުވާފައި ވާނެ ކަމަށް އޭރު އުޝާމް ވިދާޅުވިއެވެ. އަދި މި ލަފައާ ގުޅިގެން ރައީސުލްޖުމްހޫރިއްޔާވަނީ "ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި އަމަލުކުރާނެ ގޮތުގެ އުސޫލު" ބާތިލް ކުރައްވައި، އެ އުސޫލުގެ ދަށުން އެކުލަވާލާފައިވާ މައްސަލަ ހައްލުކުރުމަށް ލަފާދޭ ކޮމިޓީ އުވާލައްވާފައި ކަމަށް ވެސް އޭނާ ވިދާޅުވިއެވެ.
މައުރޫފް ސުވާލު ކުރެއްވީ މިހާރު އުސޫލުތައް އެކުލަވާލާ އިރު ޤާނޫނުތަކުން ބާރު ލިބޭ ގޮތަށް އަމަލު ނުކުރާތީ އެކަމަށް އިޝާރާތްކުރައްވައެވެ.
