އަޑިނޭގޭ ޑީލްއެއްގެ ދަށުން ރައީސް ޑރ. މުހައްމަދު މުއިއްޒުގެ ސަރުކާރުން ވެލާނާ އިންޓަރނޭޝަނަލް އެއަރޕޯޓުގެ ސީއައިޕީ ޓާމިނަލްގެ ދެ ފަންގިފިލާ ޖެޓެކްސްއަށް ދޭން ނިންމާފައިވާކަން ހާމަވެއްޖެއެވެ.

ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ވެލާނާ އިންޓަރނޭޝަނަލް އެއަރޕޯޓުގެ ސީއައިޕީ ޓާމިނަލްގެ ދެ ފަންގިފިލާ ޖެޓެކްސްއަށް ދިނުމަށް ނިންމާފައިވަނީ ދާދިފަހުން ވެލާނާ އެއަރޕޯޓު ހިންގާ މޯލްޑިވްސް އެެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ބޯޑަށް ގެނެވުނު ބަދަލަކާއި، ރައީސްގެ އަރިސް އަދި ރައީސް އޮފީހުގެ ބާރުގަދަ ސިޔާސީ މަގާމެއްގައި ހުރި ފަރާތެއްގެ ނުފޫޒާއެކުއެވެ.

މައުލޫމާތު ލިބިފައިވާ ގޮތުގައި އެމްއޭސީއެލްގެ ބޯޑަށް މި ބަދަލު ގެނެސްފައިވަނީ ވެސް ސަރުކާރުން ބޭނުންވެގެން ޓާމިނަލްގެ 2 ފަންގިފިލާ ޖެޓެކްސްއަށް ދިނުަމަށެވެ.

ޖެޓެކްސް އަކީ ޔުނައިޓެޑް އަރަބް އެމިރޭޓްސްގެ ދުބާއީގައި ހުންނަ ޕްރައިވެޓް އޭވިއޭޝަން އެންޑް ފްލައިޓް ސަޕޯޓް ކުންފުންޏެކެވެ. މެދުއިރުމައްޗާއި ޔޫރަޕާއި އޭޝިއާ ޕެސިފިކް އާއި އެފްރިކާ އަދި އެމެރިކާ ހިމެނޭ ގޮތަށް ދުނިޔޭގެ 50 އަށް ވުރެ ގިނަ ތަންތަނުގައި 38 ފިކްސްޑް ބޭސް އޮޕަރޭޓަރުންނާއި ގްރައުންޑް ހޭންޑްލިން ސްޓޭޝަން އެ ކުންފުނިން ހިންގަ އެވެ.

ވީއައިއޭގެ ސީއައިޕީ ޓާމިނަލްގެ ދެ ފަންގިފިލާ ދުބާއީގެ ޕްރައިވެޓް ޖެޓް ސާވިސް ޕްރޮވައިޑާ ޖެޓެކްސް އަށް ކުއްޔަށް ދޭން އެމްއޭސީއެލް އިން ނިންމަމުންދާކަމަށް މައުލޫމާތު ވަނީ ލިބިފައެވެ.

މި މައްސަލައާއި ގުޅިގެން ކަންބޮޑުވުން ފާލުކުރައްވާ، ރައީސް އޮފީހުގެ ކުރީގެ ލީގަލް އެޑްވައިޒަރ ޓު ދަ ޕްރެޒިޑެންޓް އަހުމަދު މައުރޫފް ވިދާޅުވީ ވީއައިއޭގެ ސީއައިޕީ ޓާމިނަލްގެ ދެ ފަންގިފިލާ ދުބާއީގެ ޕްރައިވެޓް ޖެޓް ގެ ހިދުމަތް ދޭ ކުންފުންޏެއް ކަމަށްވާ ޖެޓެކްސް އަށް ކުއްޔަށް ދޭން އެމްއޭސީއެލް އިން ނިންމާފައިވާ ކަމަށް ނުވަތަ ނިންމަން ނިންމާފައިވާ ކަމުގެ ހަބަރު ލިބިފައިވާ ކަމަށެވެ. އަދި އެ ޖާގައާއި އެތަނުގެ ވަސީލަތްތަކުގެ ބޭނުން އެމްއޭސީއެލް އަށް ވެސް ރަނގަޅަށް ހިފައި އެތަނުން ބޮޑު އާމްދަނީއެއް ހޯދޭނެ ކަމަށެވެ.

އަދި ވަކިން ހާއްސަކޮށް އިންފްރާސްޓްރަކްޗާއަށް އިތުރު އިންވެސްޓްމަންޓެއް ނުވަތަ މާ ބޮޑު ކުރިއެރުމެއް ނުގެންނަ ފަރާތަކަށް އެތަން ކުއްޔަށް ދިނުމަކީ އެއްވެސް ހަމަޖެހޭ ކަމެއް ނޫން ކަމަށާއި، ޝައްކެއްވެސްނެތްގޮތުގައި، މި ޑީލްގައި ކޮރަޕްޝަންގެ ބައެއް ކަންކަން ހިމެނޭއިރު، އެއީ އެތައް މިލިއަން ޑޮލަރެއްގެ ނާޖާއިޒު ފައިދާއެއް ލިބޭ އެއްބަސްވުމެއް ކަމަށް މައުރޫފް ވިދާޅުވިއެވެ.

މީގެ އިތުރުން މައުލޫމާތު ލިބިފައިވާ ގޮތުގައި މިކަން ކުރުމަށް ނިންމާފައިވަނީ މިނިވަން ދުވަހުއެވެ. އަދި ޖެޓެކްސްއާއި އެކު މި ޑީލް ހަދާފައިވާ އިރު، މިކަމާއި ގުޅިގެން ގިނަ ބަޔަކު އަންނަނީ ސޯޝަލް މީޑިއާގައި ފާޑުކިއަމުންނެވެ. މީގެ ކުރިން ޖީއެމްއާރުއަށް އެއަރޕޯޓް ވިއްކާލިކަމަށް ބުނި ފަރާތްތަކުން އަޑި ނޭނގޭ ޑީލްއެއްގެ ދަށުން އެއަރޕޯޓުން ސީދާ ދިވެހި ދައުލަތަށް ފައިދާ ލިބެން އޮތްކަމެއްގައި އެހެން ގޮތަކަށް އަމަލުކުރުމަށް ދަނީ މަސައްކަތް ކުރަމުންނެވެ.

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި އަލަށް އިމާރާތްކުރާ ވީއައިޕީ/ސީއައިޕީ ޓާމިނަލްގައި މަތީ ހައިލެވެލް އޮފިޝަލުންނާއި، ބޮެތި ވިޔަފާރިވެރިންނާއި، އިއްޒަތްތެރިންނަށް އަމާޒުކޮށްގެން ހަދާފައިވާ ހަތަރު ބުރީގެ އިމާރާތެކެވެ. އެއީ ގްރައުންޑް ލެވެލްގައި ވީވީއައިޕީ ލައުންޖަކާއި، ފުރަތަމަ އަދި ދެ ވަނަ ފަންގިފިލާގައި ވީއައިޕީ އަދި ސީއައިޕީ ލައުންޖާއި އެންމެ މަތީ ފަންތީގެ އިދާރީ އޮފީސްތަކެވެ. މި ޓާމިނަލުން ކެއިންބުއިމުގެ ހިދުމަތް ދިނުމާއި ނަމާދު ކުރާ ކޮޓަރިތަކާއި ވައިފައި އެކްސެސް އަދި ފެންވެރޭނެ ފެސިލިޓީފަދަ ވަސީލަތްތައް ލިބެން ހުންނާނެ އެވެ.