މެކްރޮން ވިދާޅުވީ، ޔުކްރެއިން އަށް ސިފައިން ފޮނުވުމުގައި ރަޝިޔާގެ ބަހެއް ހޯދަން ނުޖެހޭނެ ކަމަށް
17 މާރިޗު 2025 | ހޯމަ 07:54ސުލްހަ ބެލެހެއްޓުމުގެ ބާރު އެކުލެވިގެންވާނީ ކޮންމެ ގައުމަކުން "އެތައް ހާސް" ސިފައިންގެ މައްޗަށް ކަމަށާއި، އެ ސިފައިން މުހިންމު ސަރަހައްދުތަކުގައި ބޭތިއްބޭނެ ކަމަށް މެކްރޮން ވިދާޅުވި.
ފްރާންސްގެ ރައީސް މެކްރޮން، މެކްރޮން ވަނީ މީގެ ކުރިން ވެސް ރަޝިޔާ އަދި ޕުޓިން އަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާފައި
ރަޝިޔާ އާއި ޔުކްރެއިންއާ ދެެމެދު ކުރިއަށްދާ ހަނގުރާމަ ހުއްޓާލުމުގެ އެއްބަސްވުމުގެ ދަށުން، ޔުކްރެއިންގައި ސުލްހަ ބެލެހެއްޓުމުގެ މަސައްކަތުގައި ހަރަކާތްތެރިވާނެ ސިފައިން ގެންދިޔުމަކީ ޔުކްރެއިންގެ އަމިއްލަ ކަމެއް ކަމަށާއި، އެކަމުގައި ރަޝިޔާގެ ބަހެއް ހޯދަން ނުޖެހޭނެ ކަމަށް ފްރާންސްގެ ރައީސް އިމަނުއެލް މެކްރޮން ވިދާޅުވެއްޖެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ރަޝިޔާއާ އެކު ސުލްހަ ވެރި އެއްބަސްވުމަކަށް ވާސިލުވުމަށް ގޮވާލަމުންދާ ވަގުތެއްގައި، އިނގިރޭސިވިލާތުގެ ބޮޑު ވަޒީރު ކީ ސްޓާމާ އާއި ފްރާންސްގެ ރައީސް މެކްރޮން ގެންދަވަނީ ޔުކްރެއިން އަށް އިތުރު އަސްކަރީ އެހީތެރިކަން ހޯދުމަށް މަސައްކަތް ކުރައްވަމުންނެވެ.
އެގޮތުން އެމެރިކާ ފިޔަވައި ޔުކްރެއިން އަށް އެހީތެރިވާ ގައުމުތަކާ އެކު ސްޓާމާ ވަނީ ހޮނިހިރު ދުވަހު އޮންލައިން ބައްދަލުވުމެއް ބާއްވަވާފައި އެވެ.
ނޭޓޯގެ މެމްބަރު ގައުމުތަކުގެ ސިފައިން ޔުކްރެއިން ގައި ބޭތިއްބުމާ މެދު ރަޝިޔާ އިން ވަނީ ތަކުރާރުކޮށް ދެކޮޅު ހަދައި، އިންކާރު ކޮށްފަ އެވެ.
ނަމަވެސް، ސުލްހަ ބެލެހެއްޓުމުގެ ބާރު އެކުލެވިގެންވާނީ ކޮންމެ ގައުމަކުން "އެތައް ހާސް" ސިފައިންގެ މައްޗަށް ކަމަށާއި، އެ ސިފައިން މުހިންމު ސަރަހައްދުތަކުގައި ބޭތިއްބޭނެ ކަމަށް މެކްރޮން ވިދާޅުވި އެވެ.
އިނގިރޭސިވިލާތާއި ފްރާންސްގެ އިތުރުން، އޮސްޓްރޭލިޔާ ވެސް އޮތީ ސުލްހަ ބެލެހެއްޓުމަށް ޔުކްރެއިން އަށް ސަލާމަތީ ބާރުތައް ފޮނުވަން ތައްޔާރަށެވެ.
ރަޝިޔާގެ ރައީސް ވްލަޑިމިއާ ޕުޓިން ވިދާޅުވެފައި ވަނީ 30 ދުވަހުގެ ހަނގުރާމަ ހުއްޓާލުމަށް އެމެރިކާ އިން ހުށަހަޅާފައިވާ ހުށަހެޅުމަށް ތާއީދު ކުރައްވާ ކަމަށެވެ.
ނަމަވެސް، އެކަން ވާނީ ވަކި ޝަރުތުތަކެއް ފުރިހަމަވުމުން ކަމަށް ވެސް ޕުޓިން ވިދާޅުވެފައިވެ އެވެ. މި ހުރިހާ ކަމެއް ހިނގަމުން ދާއިރު، އާދީއްތަ ދުވަހުގެ ފަތިހު ދެ ގައުމުން ވެސް އެއްގަމާއި އަދި ވައިގެ މަގުން ހަމަލާތައް ދެމުން ގެންދާ ކަމަށް އޮފިޝަލުން ވަނީ ހާމަކޮށްފަ އެވެ.
