އެފްއޭއެމްގެ ދަރަނީގެ މައްސަލަ ޙައްލު ކުރުމަށް ސަރުކާރުން އިސް ނަގައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ދަރަނީގެ މައްސަލަ ޙައްލު ކުރުމަށް، ސަރުކާރުން އިސް ނަަގައިގެން މަސައްކަތް ކުރައްވަމުން އަންނަ ކަމަށް، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ވަޒީރު މިހެން ވިދާޅުވީ އެފްއޭއެމް އިން ބޭއްވި، އެ އެސޯސިއޭޝަންގެ އެކްސްޓްރާ އޯޑިނަރީ ކޮންގްރެސްގައި ވާހަކަ ދައްކަވަމުންނެވެ.

ކޮންގްރެސް އަށް ޙާޟިރުވެ ތިއްބެވި ފަރާތްތަކާ މުޚާތަބު ކުރައްވައި ވަޒީރު ދެއްކެވި ވާހަކައިގައި ވިދާޅުވީ، އެފްއޭއެމްގެ ދަރަނީގެ މައްސަލަ ޙައްލު ކުރުމަށް، ސަރުކާރު ހިއްސާވާ ކުންފުނިތަކާ އެކު މަޝްވަރާތައް ކުރިއަށް ގެންދަވާ ކަމަށެވެ. އަދި އެ ކުންފުނިތަކާ އެކު ކުރިއަށް ގެންދެވޭ މަޝްވަރާތައް ނިމޭއިރު، އެކަމުން ފަހި ގޮތްތަކެއް ފެނިގެން ދާނެ ކަމުގެ އުންމީދު ވެސް ވަޒީރު ވަނީ ދެއްވައިފަ އެވެ.

އެފްއޭއެމަށް ދިމާވެފައިވާ މައްސަލައިން ސަލާމަތްކޮށް، ދިވެހި ފުޓުބޯޅަ އަލުން ދިރުވުމަށް ސަރުކާރުން އަބަދުމެ މަސައްކަތް ކުރައްވާ ކަމަށް ވަޒީރ ރާފިޢު ވަނީ ވިދާޅުވެފަ އެވެ. އަދި އެ މަސައްކަތަކީ އެންމެ ފުރަތަމަ ދުވަހުން ފެށިގެން ވެސް ސަރުކާރުން ކުރަމުން އަންނަ މަސައްކަތެއް ކަމަށް ވިދާޅުވި އެވެ.

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން މިދިޔަ އަހަރުގެ ތެރޭގައި ރާއްޖެ ނޯމަލައިޒްކޮށް، ނޯމަލައިޒިން ކޮމެޓީއެއް އައްޔަން ކޮށްފައިވާއިރު، ކުޅިވަރު ވުޒާރާ އިން ވަނީ އެ ކޮމެޓީއެއް ގިނަ އެއްބާރުލުންތަކެއް ދީފަ އެވެ.

އެގޮތުން ކުޅިވަރު ވުޒާރާގެ އެހީތެރިކަމާ އެކު ވަނީ، އެފްއޭއެމްގެ އޮފީސް ހިންގުމަށް ގަލޮޅު ރަސްމީ ދަނޑުގައި އޮފީހެއް ޤާއިމު ކޮށްދީފަ އެވެ. އެފްއޭއެމްގެ އެކްސްޓްރާ އޯޑިނަރީ ކޮންގްރެސްގައި ވަޒީރު ވަނީ އެކަން ފާހަގަ ކުރައްވައިފަ އެވެ.

ފީފާ އިން ނޯމަލައިޒިން ކޮމެޓީއެއް އައްޔަން ކުރި ފަހުން، އެ ކޮމެޓީން އެންމެ ފުރަަަތަމަ ބޭއްވި ނޫސްވެރިންގެ ބައްދަލުވުމުގައި ވެސް ވަނީ، އެފްއޭއެމްގެ ދަރަނީގެ ވާހަކަ ދައްކައިފަ އެވެ. އެގޮތުން އެފްއޭއެމްގެ ދަރަނި މިހާރު ގާތް ގަނޑަކަށް 150 މިލިއަން ރުފިޔާ އަށް އަރާނެ ކަމަށް ލަފާ ކުރެވިފަައިވެ އެވެ.