ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ނިންމުމާ ގުޅޭ ގޮތުން، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އަދި ރަޝިޔާގެ ފޮރިން މިނިސްޓަރު ސާގޭ ލަވްރޯވް މަޝްވަރާ ކޮށްފި އެވެ.

 މި މަޝްވަރާތައް ކުރިއަށް ގެންދެވުނީ ޔުކްރެއިންގެ އެކުވެރިން ރަޝިޔާ އަށް ފިއްތުން ބޮޑުކުރުމަށް އެއްބަސްވި ދުވަހު އެވެ.

އެމެރިކާގެ ރައީސް ޑޮނަލްޑް ޓްރަމްޕް އަދި ޔުކްރެއިންގެ ރައީސް ވޮލޮޑްމިރް ޒެލެންސްކީއާ ދެމެދު އޮތް ގުޅުން ހީނަރުވެފައިވީ ނަމަވެސް، ރަޝިޔާ އިން އިރުމަތީ ޔުކްރެއިން ގައި ދެމުންދާ ހަމަލާތައް ހުއްޓާލާނަމަ، 30 ދުވަހުގެ ހުއްޓުމަކަށް ޔުކްރެއިން އިން ވަނީ އެއްބަސްވެފަ އެވެ.

ނަމަވެސް، ހަނގުރާމަ ހުއްޓާލުމަށް ހުށަހަޅާފައިވާ ހުށަހެޅުމަށް ރަޝިޔާގެ ރައީސް ވްލަޑިމިއާ ޕުޓިން މިހާތަނަށް އެއްބަސްވެފައެއް ނުވެ އެވެ.

އެމެރިކާފެ ސެކްރެޓަރީ އޮފް ސްޓޭޓް މާކޯ ރޫބިއޯ އާއި ރަޝިޔާގެ ފޮރިން މިނިސްޓަރު ސާގޭ ލަވްރޯވް ވަނީ ހޮނިހިރު ދުވަހު ފޯނު މެދުވެރިކޮށް މަޝްވަރާކޮށްފަ އެވެ.

އެމެރިކާގެ ސްޓޭޓް ޑިޕާޓްމަންޓްގެ ތަރުޖަމާނު ޓެމީ ބްރޫސް ވިދާޅުވި ގޮތުގައި، ދެ ފަރާތުން ވަނީ ކުރިއަށް އެޅެން ހުރި ފިޔަވަޅުތަކާ މެދު މަޝްވަރާކޮށްފަ އެވެ.

މިއަހަރުގެ ޖަނަވަރީ މަހުގެ ތެރޭގައި އަލުން ވެރިކަމަށް ވަޑައިގެންނެވި ފަހުން، ޓްރަމްޕް ވަނީ ތިން އަހަރަށް ދެމިގެން ދާ ހަނގުރާމަ ނިންމުމަށް ބާރު އަޅުއްވާފަ އެވެ. އަދި ޕުޓިން އާއެކު ގުޅުން އިއާދަ ކުރުމަށް ވެސް ޓްރަމްޕް ގެންދަވަނީ މަސައްކަތް ކުރައްވަމުންނެވެ.

ސައުދީ އަރަބިއްޔާގެ އިސްނެގުމުގެ ދަށުން ބޭއްވުމަށް ހަމަޖެހިފައިވާ އެމެރިކާ-ރަޝިޔާ މަޝްވަރާތަކުގެ ދެވަނަ ބުރު ފެށޭނެ ތާރީޚެއް މިހާތަނަށް ހާމަކޮށްފައެއް ނެތެވެ.

ނަމަވެސް ރޫބިއޯ އަދި ލަވްރޯވް ވަނީ ދެ ގައުމުގެ މެދުގައި މަޝްވަރާތަކާއި، ވާހަކަތައް އިތުރު ކުރުމަށް މަސައްކަތް ކުރުމަށް އެއްބަސްވެފަ އެވެ.