މީގެ ކުރިންވެސް މި ޕާޓީގެ އަންހެންވެރިން ފަހަތަކަށް ޖެއްސިފައެއް ނެތް، އަދި މިއަދުވެސް ނުޖެއްސޭނެ - އެމްޑީޕީގެ ނައިބު ރައީސް
މީގެ ކުރިންގައުމުގެ ހައްގުގައި ކުރިއަށް އެޅި ކޮންމެ ފިޔަވަޅެއް ފަސް ފިޔަވަޅު ފަހަތަށް މި ސަރުކާރުން އަޅާފައިވާ ކަމަށް އޭނާ ވިދާޅުވި
އެމްޑީޕީގެ ނައިބު ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ ކުރީގެ މެމްބަރު ހިސާން ހުސެއިން, އާދިއްތަ ދުވަހުގެ ރޭ އެމްޑީޕީގެ މުޒާހަރާގައި ވާހަކަދައްކަވަނީ - 16.03.2025
މީގެ ކުރިންވެސް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އަންހެންވެރިން ފަހަތަކަށް ޖެއްސިފައެއް ނެތް ކަމަށާއި މިއަދުވެސް އެ ޕާާޓީގެ އަންހެންވެރިން ފަހަތަށް ނުޖެއްސޭނެކަމަށް އެމްޑީޕީގެ ނައިބު ރައީސް އަދި ރައްޔިތުންގެ މަޖިލީހުގެ ތުޅާދޫ ދާއިރާގެ ކުރީގެ މެމްބަރު ހިސާން ހުސެއިން ވިދާޅުވެއްޖެއެވެ.
އޭނާ އެފަދައިން ވިދާޅުވީ އާދިއްތަ ދުވަހުގެ ރޭ އެމްޑީޕީގެ މުޒާހަރާގައި ވާހަކަދައްކަވަމުންނެވެ.
ހިސާން ވިދާޅުވީ މީގެ ކުރިން ވެސް މުޒާހަރާ އިން ހައްޔަރުކުރި އެމްޑީޕީގެ އަންހެނުންގެ އަދަދު 100 އިން ގުނާލެވޭ ކަމަށެވެ. އެހެންނަމަވެސް މުޒާހަރާ އިން މީހުން ހައްޔަރުކުރުމަށް ފަހު ދޫކޮށްލާ ދުވަހާއި ޖެހިގެން އަންނަ ދުވަހު އަނެއްކާވެސް އެ އަންހެނުން ތިބެނީ މުޒާހަރާގައި ކަމަށް އޭނާ ވިދާޅުވިއެވެ. އެމްޑީޕީގެ އަންހެނުންނަކީ ހިތްވަރުގަދަ ބައެއް ކަމަށް އޭނާ ވިދާޅުވިއެވެ.
އެމްޑީޕީގެ އަންހެނުންނަކީ ބިރު ދައްކާ ފަހަތަށް ޖެއްސޭނެ ބައެއް ނޫން ކަމަށާއި އެއަށް ވުރެ ބޮޑަށް އެމްޑީޕީގެ އަންހެނުންގެ ކަށީގައި ހިތްވަރު ހުންނާނެ ކަމަށް ހިސާން ވިދާޅުވިއެވެ. ހިސާން ވަނީ އެމްޑީޕީގެ އަންހެނުންނަކީ ޤައުމުގެ ހައްގުގައި އަބަދުވެސް ތެދުވާނެ ބައެއް ކަމަށް ވިދާޅުވެފައެވެ.
އޭނާ އިތުރަށް ވިދާޅުވީ ރާއްޖޭގައި ކުރި އިސްލާހީ ހުރިހާ މަސައްކަތެއް އެކޮޅު ކޮޅުން ޖަހާފައިވާ މަންޒަރު މިއަދު ފެންނަ ކަމަށެވެ.
ސުޕްރީމް ކޯޓަށް ހަދާލި ގޮތް އެއީ ޕީޕީއެމް ސަރުކާރުން ވެސް ހެދި ގޮތް. ކޯޓުތަކަށް ނުފޫޒު ފޯރުވުމާއި މިނިވަން މުއައްސަސާތަކަށް އަތް ބޭނުމަކީ ކޮންމެ ދުވަހެއްގެ ހަގީގަތަށް މިއަދު ވެއްޖެ.އެމްޑީޕީގެ ނައިބު ރައީސް ހިސާން ހުސެއިން
މީގެ ކުރިން ގައުމުގެ ހައްގުގައި ކުރިއަށް އެޅި ކޮންމެ ފިޔަވަޅެއް ފަސް ފިޔަވަޅު ފަހަތަށް މި ސަރުކާރުން އަޅާފައިވާ ކަމަށް އޭނާ ވިދާޅުވިއެވެ. ޝަރުއީ ދާއިރާ އިސްލާހުކުރަން ކުރި ހުރިހާ މަސައްކަތެއް ވެސް ފަހަތަށް ޖައްސާލާފައިވާ ކަމަށް އޭނާ ވިދާޅުވިއެވެ. އޭނާ ވަނީ އިދާރާތަކާއި މުއައްސަސާތަކުން ޤައުމުގެ ހިންގުން ޤާނޫނު އަސާސީ އާއި އެއްގޮތަށް ހިންގުމަށް އިލްތިމާސްކުރައްވާފައެވެ.
