އެމްޑީޕީން ސިލްސިލާކޮށް ކޮންމެ ރެއަކުވެސް މާލޭގެ މަގުތަކުގައި ކުރިއަށް ގެންދާ "ކުއްލި އެއްވުން އިހުތިޖާޖު" ގެ ބައިވެރިން ފުލުހަށް ހާޒިރު ކުރަމުން ގެންދަނީ އެ ފަރާތްތަކަށް ބިރުދެއްކުމުގެ ބޭނުމުގައި ސީދާ ރައީސް ޑރ. މުޙައްމަދު މުއިއްޒުގެ އޯޑަރަށް ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެވެ.

އަބްދުﷲ ވަޙީދު މިފަދައިން ވިދާޅުވެފައި މިވަނީ ހުކުރު ދުވަހުގެ ހަވީރު ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) ގަލޮޅު ޕޮލިސް ސްޓޭޝަނަށް ހާޒިރުކުރުމާއި ގުޅިގެން ރާއްޖެ ޓީވީ އަށް ދިން އިންޓަވިއުއެއްގައެވެ.

ވަޙީދު ވިދާޅުވީ އެމްޑީޕީން ކުރިއަށް ގެންދާ ކުއްލި އެއްވުމަކީ ޤާނޫނު އަސާސީގެ 32 ވަނަ މާއްދާގެ ތެރެއިން ލިބިގެންވާ ހައްޤެއް ކަމަށާއި ރައްޔިތުން އަޑުއުފުލަން މި ނުކުންނަނީ އެ ހައްޤުގެ ބޭނުން ހިފުމަށްކަމަށެވެ.

ޤާނޫނު އަސާސީން ލިބިދީފައި އޮތް ހައްޤެއްގެ ބޭނުން ހިފަން ނުކުތީމައި ފުލުސް އޮފީހުން އަމަލުކުރައްވަމުން އެ ގެންދަވަނީ ޣައިރުޤާނޫނީ އަމަލުތަކެއް ކަމަށާއި އަދި ކުރައްވަމުން އެ ގެންދަވަނީ ޣައިރުޤާނޫނީ އަމުރުތަކެއް ކަމަށް އޭނާ ވިދާޅުވި އެވެ.

މިހާރު ފުލުހުންގެ އަމަލުތައް ހުންނަ ގޮތުން ފެނިގެން މި ދަނީ މާކުރީގައި ފުލުހުން އޮތް ހާލަތަށް އަނބުރައި ރުޖޫއަވާތަން ކަމަށާއި އެހެން ކަމުން ފުލުހުންގެ ޤާނޫނަށް ގެނައި ހެޔޮ ބަދަލުތަކަށް ރައްޔިތުން ކުރަމުން އައި އިތުބާރު އަނެއްކާ ވެސް ގެއްލިގެން ދާތަން ފެންނަކަމަށްވެސް ވަޙީދު ވިދާޅުވި އެވެ.

އަދި މިއީ ފުލުހުންގެ އިސް ވެރިން ވަރަށް ބޮޑަށް ވިސްނަން ޖެހޭ ކަމެއް ކަމަށާއި ފުލުހުންގެ މައްޗަށް ރައްޔިތުން އޮތް އިތުބާރު ދަމަހައްޓަން މަސައްކަތް ކުރަން ޖެހޭ ކަމަށްވެސް ވަހީދު ވިދާޅުވި އެވެ.

ވަޙީދު ވިދާޅުވީ ޕޮލިސް ކޮމިޝަނަރު ވިއަަސް އަދި ރައީސުލްޖުމްޙޫރިއްޔާ ވިއަސް އަމަލުކުރައްވަން ޖެހޭނީ ޤާނޫނީ އިމުގެ ތެރެއިން ކަމަށާއި ނަމަވެސް މިހާރު ފެނިގެން މިދަނީ ޤާނޫނު އަސާސީ ރައީސްގެ އަތްޕުޅަށް ނަންގަވައިގެން ހިތުހުރި ގޮތަކަށް ވެރިކަން ކުރައްވަން މަސައްކަތް ކުރައްވާ ތަން ކަމަށެވެ.

އަދި ރައީސް މުއިއްޒުގެ އަނބިކަނބަލުން މެޑަމް ސާޖިދާގެ ދިފާއުފައި ރާއްޖޭގެ މުއައްސަސާތައް އެ ނިކުތީ ފަސްހަ ރޭގައި އިހުތިޖާޖު ކުރެވިގެންދިއަ އިރުގަ އެތަނަށް ވަޑައިގެން އެތަނުގައި ކަންހިނގާ ގޮތް ބަލާވެސް ނުލާ ކަމަށެވެ.

ވަޙީދު ވިދާޅުވީ މި ސަރުކާރުން ހިއުމަން ރައިޓްސް ކޮމިޝަނަށް މީހުން އައްޔަން ކުރެއްވި އިރުގައި އެ އައްޔަން ކުރެއްވި ބޭފުޅުންގެ ސީވީ އާއި މަސައްކަތު ތަޖުރިބާ އަށް ބަލާއިރުގައި އެއީ މަޤާމު ދިފާއުކުރުމަށްޓަކައި އެތަނުގައި ތިއްބަވަން ޖެހޭ ބޭފުޅުން ކަމަށް ޤަބޫލު ނުކުރައްވާ ކަމަށެވެ.

މީގެ އިތުރުން އެޗްއާރު ސީއެމުން ފުލުހުން ދިފާއުކޮށް ނެރެފައި ވަނީ ސީދާ ސިޔާސީ ބަޔާނެއް ކަމަށާއި އެއީ އެ ބޭފުޅުން މަޤާމު ދިފާއުކުރުމަށް ޓަކައި ނެރުނު ބަޔާނެއް ކަމަށް ވިދާޅުވަމުން ވަޙީދު ވިދާޅުވީ މި ސަރުކާރުން ކޮންމެ ކަމެއްގައި ވެސް އަމަލުކުރައްވަމުން އެ ގެންދަވަނީ ކަން ކުރައްވަން އޮންނަ އުސޫލާއި ޚިލާފަށް ކަމަށެވެ.