ފިހާރައަކުން ވައްކަން ކުރި ބިދޭސީ އެއް ޝަރީއަތް ނިމެންދެން ބަންދުކޮށްފި
އޭނާއަކީ ލަންކާގެ ރައްޔިތަކަށް ވުމުން ގައުމަށް ގޮސް ފިލުމުގެ ފުުރުސަތު އޮތް ކަމަށް ކޯޓު އަމުރުގަ ފާހަގަކޮށްފައިވޭ
ކްރިމިނަލް ކޯޓުގެ ބޭރުން ނަގާފައިވާ ފޮޓޯ އެއް
ފިހާރައަކުން ވައްކަން ކުރި ބިދޭސީ އެއް ޝަރީއަތް ނިމެންދެން ބަންދުކޮށްފި އެވެ.
ފިހާރައެއްގެ ވަތްގަނޑުން ފައިސާ ވަގަށް ނެގުމުގެ ތުހުމަތުގައި ބަންދުކޮށްފައި ވަނީ ސްރީލަންކާއަށް ނިސްބަތްވާ 24 އަހަރުގެ ވިޖެންދްރާ ވަޑުގެ ނިރާޝާ ރަސާލީ އެވެ.
އޭނާގެ މައްޗަށް ކުރަނީ ފިހާރައިން ވައްކަން ކުރިކަމުގެ ތުހުމަތެވެ. އޭނާ ބަންދު ކުރުމަށް ކްރިމިނަލް ކޯޓުން ނެރުނު އަމުރުގައި ބުނެފައި ވަނީ އޭނާ އާއި ދެކޮޅަށް އެކަށީގެންވާ މިންވަރަށް ހެކި ހުށަހަޅާފައިވާ ކަމަށެވެ.
މީގެ އިތުރުން ވިޖެންދްރާގެ ވާހަކަ އާއި ސީސީޓީވީގެ ސްނެޕްތަކުން އޭނާ ފިހާރަ ވަތްގަނޑުން ފައިސާ ނަގާފައިވާ ކަމަށް ފެންނަ ކަމަށް އޭނާގެ ބަންދު އަމުރުގައި ވަނީ ބުނެފައެވެ.
އޭނާ ނަގާފައިވާ ފައިސާގެ އަދަދު އެ ކޯޓު އަމުރުން ސާފެއް ނުވެއެވެ.
އޭނާ ބަންދުގައި ބަހައްޓަން ޖެހޭ ހާލަތެއް ކަމަށް ބަޔާންކޮށްފައި ވަނީ ގާނޫނު އަސާސީގެ 49 މާއްދާއާއި ޖިނާއީ އިޖުރާއަތުގެ ގާނޫނުގެ 59 ވަނަ މާއްދާއާއި 60 ވަނަ މާއްދާއަށް ރިއާޔަތްކޮށް މުޖުތަމައުއަށް ނުރައްކަލެއް ކުރިމަތިވެދާނެތީ އެވެ.
މީގެ އިތުރުން އޭނާއަކީ ލަންކާގެ ރައްޔިތަކަށް ވުމުން ގައުމަށް ގޮސް ފިލުމުގެ ފުުރުސަތު އޮތް ކަމަށް ފާހަގަކޮށްފައިވެ އެވެ.
