ތިން އަހަރުގެ ތެރޭގައި ޕޯޗުގަލްގައި ބޭއްވޭ ތިން ވަނަ އާންމު އިންތިޚާބު މެއި މަހު

ޕޯޗުގަލްގައި އާންމު އިންތިޚާބެއް ބާއްވަން ނިންމާފައިވާކަން އެ ޤައުމުގެ ރައީސް މާސެލޯ ރިބެލާ އިއުލާން ކުރައްވައިފި އެވެ.

ބުރާސްފަތި ދުވަހު ރިބެލާ އިއުލާން ކުރައްވާފައިވާ ގޮތުގައި މިއަހަރުގެ މެއި މަހުގެ 18 ވަނަ ދުވަހު އައު އިންތިޚާބެއް އޮންނާނެ އެވެ. މިއީ ވޭތުވެ ދިޔަ ތިން އަހަރުގެ ތެރޭގައި އެ ޤައުމުގައި އިންތިޚާބު ބާއްވާ ތިން ވަނަ ފަހަރެވެ.

މި އިންތިޚާބު އިއުލާން ކުރެއްވީ މަސްލަހަތު ފުށުއަރާ މައްސަލައަކާ ގުޅިގެން، އެ ޤައުމުގެ ބޮޑު ވަޒީރު ލުއިސް މޮންޓެނެގްރޯ އިސްތިއުފާ ދެއްވުމާ ގުޅިގެންނެވެ.

ޓީވީ މެދުވެރިކޮށް ދެއްވި ޚިޠާބެއް ގައި، ދިގު މުއްދަތަކަށް ޤައުމުގެ ހަމަޖެހުން ގެއްލިގެން ދިއުން ހުއްޓުވުމަށްޓަކައި އަވަސް ފިޔަވަޅު އަޅަން ބޭނުންވާ ކަމަށް ރައީސް ވިދާޅުވި އެވެ. އަދި މެއި 18 އަކީ އިންތިޚާބު ބޭއްވުމަށް ގިނަ ޕާޓީތަކުން އެދޭ ތާރީޚު ކަމުގައި ވެސް ފާހަގަކުރެއްވި އެވެ.

މޮންޓެނެގްރޯ އިސްތިއުފާ ދެއްވީ، އެމަނިކުފާނުގެ އާއިލާގެ ކުންފުނިތަކާއި، ސަރުކާރާ ދެމެދު ވެފައިވާ އެއްބަސްވުންތަކާ ގުޅޭ ގޮތުން އުފެދުނު މައްސަލަތަކާ ގުޅިގެން ނެގުނު އިތުބާރު ނެތް ކަމުގެ ވޯޓަކުން ސަރުކާރު ބަލިވުމާ ގުޅިގެންނެވެ. މި މައްސަލައިގައި އެމަނިކުފާނުގެ އަނބިކަނބަލުންނާއި ދަރިންގެ ކުންފުންޏެއް ހިމެނެ އެވެ.

ޑިއާރިއޯ ޑި ނޮޓީސިއަސް ނޫހުން ޝާއިއުކުރި ޚިޔާލު ހޯދުމުގެ ވޯޓުގެ ނަތީޖާ ދައްކާ ގޮތުން، ސޯޝަލިސްޓް ޕާޓީ އަށް 30.8 އިންސައްތަ ލިބޭއިރު، މޮންޓެނެގްރޯގެ ޑިމޮކްރެޓިކް އެލަޔަންސްއަށް 25.8 އިންސައްތަ ލިބެ އެވެ. އަދި ހަރުކަށި އަސްކަރީ ޗެގާ ޕާޓީ އަށް 17 އިންސައްތަ ލިބެ އެވެ.

ލިސްބަން ޔުނިވަރސިޓީގެ ސިޔާސީ ސައިންސުވެރިއެއް ކަމަށްވާ އެންޓޯނިއޯ ކޮސްޓާ ޕިންޓޯ ވިދާޅުވި ގޮތުގައި، މި އިންތިޚާބަށް ގޮވާލުމަކީ މޮންޓެނެގްރޯއަށް ސިޔާސީ ގޮތުން ދެމިހުރުމަށް ދެވޭ ފުރުސަތެކެވެ. މޮންޓެނެގްރޯ ވަނީ އަލުން އިންތިޚާބަށް ކުރިމަތިލައްވާނެ ކަމަށް އިއުލާން ކުރައްވާފައި އެވެ.