ޔޫކްރެއިންގެ ހަނގުރާމަ ހުއްޓާލުމަށް އެމެރިކާ އިން ހުށަހެޅި ހުށަހެޅުންތަކަށް ރަޝިއާ އެއްބަސްވެއްޖެ

ރަޝިއާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ހުއްޓާލުމަށް އެމެރިކާ އިން ހުށަހެޅު ހުށަހެޅުންތަކަށް ރަޝިއާ އިން އެއްބަސްވެއްޖެ އެވެ.

މި ހަފުތާގެ ތެރޭގައި ސައުދީ އަރަބިއްޔާ ގައި އެމެރިކާ އާއި ޔުކްރެއިންގެ އިސް އޮފިޝަލުން ކުރިއަށް ގެންދިޔަ މަޝްވަރާތަކުގައި ވަނީ، 30 ދުވަހުގެ މުއްދަތަކަށް ހަނގުރާމަ މެދު ކަނޑާލުމަށް ހުށަހަޅައިފަ އެެވެ.

އެކަމާ ގުޅޭ ގޮތުން ރަޝިއާގެ ރައީސް ވްލަޑިމިއާ ޕުޓިން ވިދާޅުވީ، އެ ހުށަހެޅުންތަކަށް ރަޝިއާ އިން އެއްބަސްވާ ކަމަށެވެ.

ނަމަވެސް، މި މައްސަލައިގެ އަސްލު ސަބަބުތަކަށް ހައްލެއް ގެންނަން ޖެހޭނެ ކަމަށާއި، އަދި އިތުރު ގިނަ ކަންތައްތަކާ މެދު މަޝްވަރާ ކުރަން ޖެހޭ ކަމަށް ވެސް ޕުޓިން ވިދާޅުވި އެވެ.

ބެލަރޫސްގެ ރައީސް އަލެކްސެންޑަރ ލުކަޝެންކޯ އާއެކު ކްރެމްލިން ގައި ބޭއްވި ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ޕުޓިން ވިދާޅުވީ، ހަނގުރާމަ ހުއްޓާލުމުގެ ހުށަހެޅުންތަކަށް ރަޝިއާ އިން އެއްބަސްވާ ކަމަށެވެ. 

މީގެ ތިން އަހަރު ކުރިން، 2022 ވަނަ އަހަރު ޔުކްރެއިން އަށް ރަޝިއާ އިން ހަމަލާ ދިނުމަށްފަހު، ފާއިތުވި ދެ އަހަރު ތެރޭގައި އެ ޤައުމުގެ ބިމުގެ ފަސްބައިކުޅަ އެއްބައި ރަޝިއާގެ ބާރުގެ ދަށަށް ވަނީ ގެނެސްފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ 30 ދުވަހުގެ ހަނގުރާމަ ހުއްޓާލުމުގެ ހުށަހެޅުމެއް ހުށަހަޅުއްވާފައި އެވެ. މި ހުށަހެޅުމަށް ޔުކްރެއިނުން ވެސް ވަނީ ތާއީދު ކޮށްފަ އެވެ.

ރަޝިއާގެ ރައީސް ޕުޓިން ވިދާޅުވީ، ޓްރަމްޕްގެ މަސައްކަތްތަކަށް ޝުކުރުވެރިވާ ކަމަށާއި، އެ މައްސަލަ ސުލްހަވެރި ގޮތެއްގައި ނިންމުމުގެ ޚިޔާލަށް ތާއީދު ކުރައްވާ ކަމަށެވެ.

އަދި އެެކަމާ ގުޅޭ ގޮތުން އެމެރިކާގެ އިސްވެރިންނާ މަޝްވަރާ ކުރުމުގެ މުހިންމުކަން ވެސް ޕުޓިން ފާހަގަ ކުރެއްވި އެވެ.