އައްޑޫ ބިޔުރޯ

ރާއްޖޭގެ ކޮންސްޓްރަކްޝަން އިންޑަސްޓްރީ މުޅިން ފުނޑާލައި ސަރުކާރުގެ ހުރިހާ ބޮޑެތި ޕްރޮޖެކްޓްތައް އެސްއޯއީތަކަށް ދޭކަމުގެ ކަންބޮޑުވުން ފާޅުކުރަމުން ދަނިކޮށް، ނުވަ ރަށެއްގައި ޞިއްޙީ ޚިދުމަތްދޭ ތަންތަނުގެ އައު އިމާރާތްކުރުމުގެ އެއްބަސްވުމުގައި އެސްއޯއީ ތަކާއި އެކު ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ ހެލްތް މިނިސްޓްރީގައި ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައެވެ.

މި މަސައްކަތް ކުރުމަށް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، ފެނަކަ ކޯޕަރޭޝަން އަދި ރޯޑް ޑިވެލޮޕްމަންޓް ކޯޕަރޭޝަން އާ އެވެ.

އެމްޓީސީސީ އާއި ޙަވާލުކުރެވުނު މަސައްކަތުގެ ތެރޭގައި، ނ. ފޮއްދޫ ޞިއްޙީ މަރުކަޒު ޢިމާރާތް ކުރުން، ށ. މާއުނގޫދޫ ޞިއްޙީ މަރުކަޒު ޢިމާރާތް ކުރުން، ވ. ފެލިދޫ ހޮސްޕިޓަލް ޢިމާރާތް ކުރުން، ތ. ވިލުފުށި ހޮސްޕިޓަލް ޢިމާރާތް ކުރުން ހިމެނެއެވެ. އެމްޓީސީސީއާއި ހަވާލު ކުރެވުނު މި ހަތަރު މަޝްރޫޢުއަށް ޖުމްލަ 246،590،755 (ދުއިސައްތަ ސާޅީސް ހަ މިލިއަން ފައްސަތޭކަ ނުވަދިހަ ހާސް ހަތްސަތޭކަ ފަންސާސް ފަސް) ރުފިޔާ އެވެ.

މީގެ އިތުރުން ރޯޑް ޑިވެލޮމްޕަންޓް ކޯޕަރޭޝަންއާއި ހަވާލުކޮށްފައިވަނީ ކ. ގާފަރު ޞިއްޙީ މަރުކަޒު ޢިމާރާތް ކުރުން، ހދ. ކުޅުދުއްފުށީ ސިޓީގައި ޢިމާރާތް ކުރާ ދަމަނަވެށި، ހދ. ހަނިމާދޫ ހޮސްޕިޓަލް ޢިމާރާތް ކުރުން އަދި އދ. މާމިގިލީ ހޮސްޕިޓަލް ޢިމާރާތް ކުރުން ހިމެނެއެވެ. ރޯޑް ޑިވެލޮމްޕަންޓް ކޯޕަރޭޝަންއާއި ހަވާލުކުރި މަޝްރޫއުތަކަށް 259،777،909 (ދުއިސައްތަ ފަންސާސް ނުވަ މިލިއަން ހަތްސަތޭކަ ހަތްދިހަ ހަތް ހާސް ނުވަ ސަތޭކަ ނުވަ) ރުފިޔާ އެވެ.

އަދި ހދ. މަކުނުދޫ ޞިއްޙީ މަރުކަޒު ޢިމާރާތް ކުރުން ފެނަކަ ކޯޕަރޭޝަންއާއި ހަވާލުކޮށްފައިވަނީ، 103,595,304.83 (ސަތޭކަ ތިން މިލިއަން ފައްސަތޭކަ ނުވަދިހަ ފަސްހާސް ތިންސަތޭކަ ހަތަރު ރުފިޔާ އަށްޑިހަ ތިން ލާރި) އެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހެލްތު އަބުދުﷲ ނާޠިމް އިބްރާހީމް ވިދާޅުވީ ކައިރި މުސްތަގުބަލެއްގައި އިތުރު ޞިއްޙީ ޚިދުމަތްދޭ ތަންތަނުގައި ސޮއިކުރެވިގެންދާނެ ކަމަށެވެ. އަދި ރައީސްގެ ވައުދާއި އެއްގޮތަށް ޞިއްޙީ ދާއިރާގެ މަސައްކަތް ކުރިއަށް ގެންދާނެ ކަމުގެ ޔަޤީންކަން ދެއްވިއެވެ.

މިދިޔަ އަންގާރަ ދުވަހު ރައްޔިތުންގެ މަޖިލީހުގައި ވާހަކަދައްކަވަމުން ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެފައިވަނީ މިއަދު މި ގައުމުން ފެނިގެން މިދަނީ ރާއްޖޭގެ ކޮންސްޓްރަކްޝަން އިންޑަސްޓްރީ މުޅިން ފުނޑާލައި ސަރުކާރުގެ ހުރިހާ ބޮޑެތި ޕްރޮޖެކްޓް ތައް އެސްއޯއީތަކަށް ދޭތަން ކަމަށާއި މިއީ ވައްކަމަށް ހުޅުވާލާ ދޮރެއް ކަމަށެވެ. އެހެންކަމުން މިއީ ސީދާ ދިވެހި ރައްޔިތުންގެ ފައިސާއިން ވައްކަން ކުރުން ކަމަށްވެސް އައްބާސް ވިދާޅުވިއެވެ.

ސަރުކާރަށް މިތުހުމަތުކޮށްފައިވަނިކޮށް ކޮންސްޓްރަކްޝަން ދާއިރާގައި މަސައްކަތްކުރާ އަމިއްލަ އެއްވެސް ފަރާތަކަށް ހެލްތްގެ މިމަޝްރޫއުތައް ނުދީ ސަރުކާރުގެ އެސްއޯއީތަކަށް ދިނުމުން އެފަރާތްތަކުން ދަނީ ކަންބޮޑުވުން ފާޅުކުރަމުންނެއެވެ. އަދި މީގެ ތެރޭން ގިނަ މަޝްރޫއު ތަކަކީ ކުރިން ބިޑިންގ ޕްރޮސް އެއްގެ ތެރެއިން އަމިއްލަ ކުންފުނިތަކާއި ހަވާލު ކުރެވިގެން މަސައްކަތް ކުރިއަށް ގެންގޮސްފައިވާ މަސްރޫއު ކަންވެސް ފާހަގަ ކުރެވެއެވެ. މި ގޮތުން މި މަޝްރޫއުތަށް އެސްއޯއީ ތަކާ ހަވާލު ކޮއްފައި ވަނީ ވެސް ކުރިން މި މަޝްރޫއު ހިންގި ފަރާތްތަކާ މަސްވަރާ ކުރުމެއްނެތި ޓާރމިނޭޝަން ޕްރޮސެސް ވެސް ފުރިހަމަ ނުކޮށް ކަމުގައި މައުޅޫމާތް ލިބެއެވެ.