އެމްޑީޕީގެ މުޒާހާރާތައް ބާއްވަން ފުރުސަތު ދިނުމަށް އެޗްއާރުސީއެމްއިން އިލްތިމާސްކޮށްފި

މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ މުޒާހާރާތައް ބާއްވަން ފުރުސަތު ދިނުމަށް ހިއުމަން ރައިޓްސް ކޮމިޝަން، އެޗްއާރުސީއެމްއިން އިލްތިމާސްކޮށްފިއެވެ.

2025 މާރިޗު 7 ވަނަ ދުވަހުން ފެށިގެން މޯލްޑިވިއަން ޑިމޮކްރަޓިކް ޕާޓީގެ (އެމް.ޑީ.ޕީ) ފަރާތުން މާލޭގައި ކުރިއަށް ގެންދާ ސިލްސިލާ މުޒާހަރާތައް މި ކޮމިޝަންގެ ފަރާތުން މޮނިޓަރ ކުރަމުންދާކަމަށް އެ ކޮމިޝަނުން ބުރާސްފަތި ދުވަހު ނެރުނު ބަޔާނެއްގައި ވަނީ ބުނެފައެވެ.

އެ ބަޔާނުގައި އިތުރަށް ބުނެފައި ވަނީ ސުލްޙަވެރިކަމާއެކީ އެއްވެއުޅުމުގެ މިނިވަންކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 32 ވަނަ މާއްދާއިން ކޮންމެ މީހަކަށްމެ ލިބިދޭ އަސާސީ ޙައްޤަކަށް ވީހިނދު، އެ ހައްޤު ޤާނޫނީ އިމުގެ ތެރެއިން ތަނަވަސްކޮށްދިނުމަށް ޤާނޫނު ތަންފީޒުކުރާ އިދާރާތަކަށް އިލްތިމާސްކުރާ ކަމަށެވެ.

ހަމައެހެންމެ މުޒާހަރާ ކަވަރު ކުރުމުގައި ހަރަކާތްތެރިވާ މީޑިއާގެ ފަރާތްތަކުގެ މަސައްކަތަށް ހުރަސް ނޭޅޭނެ ގޮތަށް އެފުރުސަތު ދިނުމަށްވެސް ކަމާ ގުޅުންހުރި އިދާރާތަކަށް އެޗްއާރްސީއެމުން ވަނީ އިލްތިމާސްކޮށްފައެވެ. މީގެ އިތުރުން މުޒާހަރާގައި ބާރުގެ ބޭނުން ކުރަންޖެހޭ ހާލަތުގައިވެސް ޤާނޫނީ އިމުގެ ތެރެއިން ބާރުގެ ބޭނުން ކުރުމަށް ދިވެހި ފުލުހުންގެ ޚިދުމަތަށް އެޗްއާރްސީއެމުން ވަނީ ގޮވާލާފައެވެ.

އިދިކޮޅު އެމްޑީޕީން ބާއްވާ މުޒާހަރާތައް މޮނިޓަރކުރުމަށް އެޗްއާރްސީއެމް އިން ހަރަކާތްތެރިވި ނަމަވެސް ފުލުހުން އަމަލުކުރާ ގޮތް ބެލުމަށް، ފުލުހުންނާއި ސުވާލު ކުރާތީ އާއްމުންގެ ފާޑުކިޔުން އެޗްއާރްސީއެމަށް ވަނީ އަމާޒުވެފައެވެ. އަދި ފުލުހުންނަށް އާއްމުންނަށް އަނިޔާ ކުރާ މަންޒަރު މުޒާހަރާގެ ފޮޓޯ އާއި ވީޑިއޯ އިން ފެންނަ އިރު އެކަންކަމަށް ރިއާޔަތް ނުކުރާތީ، އެޗްއާރްސީއެމްގެ ބަޔާނަކީ ވަކި އަތަކަށް ބުރަވެފައިވާ ބަޔާނެއް ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ.

ސިލްސިލާކޮށް އެމްޑީޕީން ކުރަމުންދާ މުޒާހަރާތަކުގައި ފުލުހުން ހާލަތާއި ނުބައްދަލު މިންވަރަށް ބާރުގެ ބޭނުން ކުރުމުން އާއްމުންނަށް ވަނީ އެކިވަރުގެ އަނިޔާވެފައެވެ. ޚާއްސަކޮށް އަންހެނުންނަށް ވަނީ ވަރަށް ބޮޑަށް އަނިޔާވެފައެވެ. މުޒާހަރާގައި ފިރިހެން ފުލުހުން މެދުވެރިކޮށް އަންހެނުން ފަހަތަށް ޖައްސާ މައްސަލަ ވަރަށް ބޮޑަށް އާއްމުން ދަނީ ފާހަގަކުރަމުންނެވެ.