ހައްޔަރު ކުރުމާ އެކު ޑުޓާޓޭ ވިދާޅުވީ، ޒިންމާ ނަންގަވާނެ ކަމަށް

މަސްތުވާ ތަކެއްޗާ ދެކޮޅަށް ހިންގި ހަނގުރާމައިގައި އިންސާނިއްޔަތާ ދެކޮޅަށް ކުށްތަކެއް ކުރިކަމުގެ ދައުވާގައި، ފިލިޕީންސްގެ ކުރީގެ ރައީސް ރޮޑްރީގޯ ޑުޓާޓޭ  އިންޓަނޭޝަނަލް ކްރިމިނަލް ކޯޓު (އައި.ސީ.ސީ) ގެ ބަންދަށް ގެން ގޮސްފި އެވެ.

އުމުރުފުޅުން މިހާރު 79 އަހަރު ވެފައިވާ ޑުޓާޓޭ އަކީ އައިސީސީ އަށް ހާޒިރު ކުރެވޭ އޭޝިއާގެ ކުރީގެ ފުރަތަމަ ވެރިއާ އެވެ.

އޭނާ ބުދަ ދުވަހު ރޮޓަޑަމް އަށް އަމިއްލަ ޖެޓެއް މެދުވެރިކޮށް ގެންދެވުނެވެ. އެތަނުން ދެން އޭނާ ގެންދެވުނީ ދަ ހޭގް ގައި ހުންނަ އައިސީސީގެ ބަންދު މަރުކަޒަށެވެ. 

ޑުޓާޓޭ ވިދާޅުވީ ލޯ އެންފޯސްމަންޓާއި، މިލިޓަރީ ވެސް ލީޑު ކުރެއްވީ އޭނާ ކަމަށެވެ. އަދި އެ ހުރިހާ ކަމެއްގެ ޒިންމާ ނަންގަވާނެ ވާހަކަ ދަންްނަވާފައި ވާނެ ކަމަށް ވެސް ޑުޓާޓޭ ވިދާޅުވި އެވެ.

"އަހަރެން މިއީ ލޯ އެންފޯސްމަންޓާއި މިލިޓަރީ ވެސް ލީޑް ކުރި މީހާ. އަހަރެން މި ހުރިހާ ކަމެއްގެ ޒިންމާ ނަގާނަމޭ ބުނިން،" ޑުޓާޓޭ ވިދާޅުވެފައިވެ އެވެ.

އައިސީސީގެ ތަޙުޤީޤު ތަކުން ދައްކާ ގޮތުން، ޑުޓާޓޭގެ ވެރިކަމުގައި މަސްތުވާތަކެއްޗާ ދެކޮޅަށް ހިންގި ހަނގުރާމައިގައި އެތައް ހާސް ބަޔަކު މަރާލެވުނެވެ. އޭގެ ތެރޭގައި ޑަވާއޯ ސިޓީގައި މޭޔަރުކަން ކުރި ދުވަސްވަރު "ޑަވާއޯ ޑެތް ސްކޮޑް" އިން މަރާލި 19 މީހުންނާއި، ޕޮލިހުން އެކި ސަރަޙައްދު ތަކުގައި މަރާލި 24 މީހުން ހިމެނެ އެވެ.

ޑޫޓާޓޭގެ ދަރިކަނބަލުން، އަދި ފިލިޕީންސްގެ މިހާރުގެ ނައިބު ރައީސާ ސާރާ ޑުޓާޓޭ ވިދާޅުވީ އޭނާގެ ބައްޕަ "މަޖުބޫރުން ދަ ހޭގްއަށް" ގެން ދިޔައީ ކަމަށެވެ.

ނަމަވެސް މަރުވެ ދިޔަ މީހުންގެ ޢާއިލާތަކުން، ޑުޓާޓޭގެ މި ހައްޔަރު ކުރުމަށް މަރުޙަބާ ކިޔާފައިވެ އެވެ. ޔޫއެން ހިއުމަން ރައިޓްސް ޗީފް، ވޯލްކަރ ޓަރކް ވިދާޅުވީ މިއީ "މަރުވެ ދިޔަ އެތައް ހާސް މީހުންނަށް އިންސާފު ހޯދައި ދިނުމަށް އެޅުނު ވަރަށް މުހިންމު ފިޔަވަޅެއް" ކަމަށެވެ.

2019 ގައި ޑުޓާޓޭގެ އިރުޝާދުގެ ދަށުން ފިލިޕީންސް އައިސީސީން ވަކިވި ނަމަވެސް، އެ ދުވަސްވަރާ ހަމައަށް ހިނގި ކަންކަމުގެ މައްޗަށް އައިސީސީ އަށް ބާރު ލިބިގެންވާ ކަމަށް އެ ކޯޓުން ބުނެ އެވެ.

ޑުޓާޓޭގެ މައްޗަށް ކުރެވޭ ތުހުމަތުތަކާ މެދު އިބުތިދާއީ އަޑު އެހުން ކުރިއަށް އޮތް ދުވަސް ތަކުގައި ބޭއްވުމަށް ވަނީ ހަމަޖެހިފަ އެވެ.