ރަޝިއާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ނިންމުމަށް، ރަޝިއާ އިން އެމެރިކާ އަށް ޝަރުތުތަކެއް ހުށަހަޅާފައިވާ ކަމަށް، މައުލޫމާތު ލިބިފައިވާ ދެ މަސްދަރަކާ ހަވާލާދީ މީޑިއާ ތަކުން ރިޕޯޓުކޮށްފި އެވެ.

ވޭތުވެ ދިޔަ ތިން ހަފްތާގެ ތެރޭގައި ރަޝިއާ އަދި އެމެރިކާގެ އޮފިޝަލުން ވަނީ އޮންލައިންކޮށް އަދި ސީދާ ގޮތުން ވެސް ބައްދަލުވުން ތަކެއް ބާއްވާފައި އެވެ.

ނަމަވެސް ރަޝިއާ އިން ހުށަހެޅި ޝަރުތުތަކުގެ ތަފްސީލެއް ސާފުވެފައެއް ނުވެ އެވެ. އަދި ޔުކްރެއިން އާއެކު ސުލްހައިގެ މަޝްވަރާތައް ފެށުމުގެ ކުރިން، މި ޝަރުތުތައް ގަބޫލުކުރަން ޖެހޭތޯ ވެސް  ސާފެއް ނުވެ އެވެ.

ރަޝިއާ އިން ކުރިން ވެސް ހުށަހަޅާފައިވާ ޝަރުތު ތަކުގެ ތެރޭގައި ޔުކްރެއިން ނޭޓޯގައި ބައިވެރި ނުވުމާއި، ޔުކްރެއިން ގައި ބޭރުގެ ސިފައިން ނުބޭތިއްބުމާއި، ކްރައިމިއާ އަދި އިތުރު ހަތަރު ސަރަހައްދަކީ ރަޝިއާގެ ބިން ކަމަށް ބައިނަލްއަގުވާމީ މުޖުތަމައު އިން ގަބޫލު ކުރުން ހިމެނެ އެވެ.

އެމެރިކާގެ ރައީސް ޑޮނަލްޑް ޓްރަމްޕް މިހާރު މަޑު ކުރައްވަނީ 30 ދުވަހުގެ މުއްދަތަކަށް ހަނގުރާމަ ހުއްޓުމަށް ރަޝިއާގެ ރައީސް ވްލަޑިމިއާ ޕުޓިން އެއްބަސްވޭތޯ ބެއްލެވުމަށް ކަމަށް ވެސް ރިޕޯޓުތަކުގައި ބުނެފައިވެ އެވެ.

މި ހުއްޓުމަށް ޔުކްރެއިންގެ ރައީސް ވޮލޮޑްމިރް ޒެލެންސްކީ އެއްބަސް ވެފައިވާ ކަމަށް އަންގާރަ ދުވަހު ވަނީ ހާމަކުރައްވައިފަ އެވެ. ނަމަވެސް އެމެރިކާ ބައެއް އޮފިޝަލުންނާއި، ގާނޫނު ހަދާ މަޖިލީހުގެ މެންބަރުން ކަންބޮޑުވުން ފާޅު ކުރައްވަނީ ޕުޓިން މި ހުއްޓުން ބޭނުންކޮށްގެން، އެމެރިކާ އާއި ޔުކްރެއިން އަދި ޔޫރަޕްގެ ގުޅުން ނަގާލައިފާނެތީ އެވެ.

މި މައްސަލައާ ގުޅޭ ގޮތުން އެމެރިކާ ގައި ހުންނަ ރަޝިއާގެ އެމްބަސީ އަދި ވައިޓް ހައުސްއިން ވެސް އެއްވެސް ބަހެއް ބުނެފައެއް ނުވެ އެވެ. ނަމަވެސް، މިހަފްތާ ގައި ސައުދީ އަރަބިއްޔާ ގައި ބޭއްވުނު އެމެރިކާ އަދި ޔުކްރެއިން އޮފިޝަލުންގެ ބައްދަލުވުމަކީ އުންމީދީ ބައްދަލުވުމެއް ކަމަށް ރައީސް ޒެލެންސްކީ ވިދާޅުވެފައިވެ އެވެ.

އަދި 30 ދުވަހުގެ ހުއްޓުމެއް ބޭނުން ކޮށްގެން ފުޅާ ދާއިރާއެއްގެ ސުލްހައިގެ އެއްބަސްވުމެއް އެކުލަވާލެވި ދާނެ ކަމަށް އުއްމީދު ކުރައްވާ ކަމަށް ވެސް ވިދާޅުވެފައިވެ އެވެ.

ތުރުކީގެ އިސްތަމްބޫލް ގައި 2022 ވަނަ އަހަރު މަޝްވަރާ ކުރެވުނު އެއްބަސްވުމަކީ އަލުން މަޝްވަރާތައް ފެށުމަށް ރަނގަޅު ފެށުމެއް ކަމަށް އެމެރިކާ އަދި ރަޝިއާގެ އޮފިޝަލުން ވެސް ފާހަގަކޮށްފައިވެ އެވެ. ނަމަވެސް، އޭރު މި އެއްބަސްވުން ތަންފީޒު ކުރެވިފައެއް ނުވެ އެވެ.