ޖޯޖިއާގެ ކުރީގެ ރައީސް ސަކަޝްވިލީ އަށް އިތުރު ނުވަ އަހަރުގެ ޖަލު ޙުކުމެއް އިއްވައިފި

ޖޯޖިއާގެ ކުރީގެ ރައީސް މިހައިލް ސަކަޝްވިލީ އަށް އިތުރު ނުވަ އަހަރު ދުވަހުގެ ޖަލު ޙުކުމެއް އިއްވައިފި އެވެ.

އިންޓަރޕްރެސް ނިއުސް އެޖެންސީ އިން ބުދަ ދުވަހު ރިޕޯޓު ކުރި ގޮތުގައި މި ޙުކުމް އިއްވާފައި ވަނީ ދައުލަތުގެ ފައިސާ އަށް ޚިޔާނާތްތެރިވުމުގެ ކުށް ސާބިތުވުމާ ގުޅިގެންނެވެ.

ސަކަޝްވިލީ ވަނީ 2004 ވަނަ އަހަރުން ފެށިގެން، 2013 ވަނަ އަހަރާ ހަމައަށް ޖޯޖިއާގެ ރައީސްކަން ކުރައްވައިފަ އެވެ. 

ވެރިކަމަށް ފަހުން 2021 ވަނަ އަހަރު ސަކަޝްވިލީ އެނބުރި ޖޯޖިއާ އަށް ވަޑައިގެންނެވުމުން، އޭނާ އަށް ވަނީ ހަ އަހަރު ދުވަހުގެ ޖަލު ޙުކުމެއް އިއްވައިފަ އެވެ. އެއީ ބޭރުގެ ބޭނުން ނަަހަމަ ގޮތުގައި ކޮށްފައިވާތީ އެވެ.

ސަކިޝްވިލީގެ މައްޗަށް އިއްވި ހަ އަހަރު ދުވަހުގެ ޖަލު ޙުކުމުގެ ބޮޑު ބައި އޭނާ ހޭދަ ކުރައްވާފައި ވަނީ ޖަލު ހޮސްޕިޓަލްގަ އެވެ. 

ބުދަ ދުވަހު ސަކިޝްވިލީގެ މައްޗަށް އިއްވި ނުވަ އަހަރު ދުވަހުގެ ޖަލު ޙުކުމާ އެކު، އޭނާގެ މައްޗަށް 15 އަހަރު ދުވަހުގެ ޖަލު ޙުކުމެއް އައީ އެވެ.

ޝަރީޢަތުގެ މަޖިލީހު ގައި މި މައްސަލަ ބެލި ފަނޑިޔާރުން ނިންމާފައި ވަނީ, ސަކިޝްވިލީ ދައުލަތުގެ ފައިސާ އަށް ޚިޔާނާތްތެރިވުމުގެ ހެކިތައް ފުރިހަމަ އަށް ސާބިތުވާ ކަމަށެވެ. ސަކަޝްވިލީގެ ޙުކުމް ތަކާ މެދު އިތުރު އިސްތިއުނާފު މަރުޙަލާ ތަކެއް ކުރިއަށް ދާނެ ކަމަށް ބެލެވެ އެވެ.

އަދި އޭނާގެ ޞިއްޙީ ޙާލަތަށް ރިޢާޔަތްކޮށް، ކުރިއަށް އޮތް ތާނގައިވެސް ޖަލު ހޮސްޕިޓަލު ގައި ބަންދުކުރެވިފައި ހުންނާނެ ކަމަށް ލަފާކުރެވެ އެވެ.