އިސްރާއިލް ޕާސްޕޯޓު މަނާ ނުކުރެވިވާ ސަބަބު މިނިސްޓަރ ހަލީލަށް ބުނެ ނުދެވުނު

އިސްރާއިލް ޕާސްޕޯޓުގައި ރާއްޖެ އެތެރެވުން މަނާނުކުރެވޭ ސަބަބާއި މެދު މިނިސްޓަރ އޮފް ފޮރިން އެފެއާޒް ޑޮކްޓަރ ޢަބްދުالله ޚަލީލަށް ސާފު ޖަވާބެއް ނުދެވުނެވެ.

ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ، މިނިސްޓަރ އޮފް ފޮރިން އެފެއާޒް ޑޮކްޓަރ ޢަބްދުالله ޚަލީލް އާއި ލިޔުމުން ޖަވާބު ހޯއްދެވުމަށް ސުވާލެއް ކުރައްވާފައެވެ.

އޭނާ ސުވާލުކުރައްވާފައި ބުނެފައި ވަނީ ދިވެހިރާއްޖޭގެ ފޮރިން ސަރވިސްގެ ޤާނޫނުގެ 7 ވަނަ މާއްދާގެ (ރ) ނިޔާކުރާގޮތުން ދިވެހި ދައުލަތުން ބޭރު ދައުލަތްތައް ޤަބޫލުކުރުމާއި, އެ ޤަބޫލުކުރުން އަނބުރާ ގެންދިއުމާއި ގުޅޭގޮތުންނާއި، ބޭރު ޤައުމުތަކާއި އެކު ދިވެހިރާއްޖެއިން ސިޔާސީ ގުޅުން ޤާއިމްކުރުމާއި، ސިޔާސީ ގުޅުން ޤާއިމުކޮށްފައިވާ ޤައުމަކާއި މެދުގައި އޮތް ގުޅުން ކަނޑަ އެޅުމާއި ގުޅޭގޮތުން ރައީސުލްޖުމްހޫރިއްޔާ އަށް ލަފާދީ، ރައީސުލްޖުމްހޫރިއްޔާގެ ނިންމުން ތަންފީޒުކުރުމަކީ މިނިސްޓަރުގެ މަސް އޫލިއްޔަތެއް ކަމަށެވެ. އެހެންނަމަވެސް އިސްރޭލުގެ ޕާސްޕޯޓާއި އެކު ރާއްޖެ އެތެރެވުން މަނާކުރުމަށް 2 ޖޫން 2024 ގައި ނިންމި ނިންމުން ތަންފީޒުކުރެވިފައި ނުވަނީ ކީއްވެގެންތޯއެވެ.

އެ ސުވާލުގެ ޖަވާބުގައި މިނިސްޓަރ ހަލީލް ވިދާޅުވެފައި ވަނީ 2 ޖޫންގައި އިސްރާއިލްގެ ޕާސްޕޯޓުގައި ރާއްޖެ އެތެރެވުން މަނާކުރި ކަމަށް ވަޒީރުންގެ މަޖިލީހުންގެ ލަފަޔާއި އެކު ރައީސުލްޖުމްހޫރިއްޔާ ނިންމަވާފައިވާ ކަމަށެވެ. އެ ނިންމުން ތަންފީޒްކުރުމަށް ދިވެހިރާއްޖޭގެ އިމިގްރޭޝަން ޤާނޫނަށް އިސްލާހު ގެންނަން ޖެހޭ ކަމަށް މިނިސްޓަރ ހަލީލް ލިޔުމުން މަޖިލީހާއި ހިއްސާކުރެއްވި ޖަވާބުގައިވެއެވެ. ޑރ.ހަލީލުގެ ޖަވާބު މަޖިލީހަށް އިއްވަވައިދެއްވީ އަމީންއާއްމެވެ.

އެ ޤާނޫނަށް ހުށަހަޅާފައިވާ އިސްލާހު މި ވަގުތު އޮތީ މަޖިލީހުގެ ކޮމިޓީގައި ދިރާސާކުރުމުގެ މަރުހަލާގައި ކަމަށް ވެސް އެ މަނިކުފާނު ވަނީ ވިދާޅުވެފައެވެ. އަދި އެ އިސްލާހު ޤާނޫނަކަށް ވުމާއި އެކު އިސްރާއިލް ޕާސްޕޯޓްގައި ރާއްޖެ އެތެރެވުން މަނާކުރުމަށް ސަރުކާރުން ނިންމާފައިވާ ނިންމުން ތަންފީޒްވެގެން ދާނެ ކަމަށް މިނިސްޓަރ ވިދާޅުވިއެވެ.

އެހެންނަމަވެސް އެ މަސައްކަތް އަވަސް ކުރުމަށް މިނިސްޓަރ ވެސް އަދި މިނިސްޓްރީން ވެސް ކުރާ މަސައްކަތެއް ވަޒީރު ވިދާޅުވެދެއްވާފަ އެއް ނުވެއެވެ. ހަމައެހެންމެ ސަރުކާރުގެ ފުރިހަމަ މެޖޯރިޓީ އެއް އޮވެ މި މަޖިލީހުގައި އެ މަސައްކަތް ތާށިވެފައިވާ ސަބަބު ވެސް ވިދާޅުވެދެއްވިފަ އެއް ނުވެއެވެ.

މިނިސްޓަރގެ ޖަވާބުގައި ފަލަސްތީނު މީހުންގެ ހައްގުތައް ހިމާޔަތްކުރުމަށް ސަރުކާރުން ކެނޑިނޭޅި ވަކާލާތުކުރަމުންދާ ކަމަށް ފާހަގަކުރައްވާފައިވެއެވެ. އެގޮތުން ބައިނަލްއަޤުވާމީ އެކި ފޯރަމްތަކުގައި ވެސް ފަލަސްތީނަށް ލިބެމުންދާ އަނިޔާތަކާއި މެދު ވާހަކަދައްކާ އަޑު އުފުލަމުންދާ ކަމަށް ޑރ.ހަލީލް ވަނީ ވިދާޅުވެފައެވެ. ހަމައެހެންމެ އަރަބި، އިސްލާމީ ޤައުމުތަކާއި އެކު ފަލަސްތީނުގެ މިނިވަންކަން ހޯދާދިނުމަށް މަސައްކަތްތަކެއް ކުރެވެމުންދާ ކަމަށް އެ މަނިކުފާނު ވަނީ ވިދާޅުވެފައެވެ.

ފަލަސްތީނުގައި މިނިވަން ދައުލަތެއް އުފެދި އަމާންކަމާއި އެކު އެ ޤައުމުގެ ރައްޔިތުންނަށް ދިރިއުޅެވުމަކީ ޒަމާނުއްސުރެ ދިވެހި ސަރުކާރުން ގެންގުޅޭ ސިޔާސަތުކަމަށާ މިހާރުވެސް ރާއްޖެ ދެމި އޮތީ އެ ސިޔާސަތުގެ މަތީގައި ކަމަށް ހަލީލް ފާހަގަކުރެއްވިއެވެ. ބައިނަލްއަޤުވާމީ ފޯރަމްތަކުގައި އެކަމާއި މެދު އަޑު އުފުލުމުގެ އިތުރުން ކޯޓުތަކުގައި ކުރިއަށް ދާ ފަލަސްތީނާއި ގުޅުން ހުރި މުހިންމު ބައެއް މައްސަލަތަކުގައި ރާއްޖެއިން ބައިވެރިވަމުންދާ ކަމަށް ވެސް ވަޒީރު ވިދާޅުވިއެވެ. އަދި އެފަދަ ބައެއް މައްސަލަތަކުގެ ތަފްސީލް ވަޒީރުގެ ޖަވާބުގައި ހިމަނުއްވާފައިވެއެވެ.

މީގެ އިތުރުން ފަލަސްތީނުގެ ރައްޔިތުންނަށް މާލީ އަދި އެހެނިހެން އެހީތައް ފޯރުކޮށްދިނުމަށް ސަރުކާރުން މަސައްކަތްކުރަމުންދާ ކަމަށް އެ ޖަވާބުގައި ވިދާޅުވެފައިވެއެވެ.