އާތީ އަލުން ވިކްޓްރީ އަށް!

ފުރަތަމަ ޑިވިޝަންގައި ވާދަކުރުމަށް ތައްޔާރުވަމުން އަންނަ ވިކްޓްރީ ސްޕޯޓްސް ކުލަބުގެ ކޯޗަކަށް، މުޙައްމަދު އާތިފް (އާތީ) ހަމަޖައްސައިފި އެވެ.

ވިކްޓްރީ އިން ވަނީ އެ ޓީމުގެ ކޯޗުކަމާ އާތީ ހަވާލުވެފައިވާކަން ހާމަކޮށްފަ އެވެ. އަދި އެ ކުލަބުގެ އެއްބަސްވުމުގައި ވެސް އާތީ ވަނީ ސޮއި ކޮށްފަ އެވެ.

އާތީގެ އިރުޝާދުގެ ދަށުން ވިކްޓްރީން މިހާރު ވަނީ އެ ކުލަބުގެ ފަރިތަކުރުންތައް ވެސް ރަސްމީކޮށް ފަށައިފަ އެވެ. މިއީ ފަސް އަހަރު ދުވަހުގެ މެދު ކެނޑުމަކަށް ފަހު، ވިކްޓްރީ އަލުން ފުރަަތަމަ ޑިވިޝަންގައި ވާދަކުރާނެ ފުރަތަމަ ފަހަރެވެ.

މީގެ ކުރިން އާތީ ވިކްޓްރީގައި މަސައްކަތް ކޮށްފައި ވަނީ 2014 ވަނަ އަހަރު އެވެ. އޭގެ ފަހުން ވެސް އާތީ ވަނީ ފުރަތަމަ ޑިވިޝަންގެ ގިނަ ކުލަބުތަކަކަށް އިރުޝާދު ދީފަ އެވެ.

އެންމެ ފަހުން އާތީ މަސައްކަތް ކޮށްފައި ވަނީ އޮޑި ސްޕޯޓްސް ކުލަބުގަ އެވެ. އާތީގެ އިރުޝާދުގެ ދަށުން އެ ކުލަބުން ވަނީ މިދިޔަ އަހަރުގެ ދެ ވަނަ ޑިވިޝަން ފުޓުބޯޅަ މުބާރާތް ކާމިޔާބު ކޮށްފަ އެވެ.

މީގެ އިތުރުން ކުލަބު ވެލެންސިއާ، ކުލަބު އީގަލްސް، ޔުނައިޓެޑު ވިކްޓަރީ އަދި ޓީސީ ސްޕޯޓްސް ކުލަބަށް ވެސް އާތީ ވަނީ އިރުޝާދު ދީފަ އެވެ.

ވިކްޓްރީން ވަނީ ފުރަތަމަ ޑިވިޝަނަށް ތައްޔާރުވުމުގެ ގޮތުން ގިނަ ކުޅުންތެރިން ތަކެއްގެ ސޮއި ހޯދައި، ޓީމުގެ ސްކޮޑު ވަރުގަދަ ކޮށްފަ އެވެ.