އެމްޑީޕީން ސަރުކާރު ޖަވާބުދާރީކުރުމަށް ކުރިއަށްގެންދާ މުޒާހަރާތެރެއިން ދެމީހަކު ހައްޔަރުކޮށްފިއެވެ.

އެމްޑީޕީން އާދީއްތަ ދުވަހުގެރޭ ކުރިއަށްގެންދާ މުޒާހަރާގައި މުޒާހަރާއަށް ފުލުހުން ހުރަސްއަޅައި ހައްޔަރުކޮށްފައިވަނީ އެމްޑީޕީގެ މައްޗަން ގޮޅި ދެކުނު ދާއިރާގެ ރައީސް އިބްރާހިމް އަބްދުﷲ (ގައްބަރޭ) އާއި މައްޗަންގޮޅި މެދު ދާއިރާގެ ރައީސް އަހުމަދު ޝަޒީންއެވެ.

އެ ދެމީހުން ފުލުހުން ހައްޔަރުކޮށްފައިވަނީ ސަރުކާރާއި ދެކޮޅަށް އަޑު އުފުލަމުންދަނިކޮށް، ސަބަބެއް ހާމައެއް ނުކޮށެވެ.

އެމްޑީޕީން ކުރިއަށްގެންދިޔަ މުޒާހަރާގެ ތެރެއަށް ފުލުހުން ކުއްލިއަކަށް ވަދެ މުޒާހަރާގެ ބައިވެރިއެއް ވެއްޓުމުން އޭނާއަށް އެހީތެރިވުމަށް މުޒާހަރާގެ އެހެން ބައިވެރިން ދާން އުޅުމުން ފުލުހުން އެކަމަށް ހުރަސް އަޅައި، އާންމުން ކޮއްޕަން ފެށިއެވެ. އަދި އާންމުން ކުރިއަށްޖެހެން މަސައްކަތް ކުރުމުންވެސް ފުލުހުން ބާރުގެ ބޭނުންކޮށް މުޒާހަރާގެ ބައިވެރިން ކޮއްޕާ ފަހަތަށް ޖައްސަން އުޅެފައިވެއެވެ.

އަދި ކުއްލިއަކަށް މުޒާހަރާ ކުރަމުންދިޔަ މީހުންގެ ތެރެއަށް ވަދެ ރާއްޖެޓީވީގެ ނޫސްވެރިޔާގެ ބުރަކަށީގައި އަތުން ޖަހާ ކޮއްޕާލާ މުޒާހަރާގެ ބައިވެރިންގެ ތެރެއިން ގައްބަރޭއާއި ޝަޒީން ހައްޔަރުކޮށްފައިވެއެވެ. ގައްބަރޭ ހައްޔަރުކުރީ ސައިކަލު ކައިރީގައި ހުއްޓައެވެ. އަދި ޝަޒީން ހައްޔަރުކުރީ މުޒާހަރާގެ ބައިވެރިންގެ ތެރޭގައި އަޑު އުފުލަން ހުއްޓައެވެ.

މުޒާހަރާ ހޫނުވެ ދެން ފެނިގެންދިޔައީ ފުލުހުން އާންމުން ކޮށްޕާ ވައްޓާލަން ފެށި ތަނެވެ. އަދި މި މަންޒަރު ފެނިގެންދިޔައީ އެއް ފުލުހެއްގެ ފަރާތުންނެވެ. މުޒާހަރާގެ ބައިވެރިން ފަހަތަށް ޖެހުމުންވެސް ފުލުހުން އިންޒާރުދީ އާންމުން ކޮއްޕަމުން ދިޔަތަން ފެނިފައިވެއެވެ. އަދި އަންހެން ފުލުހުން ތިއްބާ ފިރިހެން ފުލުހުން އަންހެނުން ގައިގައި އަތްލާ ކޮއްޕަމުން ގޮސްފައިވެއެވެ.