ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދާ، އެފްއޭއެމްގެ ވެޓަރަންސް ލީގުގެ ގުރޫޕު ބީގައި ދަ ގްރާންޑޭ އިން ކުޅުނު ދެ ވަނަ މެޗުގައި، ޕޮލިސް ކުލަބުގެ މައްޗަށް ކުރި ހޯދައިފި އެވެ.

ލީގުގައި ދަ ގްރާންޑޭގެ ފުރަތަމަ މެޗުގައި އެ ޓީމު ބައްދަލު ކޮށްފައި ވަނީ މުއިވެޔޮއާ އެވެ. އެ މެޗު ނިމުނީ ދެ ޓީމު ވެސް އެއްވަރުވެގެންނެވެ.

ދަ ގްރާންޑޭގެ ދެ ވަނަ މެޗުގައި ހޮނިހިރު ދުވަހުގެ ހަވީރު، މާފަންނު ޓާފު ދަނޑުގައި ޕޮލިސްއާ ދެކޮޅަށް ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މިއީ މުބާރާތުގައި ޕޮލިސް ކުލަބުން ކުޅުނު ފުރަތަމަ މެޗެވެ.

މެޗުގައި ދަ ގްރާންޑޭ އިން ލީޑު ނަގާފައި ވަނިކޮށް، ޕޮލިސް އިން ނަތީޖާ ހަމަހަމަ ވެސް ކުރި އެވެ. ނަމަވެސް ފަހު ވަގުތުގައި ލަނޑު ޖަހައިގެން ދަ ގްރާންޑޭ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި ދަ ގްރާންޑޭ އަށް ލީޑު ނަގައިދިނީ ޝުއައިބް އެވެ. މެޗުގެ ދެ ވަނަ ހާފުގައި ނަސީމް ޖެހި ލަނޑުން، ޕޮލިސް ކުލަބުން ވަނީ މެޗުގެ ނަތީޖާ ހަމަހަމަ ވެސް ކޮށްފަ އެވެ. ނަމަވެސް މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޝަހީމް ވަނީ ލަނޑު ޖަހައި މެޗުން ދަ ގްރާންޑޭ މޮޅު ކޮށްދީފަ އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.