ރަމަޟާންމަހަކީ އަމާން އަދި ރައްކާތެރި މަހެއްގެ ގޮތުގައި ދެމެހެއްޓުމަށް ޚާއްސަ މަސައްކަތްތަކެއް ކުރަމުންދާ ކަމަށާއި، ފުލުހުން މަގުތަކުގައި ހަރަކާތްތެރިވާ މިންވަރު އިތުރުވާނެ ކަމަށް ފުލުހުންގެ ޚިދުމަތުން ބުނެފިއެވެ.

ރަމަޟާން މަހާއި ގުޅިގެން ފުލުހުންގެ އޮޕަރޭޝަންތަކަށް އައިސްފައިވާ ބަދަލާއި ގުޅިގެން ފުލުހުން ބުނީ މާލެ ސަރަހައްދުގެ މަގުތަކުގެ ސަލާމަތާއި ރައްކާތެރިކަން ކަށަވަރުކުރުމަށް ޚާއްސަ އޮޕަރޭޝަނެއް ވެސް ފަށާފައިވާ ކަމަށެވެ. އަދި ކޮންމެ އަހަރެއްގެވެސް ރޯދަމަހަކީ މާލޭގެ މަގުތައް އިތުރަށް ހަލަބޮލިވެ، ބާޒާރު ކުރުމަށް ގިނަ ބަޔަކު ނިކުންނަ މަހެއްގެ ގޮތުގައި ފާހަގަވާއިރު ޓްރެފިކްގެ މައްސަލަ ހައްލުކުރަން ކޮންމެ ރޯދަމަހަކާ ދިމާކޮށް މަސައްކަތް ކުރަމުންދާ ކަމަށެވެ.

އެގޮތުން މި ރޯދަމަހުވެސް މުދާ އުފުލުމަށާއި އެކި ބޭނުންތަކަށް މަގުމަތީގައި ދުއްވާ އުޅަނދުތަކަށާއި، ހިނގާ ބިގާވެ އުޅޭ މީހުންނަށް ފަސޭހައިން މަގު ބޭނުން ކުރެވޭނެ ގޮތްތަކެއް ފަހި ކުރުމަށް މަސައްކަތް ކުރަމުންދާ ކަމަށާއި، އަމާން ރައްކާތެރި މާހައުލެއް ދެމެހެއްޓުމަށް އިސްކަން ދޭ ކަމަށް ފުލުހުން ބުނެއެވެ.

ރޯދަމަހު މާލޭގައި ޓްރެފިކް އެންމެ ބާރު ބޮޑުވާ ސަރަހައްދުތަކުގައި ޓްރެފިކް މެނޭޖްކުރުމުގެ މަސައްކަތް ކުރަމުންދާކަން ފާހަގަކޮށް ފުލުހުން ބުނީ ޚާއްސަ އިސްކަމެއް ދީގެން ބާޒާރުމަތި ސަރަހައްދުގެ ޓްރެފިކް މެނޭޖްކުރުމުގެ މަސައްކަތް ކުރަމުންދާ ކަމަށާއި، ދަތިނުވާނެ ގޮތަށް އިންތިޒާމުތައް ހަމަޖައްސަމުންދާ ކަމަށެވެ. އަދި މާލެއާއި ހުޅުމާލެ ހިމެނޭހެން މަގުތައް ޕެޓްރޯލްކުރުމާއި، ދުއްވާ އުޅަނދުތަކަށް ފަސޭހަކުރުމަށް ޓްރެފިކް ފްލޯއަށް ބައެއް ބަދަލުތައް ގެނެސްފައިވާ ކަމަށެވެ. ފުލުހުން ބުނީ މާލޭގެ ބޮޑެތި މަގުތަކުގެ އިތުރުން ބްރިޖާއި ހައިވޭ ސަރަހައްދު އަދި ހުޅުމާލޭގައިވެސް ބާރުބޮޑުވާ ގަޑިތަކުގައި ޓްރެފިކް ފްލޯ ބަލަހައްޓަމުންދާ ކަމަށެވެ.

މީގެ އިތުރުން ފުލުހުން ބުނީ މިދިޔަ މަހުގެ 15 ވަނަ ދުވަހުން ފެށިގެން ބާޒާރު މައްޗަށް ވަކި ޓީމެއް ކަނޑައަޅައިގެން ޕާކުކޮށްފައި ހުރި އުޅަނދުތައް ނެގުމާއި، ޕޭމަންޓާއި ޕޭމަންޓްމަތީގަ އާއި ޒޯންތަކުގައި ކުނި ބަހައްޓަފައި ހުރި ފަރާތްތަކަށް ނަސޭހަތްދިނުން ފަދަ ކަންކަން ރޭވުންތެރިކަމާއެކު ކުރަމުންދާ ކަމަށެވެ.

ފުލުހުން ބުނީ ބާޒާރުމަތީ ފިހާރަތަކާއި ބޯޓު ފަހަރުތަކުގައި މަސައްކަތް ކުރާ ފަރާތްތަކަށް މަގުމަތީގެ ސަލާމަތާއި ރައްކާތެރިކަމާ ގުޅޭ މައުލޫމާތު ދިނުމުގެ ހަރަކާތެއް ފަށާފައިވާ ކަމަށެވެ.

މި މަސައްކަތްތައް ކާމިޔާބު މަސައްކަތްތަކަކަށް ހެދުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށާއި، ހެދިފައިވާ ގަވާއިދުތަކަށް ރައްޔިތުން ބޯލަނބައި އަމަލުކުރުމަށް ފުލުހުން އެދިފައިވެއެވެ.