ކޯޓުގެ ހުރުމަތް ކެނޑީކަމަށް ބުނެ އެޓާނީ ޖެނެރަލް އުޝާމަށް ފިޔަވަޅު އަޅައިދޭން ސުޕްރީމް ކޯޓުގައި އެދިއްޖެ
މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭގޮތަށް ގާނޫނުއަސާސީ ބަދަލުކުރި މައްސަލައިގައި ޖަވާބުދާރީ ވާން ސުޕްރީމް ކޯޓުން ދައުލަތަށް ދިން 10 ދުވަހުގެ މުއްދަތު ހަމަވިއިރު ވެސް ޖަވާބުދާރީވެފައި ނުވޭ
އެޓާނީ ޖެނެރަލް (އޭޖީ) އަހުމަދު އުޝާމް: މެންބަރުންގެ ގޮނޑި ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭގޮތަށް ގާނޫނުއަސާސީ ބަދަލުކުރި މައްސަލައިގައި ޖަވާބުދާރީ ވާން ސުޕްރީމް ކޯޓުން ދައުލަތަށް ދިން 10 ދުވަހުގެ މުއްދަތު ހަމަވިއިރު ވެސް ޖަވާބުދާރީވެފައި ނުވޭ
އެޓާނީ ޖެނެރަލް (އޭޖީ) އޮފީހުން ސުޕްރީމް ކޯޓުން ކުރި އަމުރަކާ ޚިލާފުވެ، ކޯޓުގެ ހުރުމަތް ކަނޑާފައިވާ ކަމަށް ބުނެ، އެޓާނީ ޖެނެރަލް އުޝާމަށް ފިޔަވަޅު އަޅައިދޭން އެދި ސުޕްރީމް ކޯޓަށް ސިޓީއެއް ހުށަހަޅުއްވައިފިއެވެ.
މަޖިލިސް މެންބަރުންގެ މެންބަރުކަން ގެއްލުވައިލުމުގެ ބާރު ސިޔާސީ ޕާޓީތަކަށް ލިބޭގޮތަށް ގާނޫނުއަސާސީ ބަދަލުކުރި މައްސަލައިގައި ޖަވާބުދާރީ ވާން ސުޕްރީމް ކޯޓުން ދައުލަތަށް ވަނީ 10 ދުވަހުގެ މުއްދަތެއް ދީފައެވެ. އެހެން ނަމަވެސް މި މުއްދަތު ހަމަވިއިރު ވެސް ޖަވާބުދާރީވެފައި ނުވެއެވެ.
އަދި ސަރުކާރަށް ދީފައިވާ މި މުއްދަތު ހަމަވި އިރުވެސް ޖަވާބުދާރީ ނުވުމަކީ އެ ކޯޓުގެ ހުރުމަތް ކަނޑައިލުމުގެ އަމަލަކަށް ވާތީ ދައުލަތުގެ ބަންޑާރަނައިބަށް ފިޔަވަޅު އަޅައިދިނުމަށް ސުޕްރީމް ކޯޓުގައި ވަނީ އެދިފައެވެ.
ބަންޑާރަނައިބަށް ފިޔަވަޅު އަޅައިދޭން އެދި ސުޕްރީމް ކޯޓަށް ސިޓީ ހުށަހެޅީ، ގާނޫނުއަސާސީ ބަދަލުކުރި މައްސަލަ ވެސް އެ ކޯޓަށް ހުށަހެޅި، ކެންދޫ ދާއިރެގެ ކުރީގެ މެންބަރު، އަލީ ހުސެއިން އެވެ.
ރައްޔިތުންގެ މަޖިލީހުގެ މެންބަރުން އިންތިޚާބުވީ ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލްކޮށްދިނުމަށް އެދި ސުޕްރީމް ކޯޓަށް މައްސަލަ ހުށަހެޅުއްވީ އަލީ ހުސެއިން އެވެ.
މިދިޔަ ފެބްރުއަރީ 18ގައި ސުޕްރީމް ކޯޓުގައި ބޭއްވި މި މައްސަލައިގެ އަޑުއެހުމުގައި، ދައުލަތުގެ ފަރާތުން އެދުނު ގޮތަށް ފަނޑިޔާރުންގެ ބެންޗުން ނިންމީ ޖަވާބުދާރީވުމަށް 10 ދުވަހުގެ ފުރުސަތެއް ދިނުމަށެވެ. ނަމަވެސް 28 ފެބުރުއަރީއަށް މި މުއްދަތް ހަމަވި އިރުވެސް ދައުލަތުން ޖަވާބުދާރީ ވެފައި ނުވާކަން ވަނީ ފާހަގަކޮށްފައެވެ.
ހަވާލާދީފައިވާ މައްސައާއި ގުޅިގެން 18 ފެބުރުއަރީ 2025 ވަނަ ދުވަހު ބޭއްވުނު ޝަރީއަތުގެ އަޑުއެހުމުގައި، މި މައްސަލަ މައުލޫއީ ގޮތުން ކުރިއަށް ގެންދިއުމަށް ނިންމައި، މައުލޫއީ ގޮތުން މައްސަލައަށް ޖަވާބުދާރީވުމަށް މައްސަލަ ރައްދުވާ އެޓަރނީ ޖެނެރަލްގެ އޮފީސް (ދައުލަތް) އަށް 10 ދުވަހުގެ ފުރުސަތެއް ދިނުމަށް ނިންމާފައިވެއެވެ. އެ މުއްދަތު 28 ފެބުރުއަރީ 2025 ގެ ނިޔަލަށް ވަނީ ހަމަވެފައެވެ.ކެންދޫ ދާއިރާގެ ކުރީގެ މެންބަރު، އަލީ ހުސެއިން ސުޕްރީމް ކޯޓަށް ފޮނުއްވި ސިޓީ
އެހެން ނަމަވެސް މިއަދާ ހަމައަށް ވެސް އޭޖީ އޮފީހުން އެ މައްސަލައިގެ ޖަވާބު ފޮނުވާފައިނުވާއިރު، ޖަވާބު ހުށަހެޅުމުގެ މުއްދަތު އިތުރުކޮށްދިނުމަށް އެދި ވެސް ހުށަހެޅުމެއް ހުށަހަޅާފައިނުވާ ކަމަށް އެ ސިޓީގައިވެއެވެ.
ރާއްޖޭގެ ސުޕްރީމް ކޯޓުގެ ގަވާއިދުގެ ދަށުން ޝަރީއަތުގެ މަޖިލީހުގައި ފަނޑިޔާރުން ކުރާ އަމުރުތަކަށް ކިޔަމަންވުމަކީ އެ އަމުރު ރައްދުވާ ފަރާތަށް ލާޒިމު ކަމެކެވެ. އަދި ފަނޑިޔާރުންގެ އަމުރުތަކަށް ކިޔަމަންނުވުމަކީ ކޯޓުގެ ހުރުމަތް ކެނޑުމުގެ އަމަލެއް ކަމަށް ބެލެވޭނެ ކަމަށް ވެސް އެ މާއްދާގައި އޮވެއެވެ.
އެހެންވެ އަލީ ހުސެއިން ފޮނުއްވި ސިޓީގައިވަނީ ރާއްޖޭގެ ސުޕްރީމް ކޯޓުގެ އަމުރާ ޚިލާފުވެ، ކޯޓުގެ ހުރުމަތް ކަނޑާފައިވާ ކަމަށް ބުނެ، ބަންޑާރަނައިބު އަހުމަދު އުޝާމްގެ މައްޗަށް ފިޔަވަޅު އަޅުއްވައިދެއްވުމަށެވެ. އަދި ހިނގަމުންދާ މައްސަލައިގެ ޖަވާބު ފޯމު ހުށަހެޅުމަށް އޭޖީ އޮފީހަށް އަންގައިދިނުމަށެވެ.
ސުޕްރީމް ކޯޓުގައި މި މައްސަލަ ބައްލަވަމުން ގެންދެވީ މުޅި ބެންޗުންނެވެ. ރިޔާސަތު ބަލަހައްޓަވަނީ އުއްތަމަފަނޑިޔާރު އަޙްމަދު މުޢުތަސިމް ޢަދުނާނެވެ. ދެން ބެންޗުގައި ތިއްބެވީ، ފަނޑިޔާރު ޑރ. އަޒްމިރާލްދާ ޒާހިރާއި، ފަނޑިޔާރު ޢާއިޝާ ޝުޖޫން މުޙައްމަދާއި، ފަނޑިޔާރު މަޙާޒު ޢަލީ ޒާހިރާއި، ފަނޑިޔަރު ޙުސްނުއްސުއްސުޢޫދުގެ އިތުރުން، ފަނޑިޔާރު ޢަލީ ރަޝީދު ޙުސައިން، އަދި ފަނޑިޔާރު ޑރ. މުޙައްމަދު އިބްރާހީމެވެ.
މި މައްސަލަ ބަލަމުން ދަނިކޮށް އެންޓި ކޮރަޕްޝަން ކޮމިޝަން (އޭސީސީ)ން ބަލަމުންދާ މައްސަލައަކާ ގުޅިގެން 26 ފެބްރުއަރީ 2026 ގައި ޖުޑީޝަލް ސާވިސަސް ކޮމިޝަން (ޖޭއެސްސީ)ން ހުސްނުއްސުއޫދާއި، ފަނޑިޔާރުން މަހާޒު އަލީ ޒާހިރާއި ޑރ. އަޒްމިރަލްދާ ޒާހިރު ސަސްޕެންޑުކުރިއެވެ.
