ރައީސް މުއިއްޒަށް ކުރިއަށް އޮތް 8 މަސް ނުވަތަ އަހަރު ދުވަހުގެ ތެރޭގައި މަޖިލީހުގެ ސުޕަ މެޖޯރިޓީ ގެއްލޭނެ: އިލްހާމް
ރައްޔިތުންގެ މަޖިލިސް މެންބަރުން އަތުލަފިކޮށްގެން ނުގެންގުޅެވޭނެ
ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ދަނގެތީ ދާއިރާގެ ކުރީގެ މެންބަރު އިލްހާމް އަހުމަދު ވާހަކަދައްކަވަނީ
ރައްޔިތުންގެ މަޖިލިސް މެންބަރުން އަތުލަފިކޮށްގެން ނުގެންގުޅެވޭނެ. މަނިކުފާނު ބޮޑިބޯނެ. ދެކޮޅަށް ވޯޓު ދޭނެ. ފާޑުކިޔާނެ.ސުޕަރ މެޖޯރިޓީ އަތުން ދޫވެގެންދާނެ. މިއީ ދުނިޔެމަތީގައި އާއްމުކޮށް ހިނގާކަންކަން. ކީއްވެގެންހޭ އެހެންވާންޖެހެނީ. ސަބަބުުތަކެއް ވެސް އެބަހުރި. އެއީ ރާއްޖޭގެ އެއްވެސް ރަށެއްގައި ޕްރޮޖެކްޓެއް ކުރިއަށް ނުދޭ. ރައްޔިތުންގެ ޕްރެޝަރ އިންތިހާއަށް ރައްޔިތުންގެ މަޖިލިސް މެންބަރުންނާ ދިމާލަށް އަންނާނެ. އާސަންދައާއި އެންސްޕާއަކީ ކުރީގައި ރައީސް ޔާމީންގެ ވެރިކަމުގައި ވެސް އިބްރާހިމް މުހައްމަދު ސާލިހުގެ ވެރިިކަމުގައި ވެސް އަދި އެހެން ވެރިކަންތަކުގައި ވެސް ވަރަށް ފަސޭހައިން ލިބޭ އެއްޗެއް. މިއަދު އެވަނީ މިހާރު ރާއްޖޭގައި ކާއްޓަކަށް ވެއްޖެ. ކާށީގެ ވެސް އަގު ބޮޑުވެއްޖެ. ނުލިބޭ ތަދު އެއްޗަކަށް ވެއްޖެ. މިހާރު އާސަންދައާއި ސްޕެއަރ ނުލިބޭނެ. މިހުރިހާ ޕްރެޝަރ ނަގަމުންދަނީ ރައްޔިތުން މަޖިލިސް މެންބަރުން.ރައްޔިތުންގެ މަޖިލީހުގެ ދަނގެތީ ދާއިރާގެ ކުރީގެ މެންބަރު އިލްހާމް އަހުމަދު
ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް 20 ވަނަ ރައްޔިތުން މަޖިލީހުގެ ސުޕަ މެޖޯރިޓީ ކުރިއަށް އޮތް 8 މަސް ނުވަތަ އަހަރު ދުވަހުގެ ތެރޭގައި ގެއްލިގެންދާނެ ކަމަށް ރައްޔިތުންގެ މަޖިލީހުގެ ދަނގެތީ ދާއިރާގެ ކުރީގެ މެންބަރު އިލްހާމް އަހުމަދު ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަލަސުރުހީ ޕްރޮގްރާމްގައި އިލްހާމް ވިދާޅުވީ ރައްޔިތުންގެ މަޖިލިސް މެންބަރުން އަތުލަފިކޮށްގެން ނުގެންގުޅެވޭނެ ކަމަށާއި، ކުރިއަށް އޮތްތަނުގައި މަޖިލިސް މެންބަރުން، ރައީސް މުއިއްޒާއި ދެކޮޅަށް ތެދެވެ، ފާޑު ވިދާޅުވާނެ ކަމަށެވެ. އަދި ދެކޮޅަށް ވޯޓުދޭނެ ކަމަށާއި، ސުޕަރ މެޖޯރިޓީ އަތުން ދޫވެގެންދާ މަންޒަރު ފެންނާނެ ކަމަށް އިލްހާމް ވިދާޅުވިއެވެ.
މިސަރުކާރުގައި ރައްޔިތުންގެ މަޖިލީހުގެ މެންބަރުން ވަރަށް ބޮޑަށް ޕްރެޝަރ ނަގަމުންދާކަން ފާހަގަކުރައްވައި އިލްހާމް ވިދާޅުވީ އެއްވެސް ރަށެއްގައި ތަރައްގީގެ މަޝްރޫއުތައް ކުރިއަށް ނުދާ ކަމަށާއި، ކުރީ ސަރުކާރުތަކުގައި ވެސް ފަސޭހައިން ރައްޔިތުންނަށް ލިބެމުންދިޔަ ޚިދުމަތްތައް ލިބެމުން ނުދާ ކަމަށެވެ. އެގޮތުން މިއަދު އާސަންދަ، އެންސްޕާގެ ޚިދުމަތް ނުލިބޭކަން އޭނާ ފާހަގަކުރެއްވިއެވެ.
އިލްހާމް ވިދާޅުވީ މިއަދުގެ ރައްޔިތުންގެ މަޖިލިސް މެންބަރުންނަކީ ވަރަށް ނިކަމެތި ބައެއް ކަމަށާއި، އާރެއް ބާރެއް ނެތް ކަމަށެވެ.
މަޖިލީހުގެ މަސައްކަތްތަކަށް އިޝާރާތް ކުރައްވައި އިލްހާމް ވިދާޅުވީ މިއަދު މެންބަރުންނަށް އަންނަނީ އޯޑަރު ކަމަށާއި، އެއޯޑަރާ އެއްގޮތަށް މަސައްކަތް ކުރަންޖެހޭ ކަމަށެވެ. އެއްވެސް ކަމަކާއި ގުޅިގެން މަޝްވަރާކޮށްލުމުގެ ފުރުސަތު ވެސް މެންބަރުންނަށް ނުލިބޭ ކަމަށް އޭނާ ވިދާޅުވިއެވެ.
އިލްހާމް ވިދާޅުވީ މިގޮތަށް މެންބަރުން ނުގެންގުޅެވޭނެ ކަމަށާއި، ކުރިއަށް އޮތް 8 މަސް ތެރޭގައި ނުވަތަ އަހަރު ދުވަހުގެ ތެރޭގައި ރައީސް މުއިއްޒަށް އޮތް މެޖޯރިޓީ ގެއްލޭ މަންޒަރު ފެންނާނެ ކަމަށެވެ. އޭނާ ވިދާޅުވީ ގޮނޑި ގެއްލުނު ނަމަވެސް ބައެއް ބޭފުޅުން ކެރިގެން ނުކުންނާނެ ކަމަށާއި، މިހާރު ވެސް އެފަދަ މަންޒަރުތައް ފެންނަމުންދާ ކަމަށެވެ. އަދި މިއީ 200 ޕަސެންޓް ހިނގާނެ ކަންކަން ކަމަށް އިލްހާމް ވިދާޅުވިއެވެ.
