ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ސްޕެއިންގެ ބާސެލޯނާއާ ދެކޮޅަށް ކުޅޭ މެޗުގައި، ބެންފީކާ އަށް ކުޅެމުން އަންނަ އާޖެންޓީނާގެ އެންހެލް ޑި މާރިއާ އަށް ނުކުޅެވޭނެކަން ކަށަވަރުވެއްޖެ އެވެ.

ބުދަ ދުވަހުގެ ރޭ ދަންވަރު ބާސެލޯނާއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ބެންފީކާގެ ކޯޗު ބްރޫނޯ ލޭޖް ބުނީ އެ މެޗުގައި ޑި މާރިއާ އަށް ނުކުޅެވޭނެ ކަމަށެވެ.

ޑި މާރިއާގެ އިތުރުން ބެންފީކާގެ ފްލޮރެންޓިނޯ ލުއިސް އަށް ވެސް ނުކުޅެވޭނެ އެވެ. ހަމައެހެންމެ މިހާރު ވެސް އަނިޔާގައި ހުރި އެ ޓީމުގެ އެލެގްޒެންޑާ ބާހް އަދި މަނޫ ސިލްވާ އަށް ވެސް އެ މެޗުގައި ނުކުޅެވޭނެ އެވެ.

ބާސެލޯނާގެ މެޗުގެ ކުރިން އަންގާރަ ދުވަހު ބެންފީކާ އިން ކުރިއަށް ގެންދިޔަ ފަރިތަކުރުންތަކުގައި ވެސް ޑި މާރިއާ ބައިވެރިނުވެ އެވެ. ޑި މާރިއާ އަދި ލުއިސް އަށް ވެސް ލިބިފައި ވަނީ ފައިގެ މަސްގަނޑުގެ އަނިޔާއެއް ކަމަށް ވަނީ ރިޕޯޓުކޮށްފަ އެވެ.

ބެންފީކާގެ އަމިއްލަ ދަނޑުގައި ކުޅޭ ފުރަތަމަ ލެގުގައި މި ދެ ކުޅުންތެރިންނަަށް ނުކުޅެވުނު ނަމަވެސް، ދެ ވަނަ ލެގުގައި އެ ދެ ކުޅުންތެރިންނަށް ކުޅެވޭނެ ކަމުގެ އުންމީދެއް އޮތް ކަމަށް ލޭޖް ވަނީ ބުނެފަ އެވެ.

ބުދަ ދުވަހުގެ ރޭ ދަންވަރު ބާސެލޯނާ އާއި ބެންފީކާ ބައްދަލު ކުރާއިރު، މި ސީޒަންގެ ޗެމްޕިއަންސްް ލީގުގެ ލީގު ބުރުގައި ވެސް މި ދެ ޓީމު ވަނީ ބައްދަލުކޮށްފަ އެވެ. ވާދަވެރި އެ މެޗު ބާސެލޯނާ އިން ކާމިޔާބު ކުރީ 5-4 އިންނެވެ.