އައްޑޫ ބިޔުރޯ

ފެބުރުވަރީ 2025 ގެ ޖީ.އެސް.ޓީ، އޭ.ޓީ.އެފް އަދި ގްރީން ޓެކްްސް ބަޔާން ހުށަހެޅުމާއި ފައިސާ ދެއްކުމުގެ ސުންގަޑި 29މާރިޗު 2025 އަށް ބަދަލުކޮށްފައިވާ ކަމަށް މޯލްޑިވްސް އިންލަންޑް ރެވެނިއު އޮތޯރިޓީން ބުނެފިއެވެ.

މީރާއިން އާންމުކުރި ބަޔާނެއްގައި ވަނީ 29 މާރިޗު 2025 ވާ ހޮނިހިރު ދުވަހަކީ މީރާގެ ރަސްމީ މަސައްކަތު ދުވަހެއް ކަމަށާއި 29 މާރިޗު 2025 ގެ ހެނދުނު 09:30 އިން މެންދުރު 12:30 އަށް މީރާގެ ކައުންޓަރުތަކާއި މީރާގެ ހޮޓްލައިން 1415 އާއި ވެބްސައިޓްގެ ލައިވްޗެޓް އާއި ވައިބަރ ނަންބަރު 9821415 އިން ޚިދުމަތް ލިބޭނެ ކަމަށެވެ.

އަދި 2025 ވަނަ އަހަރުގެ ފެބުރުއަރީ މަހަށް ހުށަހަޅަންޖެހޭ ޖީއެސްޓީ ބަޔާނާއި، އެއަރޕޯޓް ޓެކުހާއި، ފީގެ ބަޔާނާއި ގްރީން ޓެކްސް ބަޔާން ހުށަހަޅައި ފައިސާ ދެއްކުމުގެ ސުންގަޑި ކަމަށްވާ 28 މާރޗް ކަމަށްވާއިރު، އެދުވަސް ހުކުރު ދުވަހަކަށް ދިމާވާތީ އެބަޔާންތައް ހުށަހަޅައި ފައިސާ ދެއްކުމުގެ އައު ސުންގަޑިއަކީ 29 މާރިޗު 2025 ވާ ހޮނިހިރު ދުވަސް ކަމަށްވެސް މީރާއިން ވަނީ ބުނެފައެވެ.

އެހެންކަމުން ސުންގަޑިއަށް ހުށަހަޅަންޖެހޭ ޓެކްސް ބަޔާންތައް ހުށަހެޅުމާއި ފައިސާ ދެއްކުމާއި ގުޅޭ އެންމެހައި ކަންކަން ދުރާލާ އިންތިޒާމްކޮށް، ކަނޑައެޅިފައިވާ ސުންގަޑިއަށް އެ އިންތިޒާމްތައް ފުރިހަމަކުރުމަށް ޓެކްސް ދައްކާ ފަރާތްތަކަށް މީރާއިން ވަނީ އިލްތިމާސްކޮށްފައެވެ.