ޣައްޒާއަށް އިންސާނީ އެހީ ވެއްދުން އާދިއްތަ ދުވަހުން ފެށިގެން އިސްރާއީލް ސަރުކާރުން މުޅިން ހުއްޓުވައިފިއެވެ.

މިއީ ޣައްޒާ ހަނގުރާމަ ހުއްޓުވުމުގެ އެއްބަސްވުމުގެ ފުރަތަމަ މަރުހަލާގެ މުއްދަތު އިތުރު ކުރަން ހަމާސް އިން އިންކާރު ކުރުމުން އިސްރާއީލުން އެޅި ފިޔަވަޅެއް ކަމަށް ވަނީ ބުނެފައެވެ.

ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ އަށް ދިއުމުގެ ބަދަލުގައި އެމެރިކާ ގެ ސަޕޯޓާ އެކު އިސްރާއީލުން ބޭނުންވަނީ ފުރަތަމަ މަރުހަލާގެ މުއްދަތަު ދިގު ދަންމައިގެން އިސްރާއީލުން ބޭނުންވާ ކަންކަން ހާސިލު ކުރާށެވެ.

ހަނގުރާމަ ހުއްޓުމުގެ އެއްބަސްވުމުގެ ފުރަތަމަ ފިޔަވަހި ހޮނިހިރު ދުވަހު ނިމުމަކަށް އައިސްފައިވާއިރު، އިސްރާއީލްގެ ބޮޑުވަޒީރު ބެންޖަމިން ނެތަންޔާހޫގެ އޮފީހުން ބުނެފައިވަނީ ރައީސް ޓްރަމްޕްގެ އެންވޯއީ ސްޓީވް ވިޓްކޮފްގެ ހުށަހެޅުމަށް ހަމާސްއިން އިންކާރުކޮށްފައިވާ ކަމަށެވެ.

ހަމާސްގެ ބަހުރުވައިން މިއީ "ޗީޕް ބްލެކްމެއިލް" ކުރުން ކަމަށާއި ހަނގުރާމަ ހުއްޓުމުގެ އެއްބަސްވުމަށް ދެކޮޅަށް އިސްރާއީލުން ހިންގި "ބަޣާވާތެއް" ކަމަށެވެ. އަދި ހަނގުރާމަ ހުއްޓުމުގެ އެއްބަސްވުމުގެ މެދުވެރިންގެ ދައުރު އަދާ ކުރި ގައުމުތަކުން މި މައްސަލައިގެ ތެރެއަށް ވަނުވަމަށް ވެސް ހަމާސް އިން ވަނީ ގޮވާލާފައެވެ.

ހަމާސްއިން ބޭނުންވަނީ އެއްބަސްވުމުގެ ދެވަނަ ފިޔަވަހީގެ މަޝްވަރާތައް ފުރަތަމަ އެއްބަސްވެވުނު ގޮތަށް ކުރިއަށް ގެންދިއުމެވެ. އަދި ދެވަނަ ފިޔަވަހީގެ ތެރެއިން ޣައްޒާ ގައި ތިބި ރަހީނުން ދޫކޮށްލުމާއި، އިސްރާއީލު ޖަލުތަކުގައި ތިބި ފަލަސްތީނު މީހުން ދޫކޮށްލުމާއި ޣައްޒާ އިން އިސްރާއީލު ސިފައިން ފައިބައިގެން ދިއުން ކުރިއަށް ގެންދިއުމަށެވެ.

ހަނގުރާމަ ހުއްޓާލުމުގެ އެއްބަސްވުމުގެ މެދުވެރިންގެ ދައުރު އަދާކުރި އެމެރިކާ އާއި ގަތަރާއި، މިސްރުން ގެެރެންޓީ ނުދެނީސް ފުރަތަމަ މަރުހަލާގެ މުއްދަތު ދިގު ކުރަން އެއްބަސް ނުވާނެ ކަމަށް ހަމާސް އިން ކުރިން ބުނެފައިވެއެވެ.

ނަތަންޔާހޫގެ އޮފީހުން ނެރުނު ބަޔާނުގައި ބުނެފައިވަނީ ހަމާސް އިން ރަހީނު ކޮށްފައިވާ އެންމެން ދޫކޮށްލުމުން ނޫނީ ހަނގުރާމަ ހުއްޓުމަކަށް އިސްރާއީލުން އެއްބަސް ނުވާނެ ކަމަށެވެ. އަދި އެކަމަށް ހަމާސް އިން އިންކާރުކުރުން ކުރިއަށް ގެންދާނަމަ އިތުރު ފިޔަވަޅުތައް އަޅާނެ ކަމަށްވެސް ބުނެފައިވެއެވެ.

އެހީގެ ތަކެތި ޣައްޒާ އަށް އެތެރެކުރުން މުޅިން ހުއްޓުވުމުން ހަމާސްގެ ތަރުޖަމާނު ވިދާޅުވީ، މިކަމުންވެސް އެ ފެނިގެން ދަނީ އިސްތިއުމާރީ ބާރުގެ ހުތުރު މޫނުގެ އަސްލު ސިފަ ކަމަށެވެ.

ރޭގެ ވަގުތެއްގައި ނަތަންޔާހޫގެ އޮފީހުން ބުނީ އެމެރިކާ އިން ހުށަހެޅި ހުށަހެޅުމަކަށް 6 ހަފްތާގެ މުއްދަތައް ހަމަލާތައް މެދުކަނޑާލާއި މުސްލިމުންގެ ރޯދަ އާއި ޔަހޫދީންގެ ދީނީ 'ޕާސް އޯވަރ' ދުވަސްތަކުގައި ހަމާލާ ނުދޭން ނިންމާފައިވާ ކަމަށެވެ.

މި މުއްދަތު ނިމޭއިރު އެއްބަސްވުަމަކާ ހަމައަށް ނުދެވިއްޖެ ނަމަ ހަނގުރާމަ އަށް އެނބުރި ދިއުމުގެ ހައްގު އެމީހުންނަށް ލިބިގެންވާ ކަމަށް އިސްރާއީލުން ވަނީ ބުނެފައެވެ.

ނަތަންޔާހޫގެ އޮފީހުން ބުނެފައިވަނީ ފުރަތަމަ މަރުހަލާ 6 ހަފްތާ އަށް އިތުރު ކުރަން ހަމާސް އިން އެއްބަސްވާއިރަށް އިސްރާއީލުން ދެ ވަނަ ފިޔަވަހީގެ މަޝްވަރާ ތަކަށް ދާން ތައްޔާރަށް އޮތް ކަމަށެވެ.

ހަމާސް އިން ވަނީ އިސްރާއީލުގެ މި ހުށަހެޅުން ބަލައި ނުގަންނާނެ ކަމަށާއި، ފުރަތަމަ އެއްބަސްވި ގޮތައް ކުރިއަށް ދާން ތައްޔާރަށް އޮތް ކަމަށް ބުނެފައެވެ.

އެހީދޭ ފަރާތްތަކުން ވަނީ އެހީގެ އެއްވެސް ގާފިލާ އެއް އިސްރާއީލުން ހުރަސް އަޅާ ޣައްޒާ އަށް އެތެރެވިޔަ ނުދިން ކަމަށް ބުނެފައެވެ.

ޖަނަވަރީގެ މެދުތެރޭގައި ހަނގުރާމަ ހުއްޓާލަން އެއްބަސްވުމާއެކު އެތައް ހާސް ލޮރީގެ ތަކެތި ކޮންމެ ހަފްތާއަކު ޣައްޒާ އަށް ދިޔައީ އެތެރެ ވަމުންނެވެ.

އަނެއްކޮޅުން އާދިއްތަ ދުވަހު އިސްރާއީލު ސިފައިން ހަމަލާ ދީ ޣައްޒާ އިން ހަތަރު މީހުން ވަނީ ޝަހީދު ކޮށްލާފައެވެ.