ވޭތުވެދިޔަ 24 ގަޑިއިރުގެ ތެރޭގައި ކ. ދިއްފުއްޓަށް 296.1 މިލިލީޓަރުގެ ވާރޭ ވެހިފައިވާ ކަމަށާއި، މިއީ ރިކޯޑު އަދަދެއް ކަމަށް މޫސުމާބެހޭ ގައުމީ އިދާރާއިން ބުނެފިއެވެ.

ފަށާއިރު ޕްރޮގްރާމަށް މީޓިއަރޮލޮޖިސްޓް، އެމްއެމްއެސް އާމިނަތު ރަޝީދާ ވިދާޅުވީ، ކ އަތޮޅަށް ވަރަށް ބޯކޮށް ވާރޭވެހިފައިވާ ކަމަށާއި، ދިއްފުއްޓަށް 296.1 މިލިލީޓަރުގެ ވާރޭ ވެހިފައިވާ ކަމަށެވެ. މިއީ ރާއްޖޭގެ ރިކޯޑު އަދަދެއް ކަމަށް އޭނާ ވިދާޅުވިއެވެ. އަދި ވިދާޅުވީ ހުޅުމާލެ އަށް 185.5 މިލިމީޓަރުގެ ވާރޭ، ހުޅުލެ އަށް 177.2 މިލިމީޓަރުގެ ވާރޭ ވެހިފައިވާ ކަމަށާއި، މާލެއަށް ވެހުނު ވާރޭގެ އަދަދު ސިސްޓަމް ހަލާކުވެފައިވާތީ ރިކޯޑު ކުރެވިފައިނުވާ ކަމަށް ރަޝީދާ ވިދާޅުވިއެވެ.

ރާއްޖޭގެ ހުރިހާ ހިސާބަކަށް ބޯކޮށް ވާރޭވެހިފައިވާކަން ފާހަގަކުރައްވައި ރަޝީދާ ވިދާޅުވީ ބ. ގޮއިދޫއަށް 166.3 މިލިމީޓަރުގެ ވާރޭ، ބ. ދަރަވަންދޫއަށް 159.6 މިލިމީޓަރުގެ ވާރޭ، އދ. މާމިގިއްޔަށް 127.0 މިލިމީޓަރުގެ ވާރޭ، ކ. ގާފަރަށް 124.4 މިލިމީޓަރުގެ ވާރޭ، އއ. ތޮއްޑޫއަށް 121.9 މިލިމީޓަރުގެ ވާރޭ އަދި ފ.ނިލަންދޫއަށް 178 މިލިމީޓަރުގެ ވާރޭ ވެހިފައިވާ ކަމަށެވެ.

މީގެ އިތުރުން ރަޝީދާ ވިދާޅުވީ މިހާރު ރާއްޖެއަށް ކުރަމުންދާ ވިއްސާރައަކީ ސްރީލަންކާގެ އިރުދެކުނުގައި އުފެދުނު ކޮޅިގަނޑަކާ ގުޅިގެން ކުރަމުންދާ ވިއްސާރައެއް ކަމަށެވެ. އަދި ހޯމަ ދުވަހު ބައެއް ހިސާބުތަކަށް ކެރީގެ އަސަރު ކުރާނެ ކަމަށާއި، އަންގާރަ ދުވަހު މޫސުން ރަނގަޅުވާނެ ކަމަށް ލަފާ ކުރެވޭ ކަމަށް އޭނާ ވިދާޅުވިއެވެ.

މޫސުމާބެހޭ ގައުމީ އިދާރާއިން އާއްމުކޮށްފައިވާ މައުލޫމާތަށް ބަލާއިރު، ރިކޯޑު އަދަދަކަށް ދިއްފުއްޓަށް ވާރޭ ވެހިފައިވާއިރު،12 އޮގަސްޓް 2024 ގައި ހއ. ކެލާއަށް 24 ގަޑިއިރުގެ ތެރޭގައި 231.5 މިލިމީޓަރުގެ ވާރޭ ވެހިފައިވެއެވެ. އޭގެ އިތުރުން 5ޑިސެމްބަރު 2018 ގައި މާލެއަށް 228.9 މިލިމީޓަރުގެ ވާރޭ ވެހިފައިވާ ކަމަށާއި، 24 ނޮވެމްބަރު 2015 ގައި ސ. ގަމަށް 228.4 މިލިމީޓަރުގެ ވާރޭ އަދި 9 ޖުލައި 2022 ގައި 219.8 މިލިމީޓަރުގެ ވާރޭ ވެހިފައިވެއެވެ.

މޫސުމާބެހޭ ގައުމީ އިދާރާއިން ބުނީ ކުރިއަށް އޮތް 24 ގަޑިއިރު ވެސް މޫސުން ގޯސްވާނެ ކަމަށެވެ. ހުޅަނގުއުތުރާއި އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި 40 މޭލު ބާރުމިނަށް ވައިގަދަވުން އެކަށީގެންވާ ކަމަށް އެއިދާރާއިން ބުނެއެވެ.

މޫސުމާބެހޭ ގައުމީ އިދާރާއިން ބުނީ އާދައިގެވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި، ރާޅުގެ އުސްމިނުގައި 6 ނުވަތަ 3 ފޫޓު ހުންނާނެ ކަމަށެވެ.

ވޭތުވެދިޔަ 24 ގަޑިއިރު ވެހުނު ވާރޭގެ ސަބަބުން މާލޭގެ އިތުރުން އަތޮޅުތެރޭގެ ބައެއް ރަށްތަކަށް ބޮޑެތި ގެއްލުންތަކެއް ލިބިފައިވާ ކަމަށެވެ. ގެތަކަށް ފެން ވަދެ، މުދަލަށް ގެއްލުން ވެފައިވެއެވެ.

މުޅި ރާއްޖޭގެ މޫސުން ގޯސްވެފައިވާތީ މޫސުމަށް ސަމާލުވުމަށް ވަނީ އިލްތިމާސްކޮށްފައެވެ.