ވާރޭވެހި މާލޭގެ ބައެއް މަގުތަކުގައި ފެންބޮޑުވާތީ ވެލި ބަސްތާ ޖަހަން ފަށައިފި
ބ. އަތޮޅުން ފެށިގެން ދ. އަތޮޅާ ދެމެދުގެ ސަރަހައްދަށް އޮރެންޖް އެލަޓް ވަނީ ނެރެފަ
ހޮނިހިރު ދުވަހުގެ ރޭ މާލެއަށް ހުއްޓުމެއްނެތި ވެހެމުންދާ ވާރޭގެ ސަބަބުން މަގުތަކުގައި ފެންބޮޑުވެ ގޭގެއަށް ގެއްލުން ވަނީ ލިބިފައި - 1 މާޗް 2025
ހުއްޓާ ނުލާ ހޮނިހިރު ދުވަހުގެ ރޭ ބޯކޮށް ވާރޭވެހުމުގެ ސަބަބުން މާލޭގެ ގެތަކަށް ފެން ވަންނަމުން ދާތީ އެމްއެންޑީއެފުން މާލޭގެ ފެން ބޮޑުވާ ހިސާބުތަކުގައި ވެލި ބަސްތާ ޖަހަން ފަށައިފިއެވެ.
އާންމު ފަރާތްތަކުން ހިއްސާ ކޮށްފައިވާ ވީޑިއޯ ތަކުން ފެންނަ ގޮތަކަށް ވަރަށް ބޮޑަށް ބައެއް ގޭގެ އަށް ވަނީ ފެން ވަދެ ތަކެއްޗަށް ގެއްލުންވެފައެވެ.
ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރައްވާފައިވާ ޕޯސްޓެއްގައި ވިދާޅުވެފައި ވަނީ ބޯކޮށް ވާރޭވެހި މާލޭގެ ބައެއް މަގުތަކުގައި ފެންބޮޑުވެފައި ވާތީ ކަމާއި ބެހޭ މުއައްސަސާތަކުން ގުޅިގެން ފެންހިންދުމުގެ މަސައްކަތް ކުރަމުންދާ ކަމަށެވެ. އަދި ވެލި ބަސްތާތައް ޖެހުމުގެ މަަަސައްކަތް ވެސް ކުރިއަށް ދާ ކަމަށް އޭނާ ވިދާޅުވިއެވެ.
މީގެ އިތުރުން ވިއްސާރައިގެ ސަބަބުން ރައްޔިތުންނަށް ދިމާވާ ދަތިތައް ކުޑަކުރުމަށް މަސައްކަތް ކުރަމުންދާ ކަމަށާއި ރައްޔިތުންގެ ޙާލު ގާތުން ބަލަމުންދާ ކަމަށް ހީނާ ވަނީ ވިދާޅުވެފައެވެ.
ހީނާގެ އިތުރުން ފުލުހުން ވެސް ވަނީ ވިއްސާރަ އާއި ގުޅިގެން މީސް މީޑިއާގައި ޕޯސްޓެއް ހިއްސާކޮށްފައެވެ. އެ ޕޯސްޓްގައި ފުލުހުން ބުނީ ބައެއް ގޭގެއަށް ފެން ވަނުމުގެ މައްސަލަ ދިމާވަމުން ދާތީ ބަރު އުޅަނދު މާލޭގެ މަގުތަކުގައި ނުދުއްވުމަށް އެދޭ ކަމަށެވެ. އަދި ޒަރޫރީ ހާލަތުގައި ނޫނީ ހަތަރު ފުރޮޅުލީ އުޅަނދު ނުދުއްވުމަށް ވަނީ އިލްތިމާސްކޮށްފައެވެ.
ބ. އަތޮޅުން ފެށިގެން ދ. އަތޮޅާ ދެމެދުގެ ސަރަހައްދަށް އޮރެންޖް އެލަޓް ވަނީ ނެރެފައެވެ.
މޫސުމާ ބެހޭ އިދާރާ އިން ބުނެފައިވަނީ މި ސަރަހައްދަށް ބޯކޮށް ވާރޭވެހި ފެންބޮޑުވާނެ ކަމަށް ލަފާ ކުރެވޭ ކަމަށެވެ.
