ރޯދަ މަހު މާލޭގައި ކުށްކުރާ ސަރަހައްދުތަކާއި ކުށް ކުރާ ޕެޓާންތަކަށް ބަލައިގެން އިތުރަށް ފުލުހުން ހަރަކާތްތެރިވާނެ ކަމަށް ފުލުހުން ބުނެފިއެވެ.

ފުލުހުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޗީފް އިންސްޕެކްޓަރ އޮފް ޕޮލިސް ވަލީދު ސައީދު ވިދާޅުވީ މާލޭގެ ކުށުގެ ޕެޓާން އާއި ކުށް ކުރާ ސަރަހައްދުތަކަށް ބަލާ އެ ސަރަހައްދުތައް ދެނެގަނެ އެ ސަރަހައްދުތަކުގައި އަމަން ބެލެހެއްޓުމަށް މި ރޯދަ މަހު ޚާއްސަ މަސައްކަތްތަކެއް ކުރާނެ ކަމަށެވެ. އަދި ފުލުހުން މާލެ ސަރަހައްދުގައި ހަރަކާތްތެރިވާ މިންވަރު ވެސް އިތުރުވާނެ ކަމަށް އޭނާ ވަނީ ފާހަގަކުރައްވާފައެވެ.

ރަމަޟާން މަހު ސްކޫލް ބަންދު ވުމާއި އެކު ގިނަ ބަޔަކު ރަށުން ބޭރަށް ދާނެ ކަމަށް ލަފާކުރެވޭތީ އެކަމަށް ވެސް ވާނީ ތައްޔާރުވެފައި ކަމަށް އޭނާ ވަނީ ވިދާޅުވެފައެވެ. އެގޮތުން ރޯދަ މަހު ބައެއް ގަޑި ގަޑިތަކުގައި ޚާއްސަކޮށް ވައްކަމާއި ފޭރުން އިތުރުކަމަށް ފާހަގަކުރެވޭތީ އެކަމަށް މީހުން ހޭލުންތެރިކުރުވުމަށް މަސައްކަތްތަކެއް ކުރައްވާފައިވާނެ ކަމަށް އޭނާ ވަނީ ވިދާޅުވެފައެވެ.

އެ ނޫސްވެރިންގެ ބައްދަލުވުމުގައި ހުޅުމާލެ ފޭސް 1 ޕޮލިސް ސްޓޭޝަންގެ ރެސްޕޯންސް އެންޑް ޕެޓްރޯލްގެ ހެޑް އިސްމާއިލް ހަމީދު ވެސް ވަނީ މީގެ ކުރިން ރަމަޟާން މަހު ހިނގާފައި ހުރި ކުށްތަކަށް ބަލައިގެން ކުށްތައް މަދުކުރުމަށް މަސައްކަތްކޮށްފައިވާ ކަން ހާމަކުރައްވާފައެވެ. ފުލުހުން ވަނީ އެ ނޫސްވެރިންގެ ބައްދަލުވުމުގައި ހުޅުމާލޭގައި ވެސް ރޯދަ މަހުގެ ވަގުތުތަކުގައި ޓްރެފިކް މެނޭޖްކުރުމަށް މަސައްކަތް ކުރައްވާފައިވާނެކަން ހާމަކުރައްވާފައެވެ.

ފުލުހުން ވަނީ ރޯދަ އަށް ތައްޔާރުވުމުގެ ގޮތުން ސިޓީ ކައުންސިލާއި ކަމާއި ގުޅުން ހުރި އިދާރާތަކާއި ގުޅިގެން މާލޭގެ މަގުތަކުގައި ޖާގަ ހުސްކުރުމަށް މަސައްކަތްތަކެއް ކޮށްފައިވާނެ ކަމަށް ފާހަގަކޮށްފައެވެ. މީގެ އިތުރުން ޓްރެފިކް ނިޝާންތައް ނެތް ސަރަހައްދުތަކުގައި ނިޝާންތައް ކުރެހުމާއި ބޭނުން ނުކޮށް ގިނަ ދުވަސްވީ އުޅަނދުތައް ނެގުމުގެ މަސައްކަތް ވެސް މާލެ ސަރަހައްދުގައި ކޮށްފައިވާ ކަމަށް ފުލުހުން ބުނެއެވެ.