އަމިއްލަފުޅަށް ރައީސް ވެވަޑައިގެންނެވި އިއުތިރާފް!

ރަސްމީ ފާލަން މަރާމާތު ކުރުމަށްފަހު، އަލުން އެތަން ހުޅުވުމަށް ބޭއްވި ޙަފްލާގައި ބައިވެރިވެ ވަޑައިގެން، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވާހަކަފުޅު ދެއްކެވި އެވެ. އިއްތިފާގުން ނަމަވެސް، އެ ދުވަހަކީ ކުރީ ސަރުކާރުން ކަނޑައަޅާފައި އޮތް ފްލެޓު ލިސްޓު މި ސަރުކާރުން އާންމު ކުރި ދުވަހެވެ.

ހަތަރުހާސް ފްލެޓު ލިބޭ މީހުންގެ ލިސްޓެއް ކުރީ ސަރުކާރުން ކަނޑައަޅާފައި އޮތީ، ހުރިހާ މަރުޙަލާއެއް ފުރިހަމަ ކުރުމަށްފަހު އެވެ. ނަމަވެސް، ރައީސް މުޢިއްޒުގެ ވެރިކަން ފެށިގެން އައިއިރު ވެސް އެ ލިސްޓު އޮތީ ހިފަހައްޓައިފަ އެވެ. އެ ލިސްޓުގައި ގޯސްތަކެއް އޮތް ކަމަށް ވިދާޅުވެ، ލިސްޓު ރިވިއު ކުރާ ވާހަކަ ސަރުކާރުން ބުންޏެވެ.

ސަރުކާރަަށް އެއް އަހަރަށް ވުރެ ގިނަ ދުވަސް ވެގެންދިޔައިރު، އެ ލިސްޓު އާންމު ކުރުމަށް އެކި ތާރީޚުތައް ދެއްވައިފި އެވެ. ޚުދު ރައީސް މުޢިއްޒު ވެސް، އެކަމުގައި ދެ ތިން ތާރީޚެއް އޮތީ ދެއްވައިފަ އެވެ. އެންމެ ފަހުން، ރަމަޟާން މަހުގެ ކުރިން، މިދިޔަ ބުރާސްފަތި ދުވަހު އެ ލިސްޓު އާންމު ކޮށްފި އެވެ.

ސަރުކާރުން އާންމު ކުރި ލިސްޓުގައިވާ ގޮތުން ފްލެޓު ލިބެނީ 1820 މީހުންނަަށެވެ. 4000 މީހުންގެ ތެރެއިން 3119 މީހުންނަށް ފްލެޓު ނުލިބޭ ކަމަށް ވަނީ ކަނޑައަޅައިފަ އެވެ. ގިނަ އަދަދެއްގެ ރައްޔިތުނަށް ލިބިފައިވާ ހައްގުން އެމީހުން މަހުރޫމު ކޮށްލުމަށްފަހު، ބުރާސްފަތި ދުވަހުގެ ރޭ ރައީސް މުޢިއްޒު ދެއްކެވި ވާހަކަ އަކުން ހިނި ނާންނާނީ ކާކު ހެއްޔެވެ؟

ބުރާސްފަތި ދުވަހުގެ ރޭ ރަސްމީ ފާލަން ދޮށުގައި ހުންނަވާ ރައީސް މުޢިއްޒު ވިދާޅުވީ ފްލެޓު ލިސްޓު ނެރުމުގައި ޒައްރެއްގެ މިންވަރު ވެސް ނުފޫޒެއް ފޯރުވާފައި ނުވާނެ ކަމަށެވެ. އެއްވެސް ފަރާތަކުން އެކަމަށް ނުފޫޒު ފޯރުވާފައި ނުވާނެކަން ފާހަގަ ކުރައްވައި ރައީސް ވިދާޅުވީ، އެއީ ނުފޫޒުން އެއްކިބާވެފައިވާ ލިސްޓެއް ކަމަށެވެ.

ދެން ވިދާޅުވީ އެއީ އެމަނިކުފާނަށް ގެދޮވެރިކަމުގެ މައުލޫމާތު އެނގިވަޑައިގަންނަވަން ފެށި ހިސާބުން، ނުފޫޒެއް ނުފޯރުވާ ނެރުނު ފުރަތަމަ ލިސްޓު ކަމަށެވެ. ރައީސް ވިދާޅުވީ އެންމެ ޖޫނިއަރ ލެވެލް އިން ފެށިގެން، ސަރުކާރުގެ ކަމާ ބެހޭ ދާއިރާއި އުޅެން ފެށި ހިސާބުން ފެށިގެން ބެލި ނަމަވެސް، ނުފޫޒެއް ނެތި ނެރުނު ފުރަތަމަ ލިސްޓު ކަމަށެވެ.

އަޅުގަނޑު ހިތަށް އެރި އެވެ. ރައީސް މުޢިއްޒު އެވެވަޑައިގެންނެވީ ވަރަށް ބޮޑު އިއުތިރާފެއްތާ އެވެ! ރައީސުލްޖުމްހޫރިއްޔާގެ މަގާމަށް އެމަނިކުފާނު ވަޑައިގެންނެވުމުގެ ކުރިން، ދެ ސަރުކާރެއްގައި ހައުސިންގ މިނިސްޓަރުގެ މަގާމު އަދާ ކުރެއްވި އެވެ. ކުރީގެ ރައީސް ޑޮކްޓަރު މުޙައްމަދު ވަޙީދު ޙަސަން މަނިކުގެ ދެ އަހަރު ދުވަހުގެ ވެރިކަމާއި، ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ފަސް އަހަރު ދުވަހުގެ ވެރިކަމުގަ އެވެ. ޖުމުލަ ހަތް އަހަރު ދުވަހުގެ މުއްދަތެއް ވަންދެން، ހައުސިންގ މިނިސްޓަރު ކަމުގައި ރައީސް މުޢިއްޒު ހުންނެވި އެވެ.

ރައީސް މުޢިއްޒު އެ ވިދާޅުވީ ގޮތުން ކަމަށް ވަނީ ނަމަ، އެމަނިކުފާނުގެ ހައުސިންގ މިނިސްޓަރު ކަމުގައި މީގެ ކުރިން ނެރެފައިވާ ފްލެޓު ލިސްޓަށް އެމަނިކުފާނުގެ ނުފޫޒު އޮތް ކަމަށް އެއްބަސްވެވަޑައިގެންނެވީ ނޫން ހެއްޔެވެ؟

ގައިމު އެމަނިކުފާނުގެ ހައުސިންގ މިނިސްޓަރު ކަމުގައި ދެ ފަހަރެއްގެ މަތިން ފްލެޓު ލިސްޓެއް އާންމު ކުރެއްވި އެވެ. އޭރު އެ އާންމު ކުރި ލިސްޓަށް ނުފޫޒު ފޯރުވި ކަަމަށް އަމިއްލަފުޅަށް އިއުތިރާފުވެ ވަޑައިގެންނެވީ ނޫން ހެއްޔެވެ؟