މުއިއްޒުގެ އިސްތިއުފާ އަށް ގޮވާ އެމްޑީޕީން މާލޭގައި ކުރި މުޒާހަރާ އަށް ފުލުހުން ހުރަސް އަޅައިފި
މުޒާހަރާގެ ބައިވެރިންވަނީ ފްލެޓު ލިސްޓުން ސަރުކާރުން ވައްކަން ކޮށްފި ކަމަށާއި، ރައްޔިތުންނަށް އަނިޔާވެރި ވެއްޖެ ކަމަށް ގޮވާފައި
ރައީސް މުއިއްޒުގެ އިސްތިއުފާ އަށް ގޮވާ މާލޭގެ މަގުމަތީގައި މިރޭ ކުރި މުޒާހަރާގެ ތެރެއިން - 27 ފެބްރުއަރީ 2025
ރައީސް މުއިއްޒުގެ އިސްތިއުފާ އަށް ގޮވާ މާލޭގެ މަގުމަތީގައި ހުކުރުވިލޭރޭ ކުރި ސުލްހަވެރި މުޒާހަރާ އަށް ފުލުހުން ހުރަސް އަޅައިފިއެވެ.
ވެހެމުންދިޔަ ބޯ ވާރޭގެ ތެރޭގައި ސުލްހަވެރިކަމާއެކު އަޑު އުފުލަމުން ދިޔަ އެމްޑީޕީގެ މެމްބަރުން ވަނީ ރައީސް މުއިއްޒުގެ އިސްތިއުފާ އަށް ގޮވާފައެވެ.
އަޑުއުފުލަމުން ދިޔަ މީހުން ގޮވަމުން ދިޔައީ، ފްލެޓް ތަކުން ސަރުކާރުން ވައްކަން ކޮށްފި ކަމަށާއި، މި ސަރުކާރުން ރައްޔިތުންނަށް ގެންދަނީ އެކި ގޮތްގޮތުން އަނިޔާވެރި ވަމުން ކަމުގައެވެ.
މުޒާހަރާ ކުރި މީހުންނަށް ފުހުލުން ފުރަތަމަ ހުރަސް އެޅީ ޗާންދަނީ މަގު އޯކިޑް މަގު ކަންމަތިންނެވެ. އެ ސަރަހައްދުން ކުރިއަށް ނުދެވޭނެ ގޮތައް ފުލުހުން ބެރިކޭޑް ޖަހާ ބަންދު ކުރިއެވެ. އެތަނުގައި އަޑުއުފުލުމަށް ފަހު މުޒާހަރާ ކުރި މީހުން ދިޔައީ މުލީއާގެ އާ ދިމާލަށެވެ.
އިސްލާމީ މަރުކަޒު ކައިރިން މުޒާހަރާ ކުރި މީހުން ކުރިއަށް ދަނިކޮށް ހުރަސް އަޅަން ފުލުހުން ވަނީ މުޒާހަރާ ކުރި މީހުންގެ ފަހަތުން ދުވެ މަގު ބައްދަން މަސައްކަތް ކޮށްފައެވެ.
އެހެން ނަމަވެސް، މުޒާހަރާ ކުރި މީހުން ކުރި އަށް ގޮސް އަމީރު އަހުމަދު މަގުން އެމްއެންޑީއެފް ހެޑްކުއަރޓާ ކަންމަތީގައި ޖަހާފައި ހުރި ބެރިކޭޑް އާ ހަމަ އަށް ވަނީ ގޮސްފައެވެ.
އެތަނުގައި ޝުއޫރު ފާޅު ކުރުމަށްފަހު މުޒާހަރާ ކުރި މީހުން ވަނީ އަނެއްކާވެސް އޯކިޑް މަގު ރީފް ސައިޑް ސަރަހައްދާ ހަމަ އަށް ވަނީ ގޮސްފައެވެ. އެހިސާބުން އަނެއްކާވެސް މުޒާހަރާގެ ބައިވެރިންނަށް ފުލުހުން ހުރަސް އަޅާ ބެރިކޭޑް ޖަހާ ބަންދު ކުރިއެވެ. ފުލުހުންގެ ބެރިކޭޑް ލައިންގެ ފަހަތުން ޝީލްޑް ހިފައިގެން ތިބި ސިފައިން ޖުމްހޫރީ މައިދާނުގެ ކަންމަތީގައި ތިއްބެވެ.
މުޒާހަރާ ކުރި މީހުން ވަނީ ރީފްސައިޑް ކުރިމަތިން ބެރިކޭޑްގައި ކައިރީގައި ތިބެ މުއިއްޒުގެ އިސްތިއުފާ އަށް ގޮވާފައެވެ.
މުޒާހަރާ ނިންމާލާފައިވަނީ މި އަނިޔާވެރި ވެރިކަމުން ރާއްޖެ އާއި ދިވެހި ރައްޔިތުން ސަލާމަތް ކޮށްދެއްވުން އެދި ކުރި ދުއާ އަކުންނެވެ.
