ޚިޔާނާތުގެ މައްސަލަ އެއް ބަލަމުންދާ ކަަމަށް ބުނެ ސުޕްރީމްކޯޓުގެ ބައެއް ފަނޑިޔާރުން ސަސްޕެންޑްކޮށްފައިވާތީ، އެކަމަށް ފާޑުކިޔުން އަމާޒުވެފައި ވަނިކޮށް ސަސްޕެންޑްކުރި ފަނޑިޔާރުންނާއި ގުޅުން ހުރި މައްސަލަ ބަލާނީ އިންސާފުވެރިކަމާއި އެކުގައި ކަމަށް އެންޓިކޮރަޕްޝަން ކޮމިޝަނުން ބުނެފިއެވެ.

ބުދަ ދުވަހު ޖޭއެސްސީން ސަސްޕެންޑް ކުރި ތިން ފަނޑިޔާރުންނަކީ ފަނޑިޔާރު ހުސުނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު އެވެ. އެ ތިން ފަނޑިޔާރުން ސަސްޕެންޑް ކުރީ އޭސީސީން ފަނޑިޔާރުންނާއި ގުޅުން ހުރި ޚިޔާނާތުގެ މައްސަލަ އެއް ބަލާ ކަމަށް ސިޓީއަކުން އެ ކޮމިޝަނަށް އަންގާފައިވާތީ ކަމަށް ޖޭއެސްސީން ވަނީ ބުނެފައެވެ.

އޭސީސީން ބުދަ ދުވަހު އާއްމު ކުރި ބަޔާނެއްގައި ބުނެފައި ވަނީ ދިވެހިރާއްޖޭގެ ސުޕްރީމް ކޯޓުގެ ބައެއް ފަނޑިޔާރުންނާއި މެދު ކުރެވޭ ކޮރަޕްޝަންގެ ތުހުމަތުތަކަކާއި ގުޅޭ މައްސަލަތަކެއް އެ ކޮމިޝަނަށް ހުށަހެޅިފައިވާ ކަމަށެވެ. އަދި އެ މައްސަލަ ތަހުގީގުކުރަމުންދާކަން އެ ކޮމިޝަންގެ ބަޔާނުގައި ވަނީ ޔަޤީންކޮށްދީފައެވެ.

މީގެ އިތުރުންއެންޓި-ކޮރަޕްޝަން ކޮމިޝަނުގެ ޤާނޫނުގެ 23 ވަނަ މާއްދާގައި ބުނާ ކޮރަޕްޝަނުގެ ޢަމަލެއް، އެޤާނޫނުގެ 24 ވަނަ މާއްދާގައި ބުނާ ފަރާތަކުން ކުރަމުންދާކަމަށް ތުހުމަތުކޮށް މި ކޮމިޝަނަށް ހުށަހެޅިއްޖެނަމަ، އެއްވެސް ފަރާތެއް އިސްތިސްނާ ކުރުމަކާ ނުލައި އެ މައްސަލައެއް ތަޙުޤީޤުކުރުމަކީ އެ ކޮމިޝަނުގެ މައްޗަށް އޮންނަ ޤާނޫނީ ޒިންމާއެއް އަދި ވާޖިބެއް ކަމަށް ވެސް އެ ބަޔާނުގައި ވަނީ ބުނެފައެވެ.

ހަމައެހެންމެ މި މައްސަލަ ބަަލަމުން ދަނީ ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 202 ވަނަ މާއްދާއާއި، އެންޓި-ކޮރަޕްޝަން ކޮމިޝަނުގެ ޤާނޫނުގެ 21 އަދި 22 ވަނަ މާއްދާގައި ބަޔާންކޮށްފައިވާ ގޮތުގެ މަތިން، މިފަދަ މައްސަލަތައް ބެލުމުގައި ޖިނާއީ ޢަދުލުގެ ނިޒާމުގައި ހިމެނޭ ޤާނޫނުތަކާއި ގަވާއިދުތަކުން ކޮމިޝަނަށް މަތިކޮށްފައިވާ ބާރުތަކުގެ ތެރެއިން ހަމަހަމަކަމާއި އެކު ކަމަށް ކޮމިޝަނުން ވަނީ ބުނެފައެވެ.

މި މައްސަލަތަކަކީ ސިޔާސީ ގޮތުން ކޯޓަށް ނުފޫޒު ފޯރުވުމަށް ބަލާ މައްސަލަތަކެއް ކަމަށް ބުނެ އޭސީސީ އާއި ޖޭއެސްސީ އަށް އާއްމުން ދަނީ ފާޑުކިޔަމުންނެވެ. އޭސީސީގެ ބަޔާނުގައި ބުނީ އެއްވެސް ފަރާތެއްގެ ނުފޫޒަކަށް ލެނބުމެއްނެތި، ވަކި ފަރާތަކަށް ބުރަނުވެ ތަޙުޤީޤު ކުރިއަށް ގެންދާނެ ކަމުގެ ޔަޤީންކަން އާއްމުންނަށް ދޭ ކަމަށެވެ.

3 ފަނޑިޔާރަކާއި ގުޅުން ހުރި ޚިޔާނާތުގެ މައްސަލަ އެއް އެންޓިކޮަޕްޝަން ކޮމިޝަނުން ބަލަމުން ދާތީ ކަމަށް ބުނެ ޖޭއެސްސީން އެ ފަނޑިޔާރުން މަޤާމުން ސަސްޕެންޑް ކުރީ ބުދަ ދުވަހު ހެނދުނު ބޭއްވި ބައްދަލުވުމެއްގައެވެ.

ޖޭއެސްސީން ތިން ފަނޑިޔާރަކު ވަކިކޮށް ޝަރުއީ ނިޒާމް ހުއްޓުވި އިރު، މި ތިން ފަނޑިޔާރުން ވަކިކުރަން ޖޭއެސްސީން ނިންމި އިރު މަޖިލީހުގެ މެމްބަރުންގެ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުގެ މައްސަލައިގައި މެންބަރުން ވަކިނުކުރެވޭ ގޮތަށް ސުޕްރީމް ކޯޓުން ވަގުތީ އަމުރެއް ނެރެދިނުމުގެ މައްސަލައިގެ އަޑުއެހުމަށް ވަކީލުން ތިބީ ކޯޓަށް ހާޒިރުވެކަން ފާހަގަކޮށްލެވެއެވެ. އެހެންކަމުން މި އަޑު އެހުން ފެށުމަށް ކުޑަ ވަގުތުކޮޅަކަށް ވެފައި ވަނިކޮށް ކުއްލި ގޮތަކަށް ސުޕްރީމް ކޯޓުގެ ފަނޑިޔާރުންތަކެއް ސަސްޕެންޑްކުރުމުން އެކަމާއި މެދު ޖޭއެސްސީ އަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ.