ޒަކިއްޔާގެ މަރުގެ މައްސަލައިގައި ފުލުހުންގެ އިހުމާލު އޮތް ކަމަށް އިޙުސާން ވިދާޅުވެއްޖެ

ނ.ހޮޅުދޫގައި މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލައިގައި ފުލުހުން ކުރިއަށް ގެންދާ ތަޙުގީގުގައި އިހުމާލުތަކެއް އޮތް ކަމަށް ޤަބޫލު ކުރައްވާ ކަމަށް، ހޯމް މިނިސްޓަރު އަލީ އިޙުސާން ވިދާޅުވެއްޖެ އެވެ.

ޒަޚަމްތަކަކާ އެކު ޒަކިއްޔާ މަރުވެފައި އޮއްވާ ފެނުނީ މިދިޔަ އަހަރުގެ ސެޕްޓެމްބަރު މަހުގެ 10 ވަނަ ދުވަހު އެވެ. އޭގެ ފަހުން ފުލުހުން އަންނަނީ އެ މައްސަލައިގެ ތަޙުގީގު ކުރިއަށް ގެންދަމުންނެވެ. ނަމަވެސް އެ މައްސަލައިގައި ފުލުހުން ދައްކާފައިވާ ބައެއް ވާހަތަކާއި، ފުލުހުންގެ ތަޙުގީގު ކުރިއަށް ގެންދާ ގޮތާ މެދު އެތައް ބަޔަކު ވަނީ ކަންބޮޑުވުން ވެސް ފާޅުކޮށްފަ އެވެ.

އެކަމާ ގުޅިގެން ހޮޅުދޫގައި ވަނީ އެކި ފަހަރުގެ މަތިން މުޒާހަރާ ވެސް ކޮށްފަ އެވެ. މިފަހުން އެ ރަށު ރައްޔިތުންގެ ޕްރެޝަރު ބޮޑުވެފައި ވަނިކޮށް، އަންގާރަ ދުވަހު ހޯމް މިނިސްޓަރު އިޙުސާން އަދި ޕޮލިސް ކޮމިޝަނަރު އަލީ ޝުޖާއު ހިމެނޭހެން، ޓީމެއް ވަނީ ހޮޅުދޫ އަށް ވަޑައިގެންފަ އެވެ. އަދި އެ ރަށުގެ ރައްޔިތުންނާ ބައްދަލު ކުރައްވާފައިވެ އެވެ.

އެ ބައްދަލުވުމުގައި ރައްޔިތުންގެ ކަންބޮޑުވުން އޮއްސާލާފައިވާއިރު، ރައްޔިތުންނާ ވާހަކަ ދައްކަވަމުން އިޙުސާން ވިދާޅުވީ އެ ރައްޔިތުން ފާހަގަކޮށްފައިވާ ފުލުހުންގެ އިހުމާލުތައް ޤަބޫލު ކުރާ ކަމަށެވެ. އަދި ބައެއް ކަންކަން އިހުމާލުން ހިނގާފައި އެބަ ހުރި ކަމަށް އިޙުސާން ވިދާޅުވި އެވެ.

މީގެ އިތުރުން ކަމެއް ދިމާވެއްޖެ ނަމަ އެކަމެއް ބަލާނެ ވަކި ގުނަވަނެއް ފުލުހުންގެ ތެރޭގައި އޮންނަ ކަމަށް އިޙުސާން ވަނީ ވިދާޅުވެފަ އެވެ. އަދި އެ ޒާތުގެ ކަންކަން ބަލާ މިނިވަން ދެ މުއައްސަސާއެއް ރާއްޖޭގައި އޮންނަކަން ވެސް އިޙުސާން ވަނީ ފާހަގަ ކުރައްވާފަ އެވެ. ހަމައެހެންމެ ބައެއް ޙާލަތްތަކުގައި އެފަދަ މައްސަލަތަކުގައި ފުލުހުން އަމަލުކޮށްފައި ހުންނަ ގޮތް ރައްޔިތުންގެ މަޖިލީހުން ވެސް ރިވިއު ކުރައްވާ ކަމަށް އިޙުސާން ވިދާޅުވެފައިވެ އެވެ.

ތިބޭފުޅުން ތިޔަ ވިދާޅުވީ ފުލުހުންގެ ބައެއް އިޙުމާލުތައް، އަޅުގަނޑު ޤަބޫލު ކުރަން ބައެއް ކަންކަން އެބަ ހުރި ވެފައި. އަނެއް ބައި ކަންކަން ތިބޭފުޅުން ތި ވިދާޅުވި ހުރިހާ ކަމެއް ދެންމެ ކޮމިޝަނަރު އެ ވިދާޅުވި ގޮތަށް، ފުލުހުންގެ ތެރޭގައި ވެސް އޮވޭ ކަމެއް ދިމާވީމާ، އެކަމެއް ބަލަން އޮންނަ ވަކި ގުނަވަނެއް. އޭގެ އިތުރުން ރާއްޖޭގައި އެބަ އޮވޭ މިނިވަން ދެ މުއައްސަސާ މިކަން ބައްލަވާ.

ހޯމް މިނިސްޓަރު އިޙުސާން

އެހެންކަމުން އޭގެން އެއްވެސް މަރުޙަލަކާ އަށް ފުލުހުންގެ ފަރާތުން ދޭން ޖެހޭ އެއްވެސް އެއްބާރުލުމެއް ނުދީ ނުބާއްވާނެ ކަމަށް ވެސް އިޙުސާން ވަނީ ވިދާޅުވެފަ އެވެ. އެކަން ފާހަގަ ކުރައްވާ އިޙުސާން ވިދާޅުވީ އެ ރަށަށް އާދެވުން ލަސްވެއްޖެ ކަމަށެވެ.

އިތުރަށް ވާހަކަ ދައްކަވަމުން އިޙުސާން ވަނީ ޒަކިއްޔާގެ އޮޓޮޕްސީ ނުހެދުމަށް ފުލުހުން ނިންމި ނިންމުމަކީ، ގޯސް ނިންމުމެއް ކަމަށް ވެސް ވިދާޅުވެފަ އެވެ. އަދި އެ ދުވަހު ޒަކިއްޔާގެ އޮޓޯޕްސީ ހަދަން ފޮނުވުނު ނަަމަ، މިއަދު އެ ވާހަކަތައް ދައްކަން ވެސް ނުޖެހޭނެ ކަމަށް އިޙުސާން ވިދާޅުވި އެވެ.