2023ގައި ކާށިދޫ ދާއިރާގެ ރައްޔިތުން ރައީސް ޞާލިހުއަށް ވޯޓު ދިނުމަށް ޖާބިރު ވަސިއްޔަތް ކުރައްވައިފި
ޖާބިރު ވަނީ ކަށިދޫގެ ތަރައްގީއަށް ރައީސް ކުރައްވާ މަސައްކަތްޕުޅަށް ޝުކުރު އަދާ ކުރައްވާފައި
ކާށިދޫ ދާއިރާގެ މެންބަރު އަބްދުﷲ ޖާބިރު
2023 ގައި ބާއްވާ ރިޔާސީ އިންތިޚާބުގައި ކާށިދޫ ދާއިރާގެ ރައްޔިތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުއަށް ވޯޓު ދިނުމަށް އެ ދާއިރާގެ މެންބަރު އަބްދުﷲ ޖާބިރު ވަސިއްޔަތް ކުރައްވައިފިއެވެ.
ޖާބިރު މިފަދައިން ވަސިއްޔަތް ކުރެއްވީ ދަނޑުވެރިންގެ ދުވަހާއި ކާބޯތަކެތީގެ ދުވަހުގެ މުނާސަބަތުގައި ކާށިދޫގައި އާދީއްތަ ދުވަހުގެ ރޭ ބޭއްވި ރަސްމިއްޔާތުގައި ވާހަކަދައްކަވަމުންނެވެ. އެ ރަސްމިއްޔާތުގައި ޖާބިރު ވިދާޅުވީ މި ސަރުކާރު އައި ފަހުން ރާއްޖެއަށް ވެސް ކުރިއެރުން ލިބިފައިވާ ކަމަށެވެ.
ޖާބިރު ވިދާޅުވީ ތަރައްގީގައި ކާށިދޫ މީގެ ކުރިން އޮތީ ވަރަށް ބޮޑަށް ފަހަތުގައި ކަމަށެވެ. ނަމަވެސް ރައީސް ޞާލިހު ވެރިކަމާ ހަވާލުވެވަައިގެން އެ ރަށުގައި ތަރައްގީގެ މަޝްރޫއުތައް ކުރިއަށް ގެންގޮސްފައިވާ ކަމަށާއި ކޮވިޑު ފަދަ ދަތި ހާލަތުގެ ތެރޭގައި ވެސް އެ ރަށުގައި ހިންގި މަޝްރުއޫތައް މެދުކެނޑުނަ ނުދެއްވާ ކަން އޭނާ ފާހަގަކުރެއްވިއެވެ.
އޭނާ ވިދާޅުވީ ކާށިދޫއަކީ ދަނޑުވެރިކަމުގައި ރާއްޖޭގައި ފާހަގަކޮށްލެވޭ ރަށަކަށްވާއިރު އަދިވެސް އެ ރަށުގައި އެ ދާއިރާ އިތުރަށް ކުރިއެރުވޭނެ ކަމަށެވެ. އެގޮތުން، ފެނާއި ނަރުދަމާގެ މަސައްކަތް ނިމުމުން އެ ދާއިރާ ވަރަށް ބޮޑަށް ފުޅާވެގެންދާނެކަމަށް ޖާބިރު ވިދާޅުވިއެވެ.
ރާއްޖެ ހަމަމަގަށް އެޅެން ޖެހޭ ކަން ފާހަގަކުރައްވައި ޖާބިރު ވިދާޅުވީ އެކަން ކުރެވޭނީ ރައީސް ޞާލިހުއަށް ކަމަށާއި އެހެންވެ ދާއިރާގެ ސިޔާސީ ތަޅުދަނޑި އެމަނިކުފާނަށް އަރުވާކަމަށެވެ. އަދި ރައީސްއަށް ދެވަނަ ދައުރެއް ދޭން ޖެހޭ ކަމަށް ގަބޫލު ކުރައްވާ ކަމަށާއި އޭނާ ނެތް ދުވަހެއްގައި ވެސް ރައީސް ކާށިދޫ ދާއިރާއަށް ވަޑައިގެންފިނަމަ އެމަނިކުފާނަށް އިންތިޚާބުގައި ވޯޓު ދިނުމަށް ވަސިއްޔަތް ވެސް ކުރައްވާކަމަށް ޖާބިރު ވިދާޅުވިއެވެ.
ޖާބިރު ވަނީ ރައީސް ވެރިކަމަށް ވަޑައިގެން އެމަނިކުފާނުގެ ސެޕްޝަލް އެންވޯއީގެ މަގާމަށް އޭނާ އައްޔަން ކުރެއްވީތީ އާއި ފަތުރުވެރިކަމުގެ ދާއިރާއަށް އޭނާ ކޮށްދެއްވި ޚިދުމަތް ފާހަގަކުރައްވައި އަގުވަޒަންކުރެއްވީތީ ޝުކުރު އަދާކުރައްވާފައެވެ. އަދި ކާށިދޫގެ ތަރައްގީއަށް ކުރައްވާ މަސައްކަތްތަކަށާއި މިއަހަރުގެ ދަނޑުވެރިންގެ ދުވަސް ކާށިދޫގައި ފާހަގަކުރެެއްވީތީ ވެސް އެމަނިކުފާނަށް ޖާބިރު ޝުކުރު އަދާ ކުރެއްވިއެވެ.
