ރައީސް ހުޅުއްވައި ދެއްވި މީދޫ ފުޓްސަލް ދަނޑަކީ ކުރީ ސަރުކާރުގެ މަޝްރޫއެއް

ދ.މީދޫގައި ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ތަރައްޤީ ކުރަން ފެށި ފުޓްސަލް ދަނޑު، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ހުޅުއްވައި ދެއްވައިފި އެވެ.

ރައީސް މުޢިއްޒު، އެ ފުޓްސަލް ދަނޑު ހުޅުއްވައި ދެއްވީ މިހާރު އެމަނިކުފާނު ދ.އަތޮޅުގެ މީހުން ދިރިއުޅޭ ހުރިހާ ރަށްތަކަށް ކުރައްވަމުން ގެންދަވާ ދަތުރުފުޅުގައި ހޯމަ ދުވަހުގެ ރޭ އެވެ. އެ ފުޓްސަލް ދަނޑު ހުޅުވުމުގެ ގޮތުން ޚާއްސަ ފުޓްސަލް މެޗެއް ވެސް ކުޅެފައިވާއިރު، ރައީސް މުޢިއްޒު އަދި ވަޒީރުންގެ މަޖިލީހުގެ މެމްބަރުން ވެސް ވަނީ ބައިވެރިވެ ވަޑައިގެންފަ އެވެ.

ދ.މީދޫގައި ފުޓްސަލް ދަނޑެއް ޤާއިމު ކުރުމަށް އޭރުގެ ކުޅިވަރު ވުޒާރާ އިން ވަނީ އެ ރަށު ކައުންސިލާ ހަވާލުކޮށްގެން ކުރިއަށް ގެންދަން ނިންމައިފަ އެވެ. އެގޮތުން 2023 ވަނަ އަހަރު ވަނީ އެ މަސައްކަތް ބަޔަކާ ހަވާލު ކޮށްފަ އެވެ. އެ މަސައްކަތް ހަވާލުކޮށްފައި ވަނީ ބްރިލިއެންޓް ކޮމްޕެނީ ޕްރައިވެޓް ލިމިޓެޑާ އެވެ. އެ މަސައްކަތުގެ އަގަކީ އެއް މިލިއަން، ނުވަ ލައްކަ، ނުވަދިހަ ތިން ހާސް، އަށްޑިހަ އެއް ރުފިޔާ، އަށްޑިހަ ފަސް ލާރި އެވެ.

ކުރީ ސަރުކާރުން ރާއްޖޭގެ އެކި ކަންކޮޅުތަކުގައި ޤާއިމު ކޮށްފައިވާ މަޝްރޫއުތައް މި ސަރުކާރުން އަންނަނީ ރަސްމީކޮށް ހުޅުވަމުންނެވެ. ޚާއްސަކޮށް ރައީސް މުޢިއްޒު ރަށް ރަށަށް ވަޑައިގެން، އެ މަޝްރޫއުތައް ރަސްމީކޮށް ހުޅުވައި ދެއްވަ އެވެ.