އެސޯސިއޭޝަން ކަޕްގެ 19 އަހަރުން ދަށުގެ ޗެމްޕިއަންކަން މައިޝާން އަދި އަލީޝާ އަށް

ކެރަމް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ބާއްވަމުން އަންނަ، އެސޯސިއޭޝަން ކަޕްގެ 19 އަހަރުން ދަށުގެ ޗެމްޕިއަންކަން އަޙުމަދު މައިޝާން އަދި އައިޝަތު އަލީޝާ ނާފިއު ހޯދައިފި އެވެ.

ފިރިހެން ސިންގަލްސްގެ ޗެމްޕިއަންކަން މައިޝާން ހޯދީ، ފައިނަލްގައި މީކާއީލް ބިން މަދަދުﷲގެ މައްޗަށް ސީދާ ދެ ސެޓުން ކުރި ހޯދައިގެންނެވެ. ފައިނަލް މެޗު މައިޝާން ކާމިޔާބު ކުރީ 19-17 އަދި 18-16 އިންނެވެ.

ފިރިހެން ސިންގަލްސްގެ ތިން ވަނަ ހޮވަން ކުޅުނު މެޗުގައި އަޙުމަދު ނައިޝަން ނާސިހް ވަނީ 25-09 އިން ޢަބްދުﷲ ކިޔާން ބިން ޝާޒް ބަލިކޮށްފަ އެވެ.

މުބާރާތުގެ 19 އަހަރުން ދަށުގެ އަންހެން ސިންގަލްސް ފައިނަލްގައި އަލީޝާ ވަނީ ދެ ސެޓު އެއް ސެޓުން ޒިއުނާ ބިންތި ނަޝީދުގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ސެޓު އަލީޝާ ކާމިޔާބު ކުރީ 20-13 އިންނެވެ. ނަމަވެސް ޒިއުނާ ވަނީ 07-19 އިން ދެ ވަނަ ސެޓު ކާމިޔާބު ކޮށްފަ އެވެ. ތިން ވަނަ ސެޓު އަލީޝާ ކާމިޔާބު ކޮށްފައި ވަނީ 20-15 އިންނެވެ.

އަންހެން ސިންގަލްސްގެ ތިން ވަނަ ހޮވަން ކުޅުނު މެޗުގައި އައިޝަތު ރީމް ވަނީ 24-05 އިން ޒުލައިޚާ ލީން ޙަސަން ބަލިކޮށްފަ އެވެ.