ޣައްޒާ އިން ފަލަސްތީނު މީހުން ބާލައި އެތަން ހިފަން ޓްރަމްޕް ގެންގުޅުއްވާ ޕްލޭން ތަންފީޒު ކުރާނަން: ނަތަންޔާހޫ

އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ހޯމަ ދުވަހު ވިދާޅުވެފައިވަނީ، ޣައްޒާ ހިފައި، އެތަނުގެ ފަލަސްޠީނު ރައްޔިތުން ބޭލުމަށް އެމެރިކާ އިން ހުށަހަޅާފައިވާ ހުށަހެޅުމަށް އޭނާ "އެއްބަސްވެފައިވާ" ކަމަށެވެ.

ނަތަންޔާހޫ މިހެން ވިދާޅުވިއިރު، މި ޕްލޭނަށް ދެކޮޅު ހަދާ ކަމަށް އަރަބި ދުނިޔެއިން ވަނީ ބުނެފައެވެ.

ޓްރަމްޕްގެ މި ޕްލޭނަށް ތާއީދު ހޯދުމަށް އެމެރިކާގެ އެންމެ އިސް ޑިޕްލޮމެޓް މެދު އިރުމައްޗަށް ކުރައްވާ ދަތުރުފުޅުގައި އިސްރާއީލަށް ވަޑައިގަތުމަށްފަހު މިހާރު ހުންނެވީ ސައުދީ އަރަބިއްޔާގައެވެ.

އާދީއްތަ ދުވަހު ނަތަންޔާހޫ އާ ބައްދަލު ކުރެއްވުމަށް ފަހު، އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ވިދާޅުވީ ހަމާސް "ނައްތާލަންޖެހޭނެ" ކަމަށެވެ.

އިސްރާއީލުގެ ބޮޑުވަޒީރު ފާހަގަކުރެއްވީ އެކުވެރި ދެ ޤައުމުން "އެއް ސްޓްރެޓެޖީއެއް" ގެންގުޅޭ ކަމަށެވެ.

ހޯމަ ދުވަހު ނެރުއްވި ބަޔާނެއްގައި، ނަތަންޔާހޫ ވިދާޅުވެފައިވަނީ "އެހެން ޣައްޒާއެއް" އުފެއްދުމަށް އެމެރިކާގެ ރައީސް ޓްރަމްޕް ހުށަހަޅުއްވާފައިވާ ޕްލޭނަށް އޭނާ "އެއްބަސްވެފައިވާ" ކަމަށެވެ. އަދި ހަނގުރާމަ އަށް ފަހު، "ހަމާސް އަދި ފަލަސްޠީނު އޮތޯރިޓީ" އަކަށްވެސް ޣައްޒާ އަށް ބާރު ނުފޯރުވޭނެ ކަމަށެވެ.

އިސްރާއީލުގެ އެންމެ ގާތް އެކުވެރިޔާ އަދި ހަތިޔާރު ސަޕްލައިކޮށްދޭ ފަރާތްކަމުގައިވާ އެމެރިކާ އިން ބުނެފައި ވަނީ އަރަބި ސަރުކާރުތަކުން ހުށަހަޅާ އެހެން ހުށަހެޅުންތަކަށް އެމެރިކާ ހުޅުވިފައިވާ ކަމަށެވެ. ނަމަވެސް ރޫބިއޯ ވިދާޅުވެފައިވަނީ މިވަގުތަށް "ހަމައެކަނި ޕްލޭނަކީ ޓްރަމްޕްގެ ޕްލޭން" ކަމަށެވެ.

އެމެރިކާ އިން ގެންދަނީ ސައޫދީ އަރަބިއްޔާ އިން އިސްރާއީލް ބަލައިގަތުމުގެ އެއްބަސްވުމެއް ހެދުމުގެ މަސައްކަތް ކުރަމުންނެވެ. މިކަމަށް ރިޔާޟުން ޝަރުތު ކޮށްފައި ވަނީ ފަލަސްޠީނު ދައުލަތެއް ޤާއިމުކުރުމެވެ. މިއީ އިސްރާއީލުގެ ލީޑަރުން އިދިކޮޅު ހަދަމުން އަންނަ ކަމެކެވެ. އަދި މިއީ ޓްރަމްޕްގެ ޣައްޒާ ޕްލޭނާ ފުށުއަރާ ކަމެއް ކަމަށް ވެސް މިހާރު ވަނީ ފާހަގަ ކުރެވިފައެވެ.

ޣައްޒާ ހަނގުރާމަ ދާއިމީކޮށް ނިންމުމަށް އަމާޒު ކޮށްގެން ކުރިއަށް ގެންދިއުމަށް ހަމަޖެހިފައިވާ ދެވަނަ ފިޔަވަހީގެ މަޝްވަރާތައް މި ހަފްތާގެ ތެރޭގައި ދޯހާގައި ފެށިދާނެ ކަމަށް ހަމާސްގެ އޮފިޝަލަކާއި މަޝްވަރާތަކާ ގުޅޭގޮތުން މަޢުލޫމާތު ލިބިފައިވާ އިތުރު ފަރާތަކުން މީޑިއާ އަށް ހާމަކޮށްފައިވެއެވެ.

ނަތަންޔާހޫގެ އޮފީހުން ބުނެފައިވަނީ ދެވަނަ ފިޔަވަހި މަޝްވަރާ ކުރުމަށް ހޯމަ ދުވަހު އޭނާ ސެކިއުރިޓީ ކެބިނެޓުގެ ބައްދަލުވުމެއް ބާއްވާނެ ކަމަށެވެ.

އެ އޮފީހުން ބުނެފައިވަނީ ގާހިރާ އަށް ފޮނުވާފައިވާ މަންދޫބުންނަށް "ދެވަނަ ފިޔަވަހީގެ މަޝްވަރާތަކަށް އިތުރު އިރުޝާދުތައް" ލިބޭނީ ކެބިނެޓު ބައްދަލުވުމަށްފަހު ކަމަށެވެ.