ވެރިކަން ކުރާ ތިން ބާރުގެ ތެރެއިން އެއް ބާރުގެ މިނިވަންކަން މިހާރު އޮތީ ސުޕްރީމް ކޯޓުގެ އަތްމަތީގަ ކަމަށާއި، ޕާޓީ ބަދަލުކުރުމުން މެމްބަރުންގެ ގޮނޑި ގެއްލޭ ގޮތަށް ޤާނޫނުއަސާސީ އަށް ހުށަހަޅާފައިވާ މައްސަލަ ކުރިއަށް ގެންދިއުމުގައި ރައްޔިތުންގެ ކުރިއެރުމަށް އަނދިރިކަން ނާންނާނެ ގޮތަށް ގޮތެއް ނިމިގެންދާނެ ކަމަށް އުއްމީދު ކުރައްވާ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އޭނާ އެފަދައިން ވިދާޅުވީ ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާއި ގުޅިގެން ސުޕްރީމް ކޯޓަށް ހުށަހަޅާފައިވާ މައްސަލަ އާއި މެދު ވާހަކަދައްކަވަމުންނެވެ.

ސުޕްރީމްކޯޓު ސަރަހައްދުގައި ހުންނަވާ ހޯމަ ދުވަހު ރާއްޖެއެމްވީ އަށް ދެއްވި ބަސްތީގަތުމެއްގައި ވާހަކަދައްކަވަމުން މުހައްމަދު ރަޝީދު ވިދާޅުވީ މަޖިލީހަކީ އެންމެ ބޮޑު މިނިވަން މުއައްސަސާ ކަމަށާއި އެތަނުގައި ތިބީ ރައްޔިތުންގެ ހައްގުގައި ބަސް ބުނަން ތިބި މެމްބަރުން ކަމަށެވެ. އެހެންކަމަށް ވާއިރު ރައްޔިތުންގެ ބާރެއް ނެތި، ރައްޔިތުންގެ ބަހެއް ހޯދުމަކާއި ނުލާ މެމްބަރުންގެ ގޮނޑި ގެއްލުމަކީ ބަލައިގަނެވޭ ކަމެއް ނޫން ކަމަށް އޭނާ ވިދާޅުވިއެވެ.

މީގެ އިތުރުން ތިން ބާރު ވަކިވެފައިވާ އިރު ސުޕްރީމް ކޯޓަކީ ވެސް ވަރަށް މުހިންމު ބާރެއް ކަމަށް ބިގޭ ވަނީ ފާހަގަކުރައްވާފައެވެ. އެހެންކަމުން އެ ކޯޓުގެ ޒިންމާ ވެސް މި ވަގުތު ވަރަށް ބޮޑު ކަމަށް އޭނާ ވަނީ ވިދާޅުވެފައެވެ. މެމްބަރުން ޕާޓީ ބަދަލުކުރުމުން ގޮނޑި ގެއްލުމާއި މެދު ސުޕްރީމްކޯޓުން ނިންމާ ނިންމުމަކީ ރާއްޖޭގެ ކުރިމަގު އެ ނިންމުމަކަށް ބަރޯސާވާ ނިންމުމެއް ކަމަށް އޭނާ ވަނީ ވިދާޅުވެފައެވެ.

ރައްޔިތުންނަށް ހައްގުތައް ހޯދައިދިނުމަށް މަސައްކަތް ކުރުމުގެ ދިގު ތާރީހެއް ރާއްޖޭގައި އެބަ އޮތް ކަމަށާއި މިހާރު ފެންނަނީ ޤާނޫނުއަސާސީން ހޯދި ހައްގުތައް ގެއްލި، ވެރިކަމުގެ ބާރުތައް އެއްވެގެންދާ މަންޒަރު ކަމަށް އޭނާ ވިދާޅުވިއެވެ. އެއީ ވަރަށް ހިތާމަކުރާ ކަމެއް ކަމަށް ވެސް އޭނާ ވަނީ ވިދާޅުވެފައެވެ.

ބާރުތައް ވަކިކުރެވިފައި ވަނީ އެތައް ބައެއްގެ ޤުރުބާނީއަކާއި އެކުގައި ކަމަށް އޭނާ ވަނީ ވިދާޅުވެފައެވެ. އެކަން އެހެން އޮތް އިރު ވެރިކަމުގެ ބާރުތައް އެއްވެގެން ދިއުމަކީ ރައްޔިތުންނަށް ލިބޭ ވަރަށް ބޮޑު ނިކަމެތި ކަމެއް ކަމަށް އޭނާ ވަނީ ވިދާޅުވެފައެވެ.

މެންބަރުކަން ގެއްލޭ ގޮތަށް ގާނޫނު އަސާސީއަށް ގެނައި ބަދަލުގެ މައްސަލަ ހޯމަ ދުވަހު ސުޕްރީމް ކޯޓުގައި ވަނީ ފަށާފައެވެ.

މި މައްސަލައިގައި ހަވާލާދީފައިވާ ގަޒިއްޔާ އަކީ، 20 ނޮވެމްބަރު 2024 ގައި ރައީސުލްޖުމްހޫރިއްޔާ ތަސްދީގުކޮށްފައިވާ ގާނޫނު ނަންބަރު 25/2024 (ގާނޫނުއަސާސީ އަށް 6 ވަނަ އިސްލާހު ގެނައުމުގެ ގާނޫނު) ގެ ދަށުން، ރައްޔިތުންގެ މަޖިލީހުގެ މެމްބަރަކު އިންތިހާބުވާ ސިޔާސީ ޕާޓީ ބަދަލުކޮށްފިނަމަ، ނުވަތަ އެ މެމްބަރަކު ސިޔާސީ ޕާޓީ އިން ވަކިކޮށްފިނަމަ، މެމްބަރުކަމުން ވަކިވާ ގޮތަށް، ގާނޫނުއަސާސީގެ 73 ވަނަ މާއްދާ އަށް ގެނެސްފައިވާ ބަދަލުތައް، ގާނޫނުއަސާސީގެ އަސާސީ އޮނިގަނޑާ ހިލާފު ކަމަށް ދެކިގެން، އެ މާއްދާ ބާތިލު ކޮށްދިނުމަށް އެދި ހުށަހެޅުމުން ބަލަމުންދާ މައްސަލައެކެވެ.

އެ މައްސަލައިގައި ބުނެފައި ވަނީ ޕާޓީ ބަދަލުކުރުމުން ގޮނޑި ގެއްލޭ އިސްލާހު ގާނޫނުއަސާސީ އަށް ގެނެސްފައިވަނީ ގާނޫނު އަސާސީގެ 4 ވަނަ، 8 ވަނަ، 26، 75، އަދި 90 ވަނަ މާއްސަލައާ ހިލާފަށް ކަމަށެވެ. އަދި އެ ބަދަލަކީ ސީދާ ގާނޫނުއަސާސީގެ އޮނިގަނޑާ ހިލާފަށް ގެނެސްފައިވާ ބަދަލެއް ކަމަށެވެ.